ସିଓଲ: ନିକଟରେ ଦକ୍ଷିଣ କୋରିଆ ପ୍ରତିରକ୍ଷା ବିଭାଗ ଦ୍ବାରା ପରିଚାଳିତ ଡେ-କେୟାର ସେଣ୍ଟରରେ ଏକ 3 ବର୍ଷର ଶିଶୁ କୋରୋନା ପଜିଟିଭ ଚିହ୍ନଟ ହୋଇଛି । ଏହାର ତୁରନ୍ତ ପରେ ଦକ୍ଷିଣ କୋରିଆ ପ୍ରତିରକ୍ଷା ବିଭାଗର 10ରୁ ଉର୍ଦ୍ଧ୍ବ ପ୍ରତିରକ୍ଷା ଅଧିକାରୀ ସେଲ୍ଫ ଆଇସୋଲେସନରେ ରହିଥିବା ଜଣା ପଡିଛି । ରବିବାର ଶିଶୁଟି କୋରୋନା ଚିହ୍ନଟ ହେବା ପରେ ସୋମବାରଠାରୁ ଏହି ସମସ୍ତ ଅଧିକାରୀ ସେଲ୍ଫ ଆଇସୋଲେସନରେ ରହିଛନ୍ତି ।
ସୂଚନା ମୁତାବକ ପ୍ରତିରକ୍ଷା ମନ୍ତ୍ରଣାଳୟର ପରିସରରେ ରହିଥିବା ନର୍ସରୀର ଜଣେ ଶିକ୍ଷକ ପଜିଟିଭ ଚିହ୍ନଟ ହେବା ପରେ ପରେ ଡେ-କେୟାର ସେଣ୍ଟରର 3 ବର୍ଷର ଶିଶୁ ପଜିଟିଭ ଚିହ୍ନଟ ହୋଇଥିଲା । ଶିଶୁଟିର ବାପା ମା’ ନେଗେଟିଭ ଚିହ୍ନଟ ହୋଇଥିବା ବେଳେ ପ୍ରାଥମିକ ସୁରକ୍ଷା ପଦକ୍ଷେପ ଭାବେ ଶିଶୁଟିର ପିତାଙ୍କ ସହକର୍ମୀଙ୍କୁ ଆଗାମୀ ଦୁଇ ସପ୍ତାହ ପାଇଁ ସେଲ୍ଫ ଆଇସୋଲେସନରେ ରହିବାକୁ ନିର୍ଦ୍ଦେଶ ଦିଆଯାଇଛି ।
ଏହି ଡେ-କେୟାର ସେଣ୍ଟରକୁ ବର୍ତ୍ତମାନ ବନ୍ଦ କରାଯାଇଛି । ସେପଟେ ଏଠାକୁ 214 ଶିଶୁ ଦୈନିକ ଆସିଥାଆନ୍ତି । ବର୍ତ୍ତମାନ ସମସ୍ତ ଶିଶୁ ଓ ସେମାନଙ୍କ ଅଭିଭାବକଙ୍କ ଟେଷ୍ଟିଂ ପ୍ରକ୍ରିୟା ଜାରି ରହିଛି । ସୋମବାର ସୁଦ୍ଧା ମୋଟ 58 ଜଣ ସେନା ଅଧିକାରୀ ପଜିଟିଭ ଚିହ୍ନଟ ହୋଇଥିବା ବେଳେ 54 ଜଣ ସମ୍ପୂର୍ଣ୍ଣ ସୁସ୍ଥ ହୋଇସାରିଛନ୍ତି ।
@IANS
