ଲସ୍ ଏଞ୍ଜେଲେସ: ଲସ୍ ଏଞ୍ଜେଲେସର ଉତ୍ତରାଞ୍ଚଳରେ 53 କିଲୋମିଟର ଦୂରରେ ଥିବା ସାଣ୍ଟା କ୍ଲାରିଟାରେ ଜଙ୍ଗଲରେ ବ୍ୟାପି ଚାଲିଛି ନିଆଁ । ଦ୍ରୁତ ବେଗରେ ଏହି ନିଆଁ ବ୍ୟାପି ଚାଲିଥିବା ବେଳେ ଏହାର ପ୍ରକୋପ ଏତେ ଅଧିକ ରହିଛି କି ସାଧାରଣ ଲୋକେ ଏହାକୁ ସହ୍ୟ କରିପାରୁନାହାନ୍ତି । ଫଳରେ ଆଖପାଖର ଜନବସତି ଖାଲି କରାଯାଇ ସ୍ଥାନୀୟ ବାସିନ୍ଦାଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଏଥିସହ ଏହି ଜଙ୍ଗଲ ନିକଟରେ ଥିବା ଏକ ଫ୍ରି ୱେ ସମ୍ପୂର୍ଣ୍ଣ ବନ୍ଦ ହୋଇଯାଇଥିବା ଜଣା ପଡିଛି ।
ରବିବାର ଅପରାହ୍ନ 4ଟା ବେଳେ ସମ୍ପୃକ୍ତ ଜଙ୍ଗଲରେ ପ୍ରଥମେ ନିଆଁ ଲାଗିଥିବା ବେଳେ ଧିରେ ଧିରେ ଏହା ବ୍ୟାପିବା ଆରମ୍ଭ ହୋଇଥିଲା । ରବିବାର ରାତି ସୁଦ୍ଧା ପ୍ରାୟ 5 ଏକର ଜମିରେ ଜଙ୍ଗଲ ନଷ୍ଟ ହୋଇସାରିଥିଲା । ହେଲେ ଧିରେ ଧିରେ ନିଆଁ ବ୍ୟାପିବାରେ ଲାଗିଥିବାରୁ ବର୍ତ୍ତମାନ ସୁଦ୍ଧା ଏହାର ପ୍ରଭାବରେ ପ୍ରାୟ 1100 ଏକର ଜମିରେ ଗଛ ନଷ୍ଟ ହୋଇସାରିଛି । ଏହାର ମୁକାବିଲା ପାଇଁ ପ୍ରାୟ 300 ସୁରକ୍ଷାକର୍ମୀ ନିୟୋଜିତ ରହିଛନ୍ତି । ହେଲେ ନିଆଁ ଲିଭିବା ବଦଳରେ ବଢି ବଢି ଚାଲିଥିବାରୁ ଏହାକୁ ଆୟତ୍ତ କରିବା କଷ୍ଟକର ହୋଇ ପଡିଛି ।
ଜଙ୍ଗଲରେ ଲାଗିଥିବା ନିଆଁ ଲିଭାଇବା ପାଇଁ 12ରୁ ଉର୍ଦ୍ଧ୍ବ ଇଞ୍ଜିନ, 5ଟି ଟ୍ରକ, 5ଟି ପାଣି ସିଞ୍ଚନକାରୀ ହେଲିକପ୍ଟର ଓ 2ଟି ଫିକ୍ସ ୱିଙ୍ଗ ହେଲିକପ୍ଟର ନିୟୋଜିତ ରହିଛି । ଏନେଇ ଲସ୍ ଏଞ୍ଜେଲେସ ଅଗ୍ନିଶନ ବିଭାଗ ଇନସ୍ପେକ୍ଟର ସ୍କାଏ କର୍ଣ୍ଣେଲଙ୍କ କହିବା ଅନୁଯାୟୀ ଏହି ଜଙ୍ଗଲ ନିଆଁରେ ବର୍ତ୍ତମାନ ସୁଦ୍ଧା କୌଣସି ମୃତାହତ ସୂଚନା ରହିନଥିବା ବେଳେ କୌଣସି ସ୍ଥାନୀୟ ବାସିନ୍ଦାଙ୍କ ଘର ମଧ୍ୟ ପ୍ରଭାବିତ ହୋଇନାହିଁ ।
ତେବେ ସ୍ଥାନାନ୍ତର ହୋଇଥିବା ନାଗରିକମାନଙ୍କ ପାଇଁ ରେଡକ୍ରସ ଦ୍ବାରା ନିର୍ମିତ ଅସ୍ଥାୟୀ କ୍ୟାମ୍ପରେ ରହଣୀ ବ୍ୟବସ୍ଥା କରାଯାଇଛି । ସେପଟେ କୋରୋନା ସଂକ୍ରମଣକୁ ନଜରରେ ରଖି ଉଦ୍ଧାରକାରୀ ଦଳକୁ ମଧ୍ୟ ସାମାଜିକ ଦୂରତ୍ବ ବଜାୟ ରଖି ନିଜ ନିଜ ଗାଡିରେ ରହିବାକୁ ନିର୍ଦ୍ଦେଶ ଦିଆଯଆଇଛି ।
@IANS
