ଇସଲାମାବାଦ: କୋରୋନା ମହାମାରୀଠାରୁ ଅଧିକ ଭୟଙ୍କର ପରିସ୍ଥିତି ସୃଷ୍ଟି କରିବା ଆଶଙ୍କାରେ ପଙ୍ଗପାଳକୁ ଜୈବିକ ସାର ପ୍ରସ୍ତୁତିରେ ଲଗାଇବ ପାକିସ୍ତାନ । ବିଭିନ୍ନ ସମ୍ପ୍ରଦାୟର ସହଯୋଗରେ ଏହି କାର୍ଯ୍ୟ ସମ୍ପାଦନ କରିବା ନେଇ ଗୁରୁବାର ଗଣମାଧ୍ୟମରେ ପ୍ରକାଶ କରିଛି ପାକିସ୍ତାନ । ଜାତୀୟ ଖାଦ୍ୟ ସୁରକ୍ଷା ଓ ଅନୁସନ୍ଧାନ ମନ୍ତ୍ରଣାଳୟ ଏନେଇ ସରକାରଙ୍କୁ ପ୍ରସ୍ତାବ ଦେଇଥିବା ଜଣା ପଡିଛି ।
ଏହି ପ୍ରସ୍ତାବ ମୁତାବକ ଫସଲକୁ କ୍ଷଣିକରେ କାଟି ନଷ୍ଟ କରୁଥିବା ପଙ୍ଗପାଳକୁ ଜୈବିକ ସାର ପ୍ରସ୍ତୁତିରେ ବ୍ୟବହାର କରାଯାଇପାରେ । ଏଥିପାଇଁ ପଙ୍ଗପାଳ ସଂଗ୍ରହ ପ୍ରକ୍ରିୟାର ଆବଶ୍ୟକତା ରହିଥିବା ବେଳେ ଏନେଇ ତୃଣମୂଳସ୍ତରରେ ପ୍ରୋତ୍ସାହନ ପ୍ରକ୍ରିୟାକୁ ତ୍ବରାନ୍ବିତ କରାଯିବା ନେଇ ଯୋଜନା ରହିଥିବା ଜଣା ପଡିଛି । ଏହି ଯୋଜନାରେ ପ୍ରଥମେ ବିଭିନ୍ନ ସମ୍ପ୍ରଦାୟ ଦ୍ବାରା ପଙ୍ଗପାଳ ସଂଗ୍ରହ ହେବ । ଏହି କାର୍ଯ୍ୟକ୍ରମରେ ଅନୁଭବୀ ଗବେଷକମାନେ ମଧ୍ୟ ସାମିଲ ରହିବେ ।
ଏତବ୍ ବ୍ୟତୀତ କମ୍ପୋଷ୍ଟ ତିଆରି ପ୍ରକ୍ରିୟାରେ ଭାଗ ନେଇଥିବା ସମ୍ପ୍ରଦାୟ ଓ ଅନୁଭବୀମାନଙ୍କୁ ମଧ୍ୟ ଏଥିରେ ସାମିଲ କରାଯିବାର ସୂଚନା ରହିଛି । ତେବେ ପଙ୍ଗପାଳ ସଂଗ୍ରହ ହେବା ପରେ ଏହାସହ କେତେକ ବାୟୋ ୱେଷ୍ଟ ବା ବିଘଟନ ଯୋଗ୍ୟ ବସ୍ତୁକୁ ମିଶାଇ ଏକ କମ୍ପୋଷ୍ଟ ପ୍ରସ୍ତୁତ କରାଯିବ । ଏହି କମ୍ପୋଷ୍ଟ ଶସ୍ୟ ଉତ୍ପାଦନ କ୍ଷମତା 10ରୁ 15 ପ୍ରତିଶତ ବଢାଇବା ସହ ମାଟିର ଉର୍ବରତା ମଧ୍ୟ ବଢାଇବାରେ ସାହାଯ୍ୟ କରିବ ବୋଲି ଆକଳନ କରାଯାଉଛି ।
ସେପଟେ ଏହି ଜୈବିକ ସାରର ବ୍ୟବହାର ଆରମ୍ଭ ହେଲେ ଅନ୍ୟ ରାସାୟନିକ ସାରର ବ୍ୟବହାର ମାତ୍ରାକୁ 25 ପ୍ରତିଶତ ହ୍ରାସ କରାଯାଇପାରିବ ବୋଲି କୁହାଯାଉଛି । ଦେଶରେ ପଙ୍ଗପାଳଙ୍କ ଉତ୍ପାତ ଯୋଗୁଁ ଖାଦ୍ୟାଭାବ ଭଳି ପରିସ୍ଥିତି ସୃଷ୍ଟି ହେବାର ସମ୍ଭାବନା ରହିଥିବାରୁ ଏପରି ଉପାୟର ଚିନ୍ତା କରାଯାଇଥିବା ଜାତୀୟ ଖାଦ୍ୟ ସୁରକ୍ଷା ଓ ଅନୁସନ୍ଧାନ ମନ୍ତ୍ରଣାଳୟ ସୂଚନା ଦେଇଛି ।
@IANS
