ମୁମ୍ବାଇ: ବି ଟାଉନର ଭାଇଜାନ ଭାବେ ପରିଚିତ ସଲମାନ ଖାନ । ତାଙ୍କୁ ଛୋଟ ଛୁଆ ପସନ୍ଦ ଏକଥା ପ୍ରାୟ ସମସ୍ତେ ଜାଣିଛନ୍ତି । ତେଣୁ ସେ ଅଧିକ ସମୟ ନିଜର ଭଣଜା ଭାଣିଜୀଙ୍କ ସହ ବିତାଇଥାନ୍ତି । ଏହାରି ଭିତରେ ସଲମାନଖାନଙ୍କୁ ନେଇ ଏକ ଖୁସି ଖବର ସାମ୍ନାକୁ ଆସିଛି । ସେ ନିଜର ଏକ ଛୁଆ କରିବାକୁ ଇଚ୍ଛା ପ୍ରକାଶ କରିଥିବା କହିଛନ୍ତି ।
ନିକଟରେ ଏକ ରିଆଲିଟି ସୋ ‘ଆପ କି ଅଦାଲତ’ରେ ଯୋଗଦେଇଥିଲେ ସୁପରଷ୍ଟାର ସଲମାନ ଖାନ । ସେହି ସମୟରେ ତାଙ୍କୁ ବାହାଘର ବିଷୟରେ ପ୍ରଶ୍ନ କରାଯାଇଥିଲା । ସେ କହିଥିଲେ, "ମୋର ଏମିତି କିଛି ଯୋଜନା ରହିଥିଲା । ଏହା ବୋହୂ ପାଇଁ ନୁହେଁ ବରଂ ଏକ ଛୁଆ ପାଇଁ ଥିଲା । କିନ୍ତୁ ଭାରତୀୟ ନିୟମ ଅନୁସାରେ ଏହା ସମ୍ଭବ ନହେଁ । ଏବେ ମୋତେ ଦେଖିବାକୁ ପଡିବ କଣ କରିବାକୁ ହେବ, କେମିତି କରିବାକୁ ହେବ । ଭବିଷ୍ୟତରେ ମୋତେ ଗର୍ଲଫ୍ରେଣ୍ଡ ନୁହେଁ ବରଂ ଜଣେ ସ୍ତ୍ରୀ ଦରକାର ।"
ଭାଇଜାନ ନିଜ ଭଣଜା ଆହିଲ ଶର୍ମାଙ୍କ ସହ ଅଧିକ ସମୟ ବିତାଉଥିବା ନଜରକୁ ଆସୁଛନ୍ତି । ଏହାସହ ଯେଉଁଠାରେ ବି ଏକ ଛୋଟ ପିଲା ଦେଖନ୍ତି, କୋଳେଇ ନିଅନ୍ତି ସଲମାନ । ସଲମାନଙ୍କ ସହ ଛୋଟ ଛୁଆଙ୍କ ଭାବାବେଗ ଜଡିତ । ଦିନେ ସଲମାନ ଖାନ ବିବାହକୁ ନେଇ କରନ ଜୋହରଙ୍କୁ ପ୍ରଶ୍ନ କରିଥିଲେ । ହେଲେ ସେ ଏବେ ଦୁଇଟି ସନ୍ତାନର ପିତା । ଏହି ପ୍ରଶ୍ନର ଉତ୍ତରରେ ସଲମାନ କହିଛନ୍ତି,"ମୁଁ ବି ଏହା କରିବା ପାଇଁ ଚେଷ୍ଟା କରୁଥିଲି । କିନ୍ତୁ ଏବେ ନିୟମ ପରିବର୍ତ୍ତନ ହୋଇଯାଇଛି । ଦେଖାଯାଉ କଣ ହେଉଛି । ମୋତେ ଛୋଟ ଛୁଆ ଭାରି ଭଲ ଲାଗନ୍ତି । ଆମ ପାଖରେ ପୁରା ଜିଲ୍ଲା, ପୁରା ଗାଁ ରହିଛି । କିନ୍ତୁ ମୋ ଛୁଆର ମାଆ ମୋ ସ୍ତ୍ରୀ ହିଁ ହେବ ।"
ବଲିଉଡର ଭାଇଜାନ ସଲମାନ ଖାନ ଗତ ଏପ୍ରିଲ 21 ଇଦ୍ ଅବସରରେ ତାଙ୍କ ଫ୍ୟାନ୍ସଙ୍କୁ ଭେଟି ଦେଇଥିଲେ । ସେହି ଦିନ ରିଲିଜ ହୋଇଥିଲା କିସି କା ଭାଇ କିସି କା ଜାନ । ଫିଲ୍ମ ରିଲିଜର 6 ଦିନରେ 90 କୋଟି ଆୟ କରିପାରିଛି । ଦୀର୍ଘ 4 ବର୍ଷ ପରେ ସଲମାନଙ୍କ ଅଭିନୀତ ସିନେମା ପ୍ରେକ୍ଷାଳୟକୁ ଆସିଛି । ଫରହାଦ୍ ସାମଜୀ ଏହି ସିନେମାର ନିର୍ଦ୍ଦେଶନା କରିଥିବା ବେଳେ ଏଥିରେ ଅନେକ ନବାଗତ ଅଭିନୟ କରିଛନ୍ତି । ସାଉଥ୍ ଷ୍ଟାର୍ ପୂଜା ହେଗ୍ଡେ ଏଥିରେ ମୁଖ୍ୟ ଚରିତ୍ରରେ ନଜର ଆସିଛନ୍ତି । ଏହାପରେ ପ୍ରଶଂସକଙ୍କୁ ଆଉ ଏକ ଫିଲ୍ମ ଭେଟି ଦେବେ ସଲମାନ ଖାନ । ଦୀପାବଳିରେ କାଟ୍ରିନା କୈଫଙ୍କ ସହ ଅଭିନୀତ ଚଳଚ୍ଚିତିର ଟାଇଗର୩ ରିଲିଜ ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
