କାବୁଲ: ଆଫଗାନିସ୍ତାନରେ ତାଲିବାନ ବିରୋଧରେ ଯୁଦ୍ଧ ଏବେ ବି ଜାରି ରହିଛି । ଆଫଗାନିସ୍ତାନ ସେନା ହୁଏତ ଅନେକ କ୍ଷେତ୍ରରେ ଯୁଦ୍ଧ ନକରି ପରାଜୟକୁ ସ୍ବୀକାର କରିଥାଇପାରନ୍ତି, କିନ୍ତୁ ପଞ୍ଜଶୀରଙ୍କୁ କାବୁ କରିବା ତାଲିବାନ ପାଇଁ ଏବେ ସବୁଠାରୁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି । ଏହା ମଧ୍ୟରେ ପଞ୍ଜଶୀର ସଂଗ୍ରାମୀମାନେ ବହୁ ସଂଖ୍ୟାରେ ତାଲିବାନଙ୍କୁ ହତ୍ୟା କରିଥିବା ଦାବି କରିଛନ୍ତି। ତେବେ ଆଫଗାନିସ୍ତାନର ପଞ୍ଜଶୀରରେ ତାଲିବାନ ବିରୁଦ୍ଧରେ ତିଆରି ହେଉଥିବା ଗୋଷ୍ଠୀକୁ ଭାଙ୍ଗିବା ପାଇଁ ପ୍ରାୟ 3000 ଆତଙ୍କବାଦୀଙ୍କୁ ପଠାଇଥିଲା ତାଲିବାନ। ଫଳରେ ଉଭୟ ତାଲିବାନ ଏବଂ ପ୍ରତିରୋଧ ବାହିନୀ ମଧ୍ୟରେ ଗୁଳି ବିନିମୟ ହୋଇଥିଲା। ଏହି ଲଢେଇରେ 300 ତାଲିବାନୀ ମୃତ୍ୟୁବରଣ କରିଥିବା ପଞ୍ଜଶୀର ଦାବି କରିଛି।
ସୂଚନାନୁସାରେ, ତାଲିବାନର କାରୀ ଫସିହୁଦ ଦିନ୍ ହାଫିଜୁଲ୍ଲାଃଙ୍କ ନେତୃତ୍ବରେ ଶହ ଶହ ଆତଙ୍କବାଦୀଙ୍କୁ ପଞ୍ଜଶୀର ଆକ୍ରମଣ କରିବାକୁ ପଠାଇଥିଲା । କିନ୍ତୁ ଏପଟେ ବାଗଲାନ ପ୍ରଦେଶର ଅନ୍ଦରାବ ଘାଟିରେ ଅଙ୍କୁଶ ଲଗାଇ ବସିଥିବା ପଞ୍ଜଶୀରର ବିଦ୍ରୋହୀମାନେ ଆକ୍ରମଣ କରିଥିଲେ। ଏହି ଆକ୍ରମଣରେ ପ୍ରାୟ ୩୦୦ ତାଲିବାନୀଙ୍କ ମୃତ୍ୟୁ ହୋଇଛି । ଏହା ଦ୍ବାରା ତାଲିବାନର ଯୋଗାଣ ମାର୍ଗ ମଧ୍ୟ ବ୍ଲକ ହୋଇଯାଇଛି ।
ତାଲିବାନ ଆଫଗାନିସ୍ତାନକୁ କବଜା କରିବା ଦିନ ଠାରୁ ବିଦ୍ରୋହୀମାନେ ପଞ୍ଜଶୀର ଘାଟିରେ ଏକାଠି ହେବା ଆରମ୍ଭ କରି ଦେଇଥିଲେ। ପଞ୍ଜଶୀର ନେତା ଅହମ୍ମଦ ଶାହ ମାସୁଦଙ୍କ 32 ବର୍ଷିୟ ପୁଅ ଅହମ୍ମଦ ଶାହା ସ୍ପଷ୍ଟ କରିଛନ୍ତି ଯେ, ସେ ନିଜ ଅଧୀନରେ ଥିବା ଅଞ୍ଚଳଗୁଡ଼ିକୁ ତାଲିବାନକୁ ହସ୍ତାନ୍ତର କରିବେ ନାହିଁ। କୁହାଯାଉଛି ଯେ, ଏହି ଆକ୍ରମଣ ପରେ ତାଲିବାନ କ୍ରୋଧିତ ହୋଇ ପଞ୍ଜଶୀର ଆଡକୁ ଆହୁରି 100 ତାଲିବାନୀଙ୍କୁ ପଠାଇଛି। ସୂଚନାଯୋଗ୍ୟ, ଗତ କିଛି ଦିନ ହେବ ତାଲିବାନ ବିରୋଧରେ ପ୍ରଦର୍ଶନ କରାଯାଉଛି। ସାଧାରଣ ଲୋକ ବିନା କୌଣସି ଭୟରେ ତାଲିବାନ ଶାସନକୁ ବିରୋଧ କରୁଥିବା ଦେଖିବାକୁ ମିଳିଛି।
