ଚଣ୍ଡିଗଡ: ସମଝୌତା ଏକ୍ସପ୍ରେସ ମାମଲାର ଆଜି ଶୁଣାଣି କରିବେ ସ୍ୱତନ୍ତ୍ର ଏନଆଇଏ କୋର୍ଟ । ଗତ ବୁଧବାର ଦିନ କୋର୍ଟ ଏହି ମାମଲାର ଶୁଣାଣି କରି ରାୟ ସଂରକ୍ଷିତ ରଖିଥିଲେ । ଏହି ମାମଲାରେ ଗତ 2011ରେ ଦାଖଲ ହୋଇଥିଲା ଚାର୍ଜସିଟ । 12 ବର୍ଷ ପୂର୍ବେ ଘଟିଥିବା ଏହି ଛାତିଥରା କାହାଣୀ ପୁଣିଥରେ ଖୋଲିବାକୁ ଯାଉଛି ।
ଦିଲ୍ଲୀରୁ ଲାହୋର ଯାଉଥିବା ସମଝୌତା ଏକ୍ସପ୍ରେସରେ ହୋଇଥିଲା ଆଇଡି ବ୍ଲାଷ୍ଟ । ଅଘଟଣରେ 43 ଜଣ ପାକିସ୍ତାନୀ, 10 ଭାରତୀୟ ଓ 15 ଜଣ ଅନ୍ୟାନ୍ୟ ପ୍ରାଣ ହରାଇଥିଲେ । 68 ମୃତକଙ୍କ ମଧ୍ୟରେ 64ଜଣ ସାଧାରଣ ନାଗରିକ ଥିବାବେଳେ 4 ରେଳ ଅଧିକାରୀ ଜୀବନ୍ତ ଦଗ୍ଧ ହୋଇ ଯାଇଥିଲେ । ଏହି ମାମଲାର ପ୍ରାରମ୍ଭିକ ତଦନ୍ତ ହରିୟାଣା ପୋଲିସ କରିଥିଲା । କିନ୍ତୁ ଗତ 2010ରେ ଉକ୍ତ ମାମଲା ଏନଆଇଏକୁ ହସ୍ତାନ୍ତର କରାଯାଇଥିଲା ।
ଏହି ନରସଂହାର ପାଇଁ 4ଟି ଆଇଡି ବ୍ୟବହାର ହୋଇଥିବା ବେଳେ ଘଟଣାସ୍ଥଳରୁ ଜବତ ହୋଇଥିଲା 2ଟି ଅଫୁଟା ଆଇଡି । ମାମଲାରେ ଆଠ ଜଣ ଅଭିଯୁକ୍ତ ଥିବାବେଳେ ଚାରିଜଣ ଶୁଣାଣିରେ ହାଜର ହୋଇଥିଲେ ।
