ସାନ ଫ୍ରାନ୍ସିସ୍କୋ: ବର୍ତ୍ତମାନ ସମୟରେ ପ୍ରଚଳିତ ବର୍ଣ୍ଣ ବୈଷମ୍ୟ ବିରୋଧୀ ବିକ୍ଷୋଭରେ ନିଜ ସହକର୍ମୀଙ୍କ ଅସହଯୋଗ ନେଇ ଜଣେ ଫେସବୁକ କର୍ମଚାରୀ ଟ୍ବିଟରରେ ନିଜ ଭାବନା ପ୍ରକାଶ କରିଥିଲେ । କମ୍ପାନୀ ମଧ୍ୟରେ କେତେକ କର୍ମଚାରୀ ଏହି ଆନ୍ଦୋଳନକୁ ସମର୍ଥନ ଜଣାଉଥିବା ବେଳେ ଜନୈକ କର୍ମଚାରୀ ନିଜ ସହକର୍ମୀଙ୍କ ଅସହଯୋଗକୁ ନେଇ ଟ୍ବିଟ ଯୋଗେ ନିଜ ଭାବନା ପ୍ରକାଶ କରିଥିଲେ । ପରିଣାମ ସ୍ବରୂପ ସମ୍ପୃକ୍ତ କର୍ମଚାରୀଙ୍କୁ ନିଜ ଚାକିରୀରୁ ହାତ ଧୋଇବାକୁ ପଡିଛି ।
ସୂଚନା ଅନୁଯାୟୀ ଫେସବୁକରେ ଇଞ୍ଜିନିୟର ଭାବେ କାର୍ଯ୍ୟରତ ବ୍ରାଣ୍ଡନ ଡେଲ ନିଜ ସହକର୍ମୀଙ୍କୁ ଫେସବୁକ ଦ୍ବାରା ପରିଚାଳିତ ଏକ ଓପନ ସୋର୍ସ ୱେବପେଜରେ ପ୍ରଚଳିତ ଆନ୍ଦୋଳନକୁ ସମର୍ଥନ କରୁଥିବା ଲେଖିବାକୁ କହିଥିଲେ । ହେଲେ ସହକର୍ମୀ ଜଣଙ୍କ ଏହା ନକରିବାରୁ ବ୍ରାଣ୍ଡନ ଏନେଇ ଟ୍ବିଟରରେ ନିଜ ମତବ୍ୟକ୍ତ କରିଥିଲେ । ଟ୍ବିଟରେ ବ୍ରାଣ୍ଡନ ନିଜ ସହକର୍ମୀଙ୍କ ନାମ ଲେଖିବା ସହ କହିଥିଲେ କି ଜାଣିଶୁଣି ଚୁପ ରହିବା ରାଜନୀତିର ଚିହ୍ନ । ଏନେଇ ତାଙ୍କୁ ଚାକିରୀରୁ ବାହାର କରାଯାଇଥିବା ମଧ୍ୟ ବ୍ରାଣ୍ଡନ ଟ୍ବିଟରରେ କହିଥିଲେ ।
ତେବେ ଏହି ଖବରର ସତ୍ୟତା ପ୍ରକାଶ କରିବାକୁ ଯାଇ ଫେସବୁକ ସମ୍ପୃକ୍ତ ଘଟଣା ସତ ବୋଲି ପ୍ରକାଶ କରିଛି । ହେଲେ ଏହା ପଛରେ ପ୍ରକୃତ କାରଣ କହିବାକୁ ସିଧାସଳଖ ମନା କରିଛି କମ୍ପାନୀ । ସେପଟେ ପ୍ରଚଳିତ ଆନ୍ଦୋଳନରେ ଜ୍ୟୁକରବର୍ଗଙ୍କ ନିଷ୍କ୍ରିୟତାକୁ ନେଇ ମଧ୍ୟ ଅନେକ କର୍ମଚାରୀ ପ୍ରଶ୍ନବାଚୀ ସୃଷ୍ଟି କରିଥିବା ଜଣା ପଡିଛି ।
@IANS
