ୱାଶିଂଟନ: କୋରୋନାର ପ୍ରକୋପ କେତେ ଭୟଙ୍କର ହୋଇପାରେ ତାହା ଚୀନ, ଇଟାଲୀ ଓ ସ୍ପେନଠାରୁ ବିଶ୍ବ ଦେଖିସାରିଥିବା ବେଳେ ଏବେ ଏହି ତାଲିକାରେ ସାମିଲ ହୋଇଛି ଆମେରିକା । ଗତ 24 ଘଣ୍ଟାରେ କୋରୋନା ଯୋଗୁଁ ଏଠାରେ ଗଡିଛି 2ହଜାରରୁ ଉର୍ଦ୍ଧ୍ବ ମୁଣ୍ଡ । ଯାହା ବର୍ତ୍ତମାନ ସୁଦ୍ଧା ବିଶ୍ବରେ ପ୍ରଥମ ବୋଲି ଆକଳନ କରାଯାଇଛି ।
ଏବେ ସୁଦ୍ଧା ଆମେରିକାରେ 18,883 ଲୋକଙ୍କର କୋରୋନାରେ ମୃତ୍ୟୁ ହୋଇସାରିଥିବା ବେଳେ ଆକ୍ରାନ୍ତ ରହିଛନ୍ତି ଲକ୍ଷାଧିକ । ସେପଟେ କେବଳ ନ୍ୟୁୟର୍କରେ ଅଧାରୁ ଅଧିକ ସଂଖ୍ୟା ଅର୍ଥାତ 7844ଜଣ ଲୋକଙ୍କ ମୃତ୍ୟୁ ହୋଇଥିବା ଜଣାପଡିଛି । ଏହି ସଂଖ୍ୟାଟି ଦେଖି କିଛି ଏକ୍ଟପର୍ଟ ମତ ଦେଇଛନ୍ତି କି ଦୈନିକ ମୃତ୍ୟୁ ସଂଖ୍ୟାର ଏକ ସୀମା ଆକଳନ କରାଯାଇଛି । ଯାହାର ଆମେରିକା ଅତି ନିକଟତର ହୋଇସାରିଛି ।
ସେପଟେ ମୁରେସ ମଡେଲ ପ୍ରୋଜେକ୍ଟର ଆକଳନ ଅନୁଯାୟୀ ଯଦି ମାସ ଶେଷ ସୁଦ୍ଧା ଦେଶରେ କୋରୋନା ପରିସ୍ଥିତିରେ ସୁଧାର ନ ଆସେ ତେବେ ଆଗାମୀ ଅଗଷ୍ଟ ମାସ ସୁଦ୍ଧା ଦେଶରେ 61,500 ଲୋକେ ମୃତ୍ୟୁ ମୁଖରେ ପଡିବେ । ଏନେଇ ଦେଶବାସୀଙ୍କୁ ସାମାଜିକ ଦୂରତ୍ବକୁ ଅତି ଗମ୍ଭୀରତାର ସହ ପାଳନ କରିବାର ଆବଶ୍ୟକତା ରହିଛି ବୋଲି ମଧ୍ୟ ମତ ପ୍ରକାଶ ପାଇଛି ।
