ଓସାକା: ଜାପାନରେ ଚାଲିଥିବା ଜି20 ଶିଖର ସମ୍ମିଳନୀରେ ମୋଦି ବିଶ୍ବର ହେଭିୱେଟ ନେତାଙ୍କୁ ଭେଟୁଛନ୍ତି । ଏହି ଅବସରରେ ସେମାନଙ୍କ ସହିତ ମୋଦିଙ୍କ ବନ୍ଧୁତ୍ବର ବିଭିନ୍ନ ଝଲକ ଦେଖିବାକୁ ମିଳୁଛି । ନିକଟରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନଙ୍କ ସହ ଭାରତର ପ୍ରଧାନମନ୍ତ୍ରୀଙ୍କୁ ଏକ ସେଲ୍ଫି ଭାଇରାଲ ହୋଇଛି ।
ଅଷ୍ଟ୍ରେଲିଆର ନବନିର୍ବାଚିତ ପ୍ରଧାନମନ୍ତ୍ରୀ ସ୍କଟ ମୋରିସନଙ୍କୁ ଶନିବାର ମୋଦି ଭେଟି ଦ୍ବିପାକ୍ଷିକ ସମ୍ପର୍କ ବିଷୟରେ ଆଲୋଚନା କରିଥିଲେ । ଏହି ସମୟରେ ମରିସନ ମୋଦିଙ୍କ ସହ ଏକ ସେଲ୍ଫି ନେଇଥିଲେ । ଏହାକୁ ସେ ନିଜ ଟ୍ବିଟର ଆକାଉଣ୍ଟରେ ପୋଷ୍ଟ କରି ମୋଦିଙ୍କୁ ନିଜ ପ୍ରକୃତ ବନ୍ଧୁ ବୋଲି ସମ୍ବୋଧନ କରିଥିଲେ ।
ମୋଦିଙ୍କ ସହ ତାଙ୍କ ବନ୍ଧୁତ୍ବ ବିଷୟରେ ବର୍ଣ୍ଣନା କରିବାକୁ ଯାଇ ସେ 2 ଲାଇନରେ ଏକ ହିନ୍ଦୀ କ୍ୟାପସନ ମଧ୍ୟ ଦେଇଥିଲେ । ଏଥିରେ ସେ ଲେଖିଥିଲେ ‘କିତନା ଆଚ୍ଛେ ହେ ମୋଦି’ । ଅର୍ଥାତ ମୋଦି ଜଣେ ଉତ୍ତମ ବ୍ୟକ୍ତିତ୍ବ । ଏହି ଫଟୋରେ ଉଭୟ ହସହସ ମୁହଁରେ ପୋଜ ଦେଇଥିବା ଦେଖିବାକୁ ମିଳିଛି । ନିଜର ବ୍ୟସ୍ତବହୁଳ କାର୍ଯ୍ୟସୂଚୀ ମଧ୍ୟରୁ ସମୟ ବାହାର କରି ବିଶ୍ବର 2 ରାଷ୍ଟ୍ରମୁଖ୍ୟ କିଛି ମଜାଦାର ମୂହୁର୍ତ୍ତ ବିତାଇଛନ୍ତି ।
ଉଲ୍ଲେଖଯୋଗ୍ୟ ଯେ ଶନିବାର ଦିନ ପ୍ରଧାନମନ୍ତ୍ରୀ ମୋଦି ଅଷ୍ଟ୍ରେଲିଆ ପ୍ରଧାନମନ୍ତ୍ରୀଙ୍କ ଛଡା ଇଣ୍ଡୋନେସିଆ ଓ ବ୍ରାଜିଲର ରାଷ୍ଟ୍ରପତିଙ୍କୁ ମଧ୍ୟ ଭେଟିଛନ୍ତି । ଏହାପରେ ସେ ତୁର୍କୀ ନେତାଙ୍କୁ ମଧ୍ୟ ଭେଟିଛନ୍ତି । ଏହି ଅବସରରେ ସେ ଦ୍ବିପାକ୍ଷିକ ସମ୍ପର୍କ ଏବଂ ବାଣିଜ୍ୟ ଓ ବିନିଯୋଗ କ୍ଷେତ୍ରରେ ସହଯୋଗ ବୃଦ୍ଧି କଥା ଆଲୋଚନା କରିଛନ୍ତି ।
