ୱାଶିଂଟନ: ଆମେରିକାରେ କୋରୋନାର ଭୟାବହତା ଜାଣି ବି ନିକଟରେ ଡୋନାଲ୍ଡ ଟ୍ରମ୍ପ ନିଜ ଦେଶବାସୀଙ୍କୁ ଆଶ୍ବସ୍ତ କରିଥିଲେ କି ସେଦିନ ଦୂର ନାହିଁ, ଯେବେ ଦେଶବାସୀ ଏହି ଯୁଦ୍ଧରେ ବିଜୟୀ ହେବେ । ଆଶାର ଆଲୋକ ଏବେ ବି ଉଦଜୀବିତ ରହିଛି । ହେଲେ ରାଷ୍ଟ୍ରପତିଙ୍କ ଅଭିଭାଷଣକୁ ସତେ ୟେମିତି କଟାକ୍ଷ କରୁଛି ଦେଶର ପରିସ୍ଥିତି । ବର୍ତ୍ତମାନ ଦେଶରେ ଆକ୍ରାନ୍ତ ସଂଖ୍ୟା 7 ଲକ୍ଷ ପାର କରିଥିବା ବେଳେ ମୃତ୍ୟୁ ସଂଖ୍ୟା 35 ହଜାର ପାର କରିଛି ।
ବିଶ୍ବ ଆର୍ଥିକ ରାଜଧାନୀ କୁହାଯାଉଥିବା ନ୍ୟୁୟର୍କରେ ବର୍ତ୍ତମାନ କୋରୋନା ମୃତ୍ୟୁର ତାଣ୍ଡବ ରଚୁଥିବା ବେଳେ କେବେ ଶୋଉ ନଥିବା ଏହି ସ୍ଥାନ ଏବେ ଯେମିତି ସ୍ତବ୍ଧ ହୋଇଯାଇଛି । କେବଳ ନ୍ୟୁୟର୍କରେ ବର୍ତ୍ତମାନ ସୁଦ୍ଧା 14 ହଜାର ଲୋକଙ୍କ ମୃତ୍ୟୁ ହୋଇଥିବା ବେଳେ 2ଲକ୍ଷରୁ ଉର୍ଦ୍ଧ୍ବ ଲୋକେ କୋରୋନା ପଜିଟିଭ ରହିଛନ୍ତି । ସେପଟେ ନିକଟରେ ଥିବା ନ୍ୟୁଜର୍ସିରେ 78 ହଜାର ଆକ୍ରାନ୍ତ ଥିବା ବେଳେ ମୃତ୍ୟୁ ସଂଖ୍ୟା 3800 ପାର କରିଛି ।
ଗୋଟିଏ ପଟେ ଦେଶର ଏପରି ପରିସ୍ଥିତି ରହିଥିବା ବେଳେ ଅନ୍ୟପଟେ ନିଜକୁ ସାଧୁବାଦ ଦେବାରୁ ପଛାଉ ନାହାନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ତାଙ୍କ କହିବା ଅନୁଯାୟୀ ତାଙ୍କ ପ୍ରଶାସନିକ ପଦକ୍ଷେପ ଯୋଗୁଁ ହିଁ ଦେଶରେ ଅବସ୍ଥା ଭଲ ରହିଛି । ନଚେତ୍ ଏହି ସଂକ୍ରମଣ ବର୍ତ୍ତମାନ ସୁଦ୍ଧ ପ୍ରଳୟଙ୍କରୀ ସାବ୍ୟସ୍ତ ହୋଇଥାଆନ୍ତା ।
