ୱାଶିଂଟନ: ଗୋଟିଏପଟେ କୋରୋନା ମାଡରେ ଆମେରିକାର ସ୍ଥିତି ବେହାଲ ହୋଇପଡିଥିବା ବେଳେ ଅନ୍ୟପଟେ ମାଡି ଆସିଛି ଘୂର୍ଣ୍ଣିଝଡ କ୍ରିଷ୍ଟୋବାଲ । ସୋମବାର ଏହି ଘୂର୍ଣ୍ଣିଝଡ ଆମେରିକାର ଲୁସିଆନାରେ ଲ୍ୟାଣ୍ଡଫଲ କରିଥିବା ବେଳେ ଏହାର ପ୍ରଭାବରେ ସ୍ଥାନୀୟ ଅଞ୍ଚଳରେ ଘଣ୍ଟାପ୍ରତି 50ମାଇଲ ବେଗରେ ପବନ ବୋହୁଥିବା ଦେଖିବାକୁ ମିଳିଥିଲା । ଏନେଇ ଆମେରିକାକୁ ପ୍ରତି ମିନିଟର ସୂଚନା ସହ ଆଗୁଆ ଚେତାଇ ଦେଇଥିଲା ଜାତୀୟ ହରିକେନ ସେଣ୍ଟର(ଏନଏଚସି) ।
କ୍ରିଷ୍ଟୋବାଲ ନିଜ ଗତିପଥରେ ଆସିଥିବା ସମସ୍ତ ଅଞ୍ଚଳରେ ବିପୁଳ କ୍ଷଯକ୍ଷତି କରିଥିବା ବେଳେ ସୋମବାର ଅପରାହ୍ନରେ ଏହା ଆମେରିକାରେ ଲ୍ୟାଣ୍ଡଫଲ କରିଥିଲା । ଏହାର ପ୍ରଭାବରେ ସେଣ୍ଟ୍ରାଲ ଆମେରିକା ଓ ମେକ୍ସିକୋରେ ବ୍ୟାପକ କ୍ଷତି ପହଞ୍ଚିଥିବା ସହ ଅନେକ ଲୋକଙ୍କ ପ୍ରାଣହାନୀ ହୋଇଥିବା ଜଣାପଡିଛି । ସେପଟେ ବର୍ତ୍ତମାନ ଏହି ଘୂର୍ଣ୍ଣିଝଡ ଆମେରିକାର ଗଲ୍ଫ ପୋଷ୍ଟରେ ଭୟରେ ବାତାବରଣ ସୃଷ୍ଟି କରିଛି । ମୁଖ୍ୟତଃ ଲୁସିଆନା, ମିସିସିପି, ଅଲବାମା ଓ ଫ୍ଲୋରିଡାର ଏହାର ବିଶେଷ ପ୍ରଭାବ ପଡିବା ଆକଳନ କରାଯାଇଛି ।
କ୍ରିଷ୍ଟୋବାଲ ଏତେ ଶକ୍ତିଶାଳୀ ରହିଥିଲା କି ଏହାର ପ୍ରଭାବରେ ସମ୍ପୃକ୍ତ ଅଞ୍ଚଳଗୁଡିକରେ ପ୍ରବଳରୁ ଅତି ପ୍ରବଳ ପବନ ଓ ବର୍ଷା ହୋଇଥିଲା । ରବିବାର ସୁଦ୍ଧା ଏହାକୁ ସାମାନ୍ୟ ଘୂର୍ଣ୍ଣିଝଡ ବୋଲି ଆକଳନ କରାଯାଉଥିବା ବେଳେ ସୋମବାର ଏହା ହରିକେନରେ ରୂପ ଧାରଣ କରିଥିଲା ବୋଲି ଏନଏଚସି ସୂଚନା ଦେଇଛି । ରବିବାର ରାତିରୁ ହିଁ କ୍ରିଷ୍ଟୋବାଲର ପ୍ରଭାବରେ ବର୍ଷା ଜାରି ରହିଥିବାରୁ ଅନେକ ଘରେ ଏବେ ବି ବିଜୁଳି ସରବରାହ ବିଚ୍ଛିନ୍ନ ହୋଇଛି । ଏଥିସହ ରାସ୍ତାଘାଟରେ କୁଢକୁଢ ଗଛର ଭଙ୍ଗା ଡାଳ ଓ ଗଣ୍ଡି ପଡିରହିଥିବାରୁ ରାସ୍ତା ଅବରୋଧ ହୋଇଛି ।
ତେବେ କ୍ରିଷ୍ଟୋବାଲ ଏକ ଟ୍ରପିକାଲ ଷ୍ଟର୍ମ ହୋଇଥିବା ବେଳେ ଏନଏଚସି ସୂଚନା ମୁତାବକ ସତର୍କ ସୂଚନାର 24 ଘଣ୍ଟା ମଧ୍ୟରେ ଟ୍ରପିକାଲ ଷ୍ଟର୍ମର ପ୍ରଭାବ ନିର୍ଦ୍ଧାରିତ ଅଞ୍ଚଳରେ ଦେଖାଯାଇଥାଏ । କିନ୍ତୁ ଏହି ଷ୍ଟର୍ମ ବା ବାତ୍ୟା ଯଦି ଅଚାନକ ଭୟଙ୍କର ରୂପ ଧାରଣ କରେ ତେବେ ଏହା ଜୀବନ ପ୍ରତି ବିପଦ ବୋଲି ଆକଳନ କରାଯାଏ ।
@IANS
