ହାଇଦ୍ରାବାଦ: ଗତ କିଛି ଦିନ ହେବ 'ଅକେଲି' ଫେମ୍ ଅଭିନେତ୍ରୀ ନୁସରତ ଭରୁଚା ଶିରୋନାମାରେ ରହିଛନ୍ତି । ବାସ୍ତବରେ, ଇସ୍ରାଏଲ ଏବଂ ପାଲେଷ୍ଟାଇନ୍ ମଧ୍ୟରେ ଚାଲିଥିବା ଯୁଦ୍ଧ ସମୟରେ ନୁସରତ ଇସ୍ରାଏଲରେ ଫସି ରହିଥିଲେ । ସେ 8 ଅକ୍ଟୋବରରେ ସୁରକ୍ଷିତ ଭାବେ ନିଜ ଭାରତ ଫେରିଥିଲେ । ଏହି ଅଭିନେତ୍ରୀଙ୍କୁ ବିମାନବନ୍ଦରରେ ଦେଖିବାକୁ ମିଳିଥିଲା। ଏହି ସମୟ ମଧ୍ୟରେ ସେ ବହୁତ ବିବ୍ରତ ଏବଂ ଭାବପ୍ରବଣ ଦେଖାଯାଉଥିଲେ । ବର୍ତ୍ତମାନ ଭାରତ ଆସିବାର ଦୁଇ ଦିନ ପରେ ସେ ଏକ ଭିଡିଓ ସେୟାର କରି ନିଜ ପ୍ରତିକ୍ରିୟା ଦେଇଛନ୍ତି।
ସୋସିଆଲ ମିଡିଆରେ ନୁସରତ ଏକ ଭିଡିଓ ସେୟାର କରିଛନ୍ତି । ଇସ୍ରାଏଲରୁ ଫେରିବା ପରେ ନୁସରତ ତାଙ୍କର ପ୍ରଥମ ପ୍ରତିକ୍ରିୟା ଦେଇଛନ୍ତି ଏବଂ ତାଙ୍କ କାହାଣୀ ବର୍ଣ୍ଣନା କରିଛନ୍ତି । ଭିଡିଓ ଆରମ୍ଭରେ, ଇସ୍ରାଏଲରେ ଫସି ରହିଥିବା ବେଳେ ନୁସରତ ତାଙ୍କ ସୁରକ୍ଷାକୁ ନେଇ ଉଦବେଗ ପ୍ରକାଶ କରିଥିବା ଏବଂ ତାଙ୍କୁ ମେସେଜ୍ ସହ ତାଙ୍କ ପାଇଁ ପ୍ରାର୍ଥନା କରିଥିବା ସମସ୍ତ ଲୋକଙ୍କୁ ଧନ୍ୟବାଦ ଜଣାଇଛନ୍ତି । ଏବଂ ଭାରତକୁ ନିରାପଦରେ ଫେରିବା ପାଇଁ ଏହି ଭିଡିଓ ମାଧ୍ୟମରେ ନୁସରତ ଭାରତ ସରକାର, ଭାରତୀୟ ଏବଂ ଇସ୍ରାଏଲ୍ ଦୂତାବାସକୁ ମଧ୍ୟ ଧନ୍ୟବାଦ ଜଣାଇଛନ୍ତି । ଶୀଘ୍ର ଶାନ୍ତି ପ୍ରତିଷ୍ଠା ହେବ ବୋଲି ମଧ୍ୟ ଆଶା ପ୍ରକଟ କରିଛନ୍ତି ।
ନୁସରତ କହିଛନ୍ତି ଯେ, ତେଲ ଅଭିବରେ ବୋମା ବିସ୍ଫୋରଣ ଏବଂ ସାଇରନ ଶବ୍ଦ ଶୁଣିବା ପରେ ସେ ଅତ୍ୟନ୍ତ ବିବ୍ରତ ହୋଇଥିଲେ । ନିଜକୁ ବଞ୍ଚାଇବା ପାଇଁ ତାଙ୍କୁ ଏକ ତଳ ମହଲାରେ ଆଶ୍ରୟ ନେବାକୁ ପଡିଲା । ସେ କହିଛନ୍ତି ଯେ ଭାରତକୁ ଫେରିବା ପରେ ସେ ହୃଦୟଙ୍ଗମ କରୁଛନ୍ତି ଯେ ଆମେ ସମସ୍ତେ ଭାଗ୍ୟବାନ ଯେ ଆମ ଦେଶରେ ସୁରକ୍ଷିତ ଏବଂ ଶାନ୍ତିରେ ବାସ କରୁଛୁ ।
ଏହା ମଧ୍ୟ ପଢନ୍ତୁ: ସାମ୍ନାକୁ ଆସିଲା ନୁସରତଙ୍କ ଭିଡିଓ, ଯୁଦ୍ଧ ପୂର୍ବରୁ ଇସ୍ରାଏଲରେ ଗାଉଥିଲେ ଗୀତ
ପ୍ରକାଶିତ ରିପୋର୍ଟ ଅନୁଯାୟୀ, ଅକେଲିର ପ୍ରିମିୟର ପାଇଁ ହାଇଫା ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଯୋଗଦେବା ପାଇଁ ନୁସରତ ଇସ୍ରାଏଲ ଯାଇଥିଲେ । ହେଲେ ଯୁଦ୍ଧକାଳୀନ ପରିସ୍ଥିତି ଯୋଗୁଁ ସେଠାରେ ସେ ଫଶି ରହିଥିଲେ । ଅଭିନେତ୍ରୀ ଅକ୍ଟୋବର 7ରେ ଆକ୍ରମଣ ପରେ ତାଙ୍କ ଟିମ୍ ତାଙ୍କ ସହ ଯୋଗାଯୋଗ ହରାଇଥିଲା । ପୂର୍ବାହ୍ନ ସାଢ଼େ ୧୨ରେ ଟିମ୍ ନୁସରତଙ୍କ ସହ ଯୋଗାଯୋଗ କରିଥିଲା । ସେତେବେଳେ ସେ ବେସ୍ମେଣ୍ଟ୍ରେ ସୁରକ୍ଷିତ ଥିବା କଥା ଜଣାଇଥିଲେ । ହେଲେ ଏହା ପରଠୁ ତାଙ୍କ ସହ ଯୋଗାଯୋଗ ହରାଇଥିଲେ । ଯାହାକୁ ନେଇ ସେମାନେ ଭାରତ ସରକାରଙ୍କୁ ନୁସରତଙ୍କୁ ସୁରକ୍ଷିତ ଭାବେ ଭାରତ ଫେରାଇବାକୁ ଅପିଲ୍ କରିଥିଲେ । ଏହାପରେ ନୁସରତ ଭାରତ ସରକାର, ଭାରତୀୟ ଏବଂ ଇସ୍ରାଏଲ୍ ଦୂତାବାସଙ୍କ ସହାୟତାରେ ଅକ୍ଟୋବର ୮ରେ ମୁମ୍ବାଇ ଫେରିଥିଲେ ।
