ହଂକଂ: କ୍ରମାଗତ ଭାବେ ତୃତୀୟ ଦିନ ପାଇଁ ହଂକଂରେ ଆକ୍ରାନ୍ତ ସଂଖ୍ୟା ଶୂନରେ ସ୍ଥିର ରହିଛି । ଏନେଇ ସହରରେ ବର୍ତ୍ତମାନ କୋରୋନା ସ୍ଥିତି ନିୟନ୍ତ୍ରଣାଧିନ ରହିଥିବା ପ୍ରକାଶ କରିଛନ୍ତି ଖାଦ୍ୟ ଓ ସ୍ବାସ୍ଥ୍ୟ ସଚିବ ସୋଫିଆ ଚାନ । ଏହି ଆଧାରରେ ବର୍ତ୍ତମାନ ଧିରେ ଧିରେ କ୍ବାରେନଣ୍ଟାଇନ ନିୟମ କୋହଳ କରିବା ପାଇଁ ଘୋଷଣା କରାଯାଇଛି । ଚୀନର ମୁଖ୍ୟ ସହରରୁ ହଂକଂକୁ ଯାତ୍ରା କରୁଥିବା ଯାତ୍ରୀ ଓ ଦୈନିକ ସୀମା ଅତିକ୍ରମ କରୁଥିବା ଛାତ୍ରଛାତ୍ରୀମାନଙ୍କ ପାଇଁ ଏହି ନିୟମ କୋହଳ କରାଯାଇଛି ।
ବର୍ତ୍ତମାନ କୋରୋନା ସ୍ଥିତି ନିୟନ୍ତ୍ରଣାଧିନ ରହିଥିବାରୁ ଦେଶର ଆର୍ଥିକ ଅବସ୍ଥାକୁ ପୁଣି ସଳଖ କରିବାର ଆବଶ୍ୟକତା ରହିଛି । ତେଣୁ କେତେକ କ୍ଷେତ୍ରରେ ନିୟମ କୋହଳ କରାଯିବାର ନିଷ୍ପତ୍ତି ନିଆୟାଇଛି । ସେପଟେ ବିଦେଶାଗତଙ୍କ ପାଇଁ ଆଗାମୀ ମାସେ ଅର୍ଥାତ ଜୁନ 7 ପର୍ଯ୍ୟନ୍ତ କଟକଣା ଲାଗୁ ରହିବ ବୋଲି କୁହାଯାଇଛି । ଅନ୍ୟପଟେ ଅଗଷ୍ଟ 31 ପର୍ଯ୍ୟନ୍ତ ଯିବା ଆସିବା ସମୟରେ ରେଜିଷ୍ଟ୍ରେସନ ଓ ଟ୍ରାଭେଲ ହିଷ୍ଟ୍ରି ଯୋଗାଇବା ପାଇଁ ବାଧ୍ୟତାମୂଳକ ନିୟମ ବଳବତ୍ତର ରହିବ ।
ସୂଚନା ମୁତାବକ ଗତ 15 ଦିନରେ ପଞ୍ଚମ ଥର ପାଇଁ ସହରରେ ଶୂନ ଆକ୍ରାନ୍ତ ସଂଖ୍ୟା ରେକର୍ଡ ହୋଇଛି । ଏଥିସହ ସହରରେ ମୋଟ ଆକ୍ରାନ୍ତଙ୍କ ସଂଖ୍ୟା 1037ରେ ସ୍ଥିର ରହିଛି । ସେପଟେ ପୂର୍ବରୁ ମେ 7 ପର୍ଯ୍ୟନ୍ତ ଦେଶରେ ସାମାଜିକ ଦୂରତ୍ବ ବଜାୟ ରଖି 4 ଜଣରୁ ଅଧିକ ଏକାଠି ନହେବା ପାଇଁ ଘୋଷଣା ହୋଇଥିଲା । ହେଲେ ସ୍ଥିତିରେ ସୁଧାର ପରେ ନିଷ୍ପତ୍ତିରେ ପରିବର୍ତ୍ତନ କରାଯାଇଥିବା ପ୍ରକାଶ କରିଛନ୍ତି ଖାଦ୍ୟ ଓ ସ୍ବାସ୍ଥ୍ୟ ବିଭାଗ ଡେପ୍ୟୁଟି ସଚିବ ହୱାର୍ଡ ଚାନ । ସେ ଏହା ମଧ୍ୟ କହିଛନ୍ତି ନିୟମ କୋହଳ ସତ୍ତ୍ବେ ହୁୱାଇ ପ୍ରାନ୍ତରୁ କୌଣସି ବ୍ୟକ୍ତିଙ୍କୁ ହଂକଂରେ ପ୍ରବେଶ ନିଷେଧ ରହିଛି ।
