ହୋଷ୍ଟନ: ରାତାରାତି ଷ୍ଟାର ବନିଲେ 9 ବର୍ଷୀୟ ବାଳକ ସାତ୍ତ୍ବିକ ହିଗେଡେ । ମୋଦି ଓ ଟ୍ରମ୍ପଙ୍କ ସହ ସେଲଫି ନେଇ ଚର୍ଚ୍ଚାରେ ସାତ୍ତ୍ବିକ ।
ଆମେରିକାର ହୋଷ୍ଟନରେ ଗତାକାଲି(ରବିବାର) 'ହାଓଡି ମୋଦି' କାର୍ଯ୍ୟକ୍ରମ ଆୟୋଜିତ କରାଯାଇଥିଲା । ଏହି କାର୍ଯ୍ୟକ୍ରମରେ ହଜାର ସଂଖ୍ୟକ ଭାରତୀୟ ଏବଂ ଆମେରିକାବାସୀ ଯୋଗ ଦେଇଥିଲେ । ତେବେ ଏହି କାର୍ଯ୍ୟକ୍ରମରେ କିଛି ଏପରି ଲୋକ ମଧ୍ୟ ସାମିଲ ଥିଲେ ଯେଉଁମାନେ ରାତାରାତି ଷ୍ଟାର ହୋଇଥିଲେ । ଆଉ ସେମିତି ଏକ ଶିଶୁ ହେଉଛି ସାତ୍ତ୍ବିକ ହିଗେଡେ । 9 ବର୍ଷୀୟ ଏହି ବାଳକ ଆମେରିକା ରାଷ୍ଟ୍ରପତି ଡନାଲ୍ଡ ଟ୍ରମ୍ପ ଏବଂ ପ୍ରଧାନମନ୍ତ୍ରୀ ମୋଦିଙ୍କ ସହ ସେଲଫି ନେଇ ଚର୍ଚ୍ଚାକୁ ଆସିଛନ୍ତି ।
ଏନଆରଜି ଷ୍ଟାଡିୟମରେ ଆୟୋଜିତ ହୋଇଥିବା 'ହାଓଡି ମୋଦି' କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଏବଂ ଆମେରିକା ରାଷ୍ଟ୍ରପତି ଯୋଗ ଦେଇ ଲୋକଙ୍କୁ ସମ୍ବୋନ୍ଧିତ କରିଥିଲେ । ଏହି ଅବସରରେ ଅନେକ ରଙ୍ଗାରଙ୍ଗ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥିଲା ।
ତେବେ ଷ୍ଟାଡିୟମର ମୁଖ୍ୟ ମଞ୍ଚରେ ପାରମ୍ପରିକ ପୋଷାକ ପିନ୍ଧିଥିବା କିଛି ଶିଶୁ ମୋଦି-ଟ୍ରମ୍ପଙ୍କ ସ୍ବାଗତ କରିଥିଲେ । ଏହାପରେ ସେମାନଙ୍କ ମଧ୍ୟରୁ ଧଳା ରଙ୍ଗର ପୋଷାକ ପରିଧାନ କରିଥିବା ଜଣେ ବାଳକ(ସାତ୍ତ୍ବିକ ହିଗେଡେ) ଆସି ମୋଦି-ଟ୍ରମ୍ପଙ୍କ ସହ ସେଲଫି ନେବାକୁ ଇଚ୍ଛା ପ୍ରକାଶ କରିଥିଲେ । ସେହି ସମୟରେ ମୋଦି କିଛି ଦୂର ଅତିକ୍ରମ କରିଯାଇଥିଲେ ମଧ୍ୟ ପଛକୁ ଫେରି ସାତ୍ତ୍ବିକଙ୍କ ସହ ସେଲଫି ନେଇଥିଲେ । ଏହାପରେ ସାତ୍ତ୍ବିକ ମୋଦିଙ୍କ ସହ ହାତ ମିଳାଇଥିଲେ । ଯାହାପରେ ମୋଦି ସାତ୍ତ୍ବିକଙ୍କ ପିଠି ଥାପୁଡାଇବାର ଦୃଶ୍ୟ ଦେଖିବାକୁ ମିଳିଥିଲା ।
