ଲଣ୍ଡନ: ପୂର୍ବତନ ରାଜନୈତିକ ପ୍ରତିଦ୍ବନ୍ଦ୍ବୀଙ୍କଠାରୁ ବ୍ରିଟେନ ସରକାର ଦୈନିକ ଶୁଣୁଛନ୍ତି ନୂଆ ନୂଆ ଦାବି । କେବେ ଲକଡାଉନ କଟକଣା ଅବଧି ବୃଦ୍ଧିକୁ ନେଇ ଦାବି, କେବେ କୋହଳକୁ ନେଇ ଦାବି ତ ପୁଣି କେବେ କଟକଣାର ନିୟମକୁ ବିରୋଧ । ଏହା ମଧ୍ୟରେ ଏବେ ବ୍ରିଟେନରେ ଲାଗୁ ରହିଥିବା ସର୍ବନିମ୍ନ 2 ମିଟର ଦୂରତାର କଟକଣା ବିରୁଦ୍ଧରେ ପୁଣି ତେଜିଛି ବିରୋଧୀଙ୍କ ସ୍ବର । ଏହି ନିୟମରେ ପରିବର୍ତ୍ତନ କରିବା ପାଇଁ ସରକାରଙ୍କୁ ଦାବି ଜଣାଇଛନ୍ତି ବିରୋଧୀ ।
ବ୍ରିଟେନ କନଜରଭେଟିଭ ଦଳର ମୁଖ୍ୟ ଲାଏନ ଡନକାନ ସ୍ମିଥଙ୍କ କହିବା ଅନୁଯାୟୀ ଏହି ସାମାଜିକ ଦୂରତା ନିୟମ ସଂକ୍ରମଣ ରୋକିବାରେ କୌଣସି ପ୍ରକାରେ ସହାୟକ ନୁହେଁ । ବରଂ ଏହା ଦେଶର ଅର୍ଥନୀତିକୁ ଅଧିକ ପ୍ରଭାବିତ କରୁଛି । ସର୍ବସାଧାରଣଙ୍କ ସେବା ପାଇଁ ଥିବା ବସ୍ ବା ମେଟ୍ରୋ ଠିକ୍ ଭାବେ ପରିଚାଳିତ ହୋଇପାରୁନଥିବା ବେଳେ ସଦ୍ୟ ଖୋଲିଥିବା ବାର୍ ଓ ପବ୍ରେ ଲୋକଙ୍କ ଅଭାବରୁ ବୁଡିବାରେ ଲାଗିଛି ବ୍ୟବସାୟ । ତେଣୁ 2 ମିଟର ପରିବର୍ତ୍ତେ ନିୟମକୁ ପରିବର୍ତ୍ତନ କରାଯାଇ 1 ମିଟରକୁ ହ୍ରାସ କରାଗଲେ ହୁଏତ ସ୍ଥିତିରେ ପରିବର୍ତ୍ତନ ଆସିବ ବୋଲି ସ୍ମିଥ ପରାମର୍ଶ ଦେଇଛନ୍ତି ।
ସେ ସରକାରଙ୍କୁ ଏନେଇ ଉଦାହରଣ ଦେଇ କହିଛନ୍ତି ବିଶ୍ବ ସ୍ବାସ୍ଥ୍ୟ ସଙ୍ଗଠନର ଏହି ନିୟମଧାରାକୁ ଫ୍ରାନ୍ସ, ଡେନମାର୍କ ଓ ସିଙ୍ଗାପୁର ଲାଗୁ କରିସାରିଛନ୍ତି । ସେମାନଙ୍କ ଦେଶରେ ଏହି ନିୟମ ଦ୍ବାରା ସେପରି କୌଣସି କ୍ଷତି ହେଉଥିବା ପରିଲକ୍ଷିତ ହେଉ ନାହିଁ, ତେଣୁ ୟୁକେରେ ମଧ୍ୟ ଏହି ନିୟମକୁ ଲାଗୁ କରିବା ପାଇଁ ସ୍ମିଥ ସରକାରଙ୍କୁ ପରାମର୍ଶ ଦେଇଛନ୍ତି ।
@IANS
