ହାଇଦ୍ରାବାଦ: ବଲିଉଡ ଅଭିନେତ୍ରୀ କଙ୍ଗନା ରାଣାୱତ ଫିଲ୍ମ ତେଜସ ଅକ୍ଟୋବର ୨୭ରେ ରିଲିଜ ହେବ । ଯାହାକୁ ନେଇ ସେ ଆଜିକାଲି ପ୍ରମୋସନରେ ବ୍ୟସ୍ତ ଅଛନ୍ତି । ଏହାରି ମଧ୍ୟରେ କଙ୍ଗନା ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କୁ ଭେଟିଛନ୍ତି । କଙ୍ଗନା ବିମାନରେ ମୁମ୍ବାଇରୁ ଦିଲ୍ଲୀ ଯାଉଥିବା ସମୟରେ ଅଜିତ ଡୋଭାଲଙ୍କୁ ଭେଟିଛନ୍ତି । ଯାହାର ଫଟୋ ସେ ସୋସିଆଲ ମିଡିଆରେ ସେୟାର କରିଛନ୍ତି ।
ମଙ୍ଗଳବାର କଙ୍ଗନା ନିଜ ଇନଷ୍ଟାଗ୍ରାମ ଷ୍ଟୋରୀରେ କଙ୍ଗନା ଅଜିତ ଡୋଭାଲଙ୍କ ସହ କିଛି ଫଟୋ ସେୟାର କରିଛନ୍ତି । ଏବଂ କ୍ୟାପସନରେ ଲେଖିଛନ୍ତି, ''ସୌଭାଗ୍ୟବଶତଃ ଆଜି ସକାଳେ ବିମାନରେ ମୁଁ ଅଲ ଟାଇମ୍ ଗ୍ରେଟ ଶ୍ରୀ ଅଜିତ ଡୋଭାଲଙ୍କ ସହ ଭେଟିଥିଲି । ତେଜସର ପ୍ରଚାର ଅବସରରେ ମୋତେ ତାଙ୍କୁ ଭେଟିବାର ସୁଯୋଗ ମିଳିଲା । ଯିଏ ସମସ୍ତ ସୈନିକଙ୍କ ପ୍ରେରଣା ଅଟନ୍ତି । ମୁଁ ଏହାକୁ ବଡ ଉପହାର(ସଗୁନ) ମାନୁଛି । ଜୟ ହିନ୍ଦ ।''
କିଛି ଦିନ ପୂର୍ବରୁ କଙ୍ଗନା ଦିଲ୍ଲୀର ଭାରତୀୟ ବାୟୁସେନା ଅଡିଟୋରିୟମରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ବହୁ ଭାରତୀୟ ବାୟୁସେନା ଅଧିକାରୀଙ୍କ ପାଇଁ ତେଜସର ଏକ ସ୍ୱତନ୍ତ୍ର ସ୍କ୍ରିନିଂ ଆୟୋଜନ କରିଥିଲେ । କଙ୍ଗନା ତାଙ୍କ ଇନଷ୍ଟାଗ୍ରାମରେ ଚଳଚ୍ଚିତ୍ରର ସ୍ୱତନ୍ତ୍ର ସ୍କ୍ରିନିଂରୁ ଅନେକ ଫଟୋ ସେୟାର କରିଥିଲେ । ସେ ଏକ କ୍ୟାପସନରେ ଲେଖିଥିଲେ, "ଟିମ୍ ତେଜସ୍ ଆଜି ସନ୍ଧ୍ୟାରେ ଭାରତୀୟ ବାୟୁସେନା ଅଡିଟୋରିୟମ୍ ରେ ସମ୍ମାନିତ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଜୀ ଏବଂ ଭାରତୀୟ ବାୟୁସେନାର ବହୁ ମାନ୍ୟଗଣ୍ୟ ବ୍ୟକ୍ତିଙ୍କ ପାଇଁ ଏକ ସ୍ୱତନ୍ତ୍ର ସ୍କ୍ରିନିଂ କରିଥିଲେ।"
ଏହା ମଧ୍ୟ ପଢନ୍ତୁ: ଦିଲ୍ଲୀର ଲବ କୁଶ ରାମଲୀଳାରେ ସାମିଲ ହେବେ କଙ୍ଗନା, ପ୍ରଥମ ଅଭିନେତ୍ରୀ ଭାବେ କରିବେ ରାବଣ ଦହନ
କଙ୍ଗନା ରାଣାୱତଙ୍କ ଫିଲ୍ମ ତେଜସ୍ ଭାରତୀୟ ବାୟୁସେନା (IAF) ପାଇଲଟ୍ ତେଜସ୍ ଗିଲଙ୍କ ଜୀବନୀ ଯାତ୍ରା ଉପରେ ନିର୍ମିତ ହୋଇଛି । ଯିଏ ଦେଶ ସେବା କରିବାରେ କୌଣସି ଅବସରକୁ ହାତଛଡା କରିନାହାନ୍ତି । ଏହି ଫିଲ୍ମରେ କଙ୍ଗନା ତେଜସ ଗିଲଙ୍କ ଭୂମିକାରେ ବାୟୁସେନା ପାଇଲଟ ଅବତାରରେ ନଜର ଆସିବେ । ଏହି ଫିଲ୍ମ ଆରଏସଭିପି ଦ୍ୱାରା ପ୍ରସ୍ତୁତ କରାଯାଇଛି। ସର୍ଭେଶ ମେଭଡାଙ୍କ ଦ୍ୱାରା ଲିଖିତ ତଥା ନିର୍ଦ୍ଦେଶିତ ଏବଂ ରୋନି ସ୍କ୍ରୁଭାଲାଙ୍କ ଦ୍ୱାରା ନିର୍ମିତ । ଏହି ଚଳଚ୍ଚିତ୍ରଟି ଅକ୍ଟୋବର 27, 2023 ରେ ରିଲିଜ ହେବ । ଏହା ପରେ କଙ୍ଗନାଙ୍କୁ ଫିଲ୍ମ ‘ଏମରଜେନ୍ସି’ ରେ ମଧ୍ୟ ଦେଖିବାକୁ ମିଳିବ । ଏହି ଫିଲ୍ମ ବି ଚଳିତ ବର୍ଷ ମୁକ୍ତିଲାଭ କରିବାକୁ ଯାଉଛି ।
