ୱାଶିଂଟନ: ଗୋଟେ ପଟେ କୋରୋନା ଭାଇରସ ପୁରା ଦୁନିଆରେ ତାଣ୍ଡବ ରଚୁଥିବା ବେଳେ ଅନ୍ୟପଟେ ଭାଇରସର ସଂକ୍ରମଣରୁ ରକ୍ଷା ପାଇବା ପାଇଁ ଅନେକ ନିଆରା ଉପାୟ ମଧ୍ୟ ଦେଖିବାକୁ ମିଳୁଛି । ଏମିତି ଏକ ଦୃଶ୍ୟ ଆମେରିକାରେ ଦେଖିବାକୁ ମିଳିଛି ।
ଆମେରିକା ଓହିଓରେ କେଲ୍ସୀ କେର ନାମକ ଜଣେ ନର୍ସ ଡ୍ୟୁଟିରେ ନିୟୋଜିତ ଥିବା ହେତୁ 1 ମାସ ପର୍ଯ୍ୟନ୍ତ ଘରକୁ ଆସିପାରିନଥିଲେ । ହେଲେ କିଛି ଜରୁରୀ ଜିନିଷ ନେବା ପାଇଁ ସେ ତାଙ୍କ ଘରକୁ ଯାଇଥିଲେ । ସେଠାରେ ତାଙ୍କ ମାଆ ଦୂରରେ ଠିଆ ହୋଇ ତାଙ୍କୁ ବହୁତ ସମୟ ପର୍ଯ୍ୟନ୍ତ ଚାହିଁ ରହିଥିଲେ । ଆଉ ପରେ ନିଜକୁ ସମ୍ଭାଳି ନପାରି ଏକ ଚାଦର ଆଣି ତାଙ୍କୁ ସମ୍ପୂର୍ଣ୍ଣ ଭାବରେ ଢାଙ୍କି ଦେଇଥିଲେ । ଆଉ ତାଙ୍କୁ କୁଣ୍ଢାଇ ପକାଇଥିଲେ ।
ତେବେ ଏହି ବିଷୟରେ କେଲ୍ସୀଙ୍କ ମାଆ କହିଛନ୍ତି, ମୁଁ ଦେଖିଛି ସ୍ବାସ୍ଥ୍ୟକର୍ମୀମାନେ କେତେ କଷ୍ଟ କରୁଛନ୍ତି । ନିଜ ଜୀବନକୁ ବିପଦ ମୁହଁଠୁ ଠେଲି ଲୋକଙ୍କ ସେବା କରୁଛନ୍ତି । ଆଉ ଯେତେବେଳେ ମୁଁ ମୋ ଝିଅକୁ ଏତେ ଦିନ ପରେ ସାମନାରେ ଦେଖିଲି ନିଜକୁ ସମ୍ଭାଳି ପାରିଲି ନାହିଁ । ସେପଟେ ସୁରକ୍ଷାକୁ ଦୃଷ୍ଟିରେ ରଖି ତାକୁ ଚାଦରରେ ଘୋଢାଇ କୁଣ୍ଢାଇ ପକାଇଲି । ଚେଲ୍ସୀ ମଧ୍ୟ ଏହାକୁ ଏକ ଖାସ ଗିଫ୍ଟ ବୋଲି କହିଥିଲେ । ଏହା ମୋ ପାଇଁ ଏକ ସୁନ୍ଦର ଅନୁଭବ ବୋଲି ବ୍ୟାଖ୍ୟା କରିଥିଲେ ।
