ୱାଶିଂଟନ: ଆମେରିକାରେ ଉଗ୍ର ରୂପ ଧାରଣ କରିଥିବା ଜାତିଆଣ ବିରୋଧୀ ଆନ୍ଦୋଳନରେ କେତେକ ଦୁର୍ବୃତ୍ତ ସାମିଲ ହୋଇ ଏହାର ମୂଳ ଉଦ୍ଦେଶ୍ୟରୁ ଲୋକଙ୍କୁ ବିଭ୍ରାନ୍ତ କରୁଥିବା ଦେଖାଯାଉଛି । ଫଳ ସ୍ବରୂପ ଆମେରିକା ସମେତ ଲଣ୍ଡନରେ ମଧ୍ୟ ଅନେକ ଜନନାୟକଙ୍କ ପ୍ରତିମୂର୍ତ୍ତିକୁ ଭାଙ୍ଗିବାକୁ ପଛାଇନାହାନ୍ତି ଏହି ଆନ୍ଦୋଳନକାରୀ । ତେବେ ଏନେଇ ହୋଇଥିବା ତଦନ୍ତରୁ ଜଣା ପଡିଛି କି ଆନ୍ଦୋଳନକାରୀଙ୍କ ମଧ୍ୟରେ କିଛି ଦୁର୍ବୃତ୍ତ ଏପରି ହିଂସାକାଣ୍ଡ ପାଇଁ ଲୋକଙ୍କୁ ଉସୁକାଉଛନ୍ତି ।
ଏଥିରେ ସୋସିଆଲ ମିଡିଆ ଏକ ଗୁରୁତ୍ବପୂର୍ଣ୍ଣ ଭୂମିକା ବହନ କରୁଥିବା ମଧ୍ୟ ଦେଖାଯାଇଛି । ତେବେ ଏହି ହିଂସାତ୍ମକ କାର୍ଯ୍ୟକଳାପରେ ରୋକ ଲଗାଇବା ପାଇଁ ଟ୍ରମ୍ପ ସରକାର ନେଇଛି ଏକ ଗୁରୁତ୍ବପୂର୍ଣ୍ଣ ପଦକ୍ଷେପ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏନେଇ ଗୁଗୁଲ, ଆପଲ, ଟ୍ବିଟର ଓ ଫେସବୁକରୁ ସମସ୍ତ ହିଂସାତ୍ମକ ଓ ଉତ୍ତେଜକ ପୋଷ୍ଟ ଡିଲିଟ୍ କରିବା ପାଇଁ ସମ୍ପୃକ୍ତ କମ୍ପାନୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଯଦି କୌଣସି ପୋଷ୍ଟ କର୍ଫ୍ୟୁ କୋହଳ ନେଇ ଦାବି କରୁଛି କିମ୍ବା ପ୍ରତିମୂର୍ତ୍ତି ଭାଙ୍ଗିବା ପାଇଁ ଉତ୍ତେଜନାତ୍ମକ ଟିପ୍ପଣୀ ଦେଇଛି, ତେବେ ସେପରି ପୋଷ୍ଟକୁ ତୁରନ୍ତି ଡିଲିଟ କରିବା ପାଇଁ ଟ୍ରମ୍ପ ନିର୍ଦ୍ଦେଶ ଦେଇଛନ୍ତି ।
ସୂଚନା ମୁତାବକ ଏହି ପଦକ୍ଷେପକୁ କଡାକଡି କରିବା ପାଇଁ ହୋମଲ୍ୟାଣ୍ଡ ସୁରକ୍ଷା ବିଭାଗ ସମସ୍ତ ଟେକ ଜାଏଣ୍ଟମାନଙ୍କୁ ଚିଠି ଲେଖି ଅବଗତ କରାଇଛି । ଏହି ଚିଠିରେ ଲେଖାଯାଇଛି କି ବିଗତ କିଛି ଦିନ ହେବ ଦେଶରେ ଜାରି ରହିଥିବା ବେଆଇନ କାର୍ଯ୍ୟାଳାପ ଯଥା ପ୍ରତିମୂର୍ତ୍ତି ଭାଙ୍ଗିବା, ସାମାଜିକ ଦୂରତା ନିୟମ ଭାଙ୍ଗି ଶହ ଶହ ଲୋକେ ଏକାଠି ହେବା, ଆନ୍ଦୋଳନାତ୍ମକ ପରିସ୍ଥିତି ସୃଷ୍ଟି କରିବା, ଲୁଟ ଓ ଅଗ୍ନିକାଣ୍ଡ ଆଦି ସ୍ଥିତି ସୃଷ୍ଟି କରିବା ପଛରେ ସୋସିଆଲ ମିଡିଆ ଅତି ଗୁରୁତ୍ବପୂର୍ଣ୍ଣ ଭୂମିକା ବହନ କରିଛି । ଏସମସ୍ତ କାର୍ଯ୍ୟକଳାପ ସଫଳ ହେବା ପଛରେ ମଧ୍ୟ ସୋସିଆଲ ମିଡିଆ ଦାୟୀ । ତେଣୁ ସମସ୍ତ କମ୍ପାନୀ ନିଜ ପ୍ଲାଟଫର୍ମ ଉପରେ କଡା ନଜର ରଖିବା ସହ ଏପ୍ରକାର କାର୍ଯ୍ୟକଳାପକୁ ରୋକିବା ଦିଗରେ କାର୍ଯ୍ୟାନୁଷ୍ଠାନ ନେବା ଉଚିତ୍ ।
ଶୁକ୍ରବାର ଦେଶର ସମସ୍ତ ପ୍ରତିମୂର୍ତ୍ତୀ ଓ କୀର୍ତ୍ତିରାଜିର ସୁରକ୍ଷା ପାଇଁ ରାଷ୍ଟ୍ରପତି ଡୋଲାନ୍ଡ ଟ୍ରମ୍ପ ଏକ କାର୍ଯ୍ୟନିର୍ବାହୀ ଆଦେଶ ଉପରେ ସ୍ବାକ୍ଷର କରିଛନ୍ତି । ଦେଶରେ କୃଷ୍ଣକାୟ ଆଫ୍ରିକାନ-ଆମେରିକୀୟ ଜର୍ଜ ଫ୍ଲଏଡଙ୍କ ପୋଲିସ ହେପାଜତରେ ମୃତ୍ୟୁ ପରେ ଲାଗି ରହିଥିବା ଉତ୍ତେଜନା ପାଇଁ ଅନେକ କୂଟନୀତିଜ୍ଞ ଟ୍ରମ୍ପଙ୍କୁ ଦାୟୀ କରିଥିଲେ । ପଦକ୍ଷେପ ସ୍ବରୂପ ଏହି କାର୍ଯ୍ୟକଳାପରେ ସମ୍ପୃକ୍ତଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ସହ ସୋସିଆଲ ମିଡିଆରେ ଏମାନଙ୍କ ଉପରେ ନଜର ରଖିବା ପାଇଁ ନିର୍ଦ୍ଦେଶ ଦେଇଛନ୍ତି ଟ୍ରମ୍ପ ।
@IANS
