ବେଜିଂ: ଗତ ସପ୍ତାହରେ ଜଣେ ପରେ ଜଣେ କରି ବେଜିଂରେ ଚିହ୍ନଟ ହୋଇଥିଲେ 6 ଜଣ କୋରୋନା ଆକ୍ରାନ୍ତ । ସମସ୍ତ ଆକ୍ରାନ୍ତମାନେ ସ୍ଥାନୀୟ ଜିନଫାଦି ଫୁଡ ମାର୍କେଟକୁ ଯିବା ପରେ କୋରୋନାରେ ଆକ୍ରାନ୍ତ ହୋଇଥିବା ଜଣାପଡିଥିଲା । ଏହି ଖବର ପ୍ରକାଶ ପାଇବା ପରେ ସମ୍ପୃକ୍ତ ମାର୍କେଟ ନିକଟସ୍ଥ 11ଟି ଘରୋଇ କମ୍ପାଉଣ୍ଡରେ ସୋମବାର ଲକଡାଉନ ଘୋଷଣା କରାଯାଇଛି । ଏଥିସହ ନିକଟରେ ଏହି ମାର୍କେଟକୁ ଯାଇଥିବା ସମସ୍ତ ଲୋକେ ନିଜକୁ ଘରେ ଆଇସୋଲେଟ କରିବା ପାଇଁ ନିର୍ଦ୍ଦେଶ ଜାରି କରାଯାଇଛି ।
ସୂଚନା ମୁତାବକ ଶୁକ୍ରବାର ଏହି ସାମୂଦ୍ରିକ ଖାଦ୍ୟ ସାମଗ୍ରୀ ମିଳୁଥିବା ଫୁଡ ମାର୍କେଟକୁ ସିଲ କରାଯାଇ ଏଠାରେ କାର୍ଯ୍ୟରତ ସମସ୍ତ କର୍ମଚାରୀଙ୍କ ଟେଷ୍ଟିଂ ପାଇଁ ନିର୍ଦ୍ଦେଶ ଦିଆଯାଇଥିଲା । ତେବେ ଏହି ସଂକ୍ରମଣ ପଛରେ ଜିନ ସିକ୍ବେନ୍ସିଂ ଦାୟୀ ବୋଲି ସ୍ବାସ୍ଥ୍ୟକର୍ମୀମାନେ ମତ ଦେଇଛନ୍ତି । ସମାନ ଢଙ୍ଗରେ ୟୁରୋପରେ ପୁଣି କୋରୋନା ସଂକ୍ରମଣ ଆରମ୍ଭ ହୋଇଥିବାର ନଜିର ରହିଥିବା ମଧ୍ୟ ସେମାନ ଯୁକ୍ତି ବାଢିଥିଲେ । ତେବେ ଏଥିପାଇଁ ଲୋକଙ୍କ ଯାତାୟତ କି ଖାଦ୍ୟ ସାମଗ୍ରୀ ପରିବହନ ଦାୟୀ, ତାହା ଜଣା ପଡିପାରିନାହିଁ ।
ସୋମବାର ସୁଦ୍ଧା ଚୀନରେ ମୋଟ 49 ଆକ୍ରାନ୍ତ ଚିହ୍ନଟ ହୋଇଥିବା ଜଣା ପଡିଛନ୍ତି । ସେଥିରୁ ବେଜିଂରେ ପୁଣି କୋରୋନା ସଂକ୍ରମଣ ନିଜ ସ୍ଥିତି ସୁଦୃଢ କରିବାର ପ୍ରୟାସ ଆରମ୍ଭ କରିଥିବା ଦେଖିବାକୁ ମିଳିଛି । ବେଜିଂରେ ଏଯାବତ 36 ଜଣ ଆକ୍ରାନ୍ତ ଚିହ୍ନଟ ହୋଇସାରିଛନ୍ତି ଏବଂ ଆଶ୍ଚର୍ଯ୍ୟର କଥା କି ସମସ୍ତ ଆକ୍ରାନ୍ତ କେଉଁଠି ନା କେଉଁଠି ଜିନଫାଦି ଫୁଡ ମାର୍କେଟ ସହ ସମ୍ପୃକ୍ତ ଥିବା ମଧ୍ୟ ଜଣା ପଡିଛି । ଏହି ମାର୍କେଟରେ ମୁଖ୍ୟତଃ ସାମୂଦ୍ରିକ ଖାଦ୍ୟ ସାମଗ୍ରୀ ଓ ପନିପରିବା ମିଳିଥାଏ ।
ତେବେ ଦେଶରେ ଚିହ୍ନଟ ଅନ୍ୟ 13 ଆକ୍ରାନ୍ତମାନେ ବାହାର ଦେଶରୁ ଫେରିଥିବା ଜଣାପଡିଛି । ସେଥିମଧ୍ୟରୁ 3ଜଣ ହୁବେଇ ପ୍ରାନ୍ତର ହୋଇଥିବା ମଧ୍ୟ ଦେଖାଯାଇଛି । ଦେଶରେ କୋରୋନାର ଦ୍ବିତୀୟ ଲହରୀ ସହ ବର୍ତ୍ତମାନ ସୁଦ୍ଧା ଦେଶରେ ମୋଟ ଆକ୍ରାନ୍ତ ସଂଖ୍ୟା 83,181 ରହିଥିବା ବେଳେ ମୃତ୍ୟୁ ସଂଖ୍ୟା 4634ରେ ପହଞ୍ଚିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
