ହାଇଦ୍ରାବାଦ: ବର୍ତ୍ତମାନ ଫରହାନ ଅଖତରଙ୍କ ଫିଲ୍ମ ଡନ୍-3 ସହ ଶିରୋନାମାରେ ରହିଛନ୍ତି । ଫିଲ୍ମ ଘୋଷଣାର 24 ଘଣ୍ଟା ମଧ୍ୟରେ ନିର୍ମାତା ଟିଜର ରିଲିଜ କରି ସୋସିଆଲ ମିଡିଆରେ ହଇଚଇ ସୃଷ୍ଟି କରିଥିଲେ । ଏହା ସହିତ ଫିଲ୍ମରେ ମୁଖ୍ୟ ଅଭିନେତାଙ୍କ ନାଁ ପ୍ରକାଶ କରିଥିଲେ । ଫିଲ୍ମରେ ଲିଡ୍ ରୋଲରେ ନଜର ଆସିବେ ବଲିଉଡ୍ ଅଭିନେତା ରଣଭୀର ସିଂ । ତେବେ ଏବେ ଫିଲ୍ମର ହିରୋଇନଙ୍କୁ ନେଇ ଚର୍ଚ୍ଚା ଚାଲିଛି । ଯାହାକୁ ନେଇ ମୁହଁ ଖୋଲିଛନ୍ତି ନିର୍ଦ୍ଦେଶକ ।
ବର୍ତ୍ତମାନ ନିର୍ଦ୍ଦେଶକ ଫରହାନ ଅଖତର ଏହି ଚଳଚ୍ଚିତ୍ରର ମୁଖ୍ୟ ଅଭିନେତ୍ରୀଙ୍କ ସମ୍ପର୍କରେ ପ୍ରତିକ୍ରିୟା ଦେଇଛନ୍ତି । ନିକଟରେ ଫରହାନ୍ ଅଖତର୍ ଏକ ସାକ୍ଷାତକାର୍ରେ ଡନ୍-3ରେ ରଣଭୀର ସିଂଙ୍କ ବିପକ୍ଷରେ କିଏ ନଜର ଆସିବେ ବୋଲି ପଚରା ଯାଇଥିଲା । ପ୍ରଶ୍ନର ଉତ୍ତରରେ ଫରହାନ କହିଛନ୍ତି ଯେ, ଫିଲ୍ମ ପାଇଁ ଅଭିନେତ୍ରୀଙ୍କୁ ଚୂଡ଼ାନ୍ତ ପ୍ରକ୍ରିୟା ଶେଷ ପର୍ଯ୍ୟାୟରେ ଅଛି ଏବଂ ଏହି କାମ ସରିବା ମାତ୍ରେ ସେ ନିଜେ ଅଭିନେତ୍ରୀଙ୍କ ନାମ ପ୍ରକାଶ କରିବେ ।
ଫରହାନ ଅଖତର ଆହୁରି ମଧ୍ୟ କହିଛନ୍ତି,"ଏହି ପୂରା ପ୍ରୋସେସ୍ ଏବେ ଅଗ୍ରଗତି କ୍ରମରେ ରହିଛି । ମୁଁ ନିଜଠାରୁ ଆଗକୁ ଯିବାକୁ ଚାହେଁ ନାହିଁ ଏବଂ ନାଁ ମୁଁ କିଛି କହିବାକୁ ଚାହେଁ ଯାହା ମୋତେ ଅନ୍ୟ କୌଣସି କାରଣରୁ ପରେ ଫେରାଇ ଆଣିବାକୁ ପଡିପାରେ, କିନ୍ତୁ ଯେତେବେଳେ ବି ଫିଲ୍ମର ଅଭିନେତ୍ରୀ ଚୂଡାନ୍ତ ହେବେ, ଆପଣଙ୍କୁ ଜଣାଇବି ।" କିନ୍ତୁ ମିଡିଆ ରିପୋର୍ଟ ଅନୁଯାୟୀ, ଡନ୍-3ରେ ବଲିଉଡ ଅଭିନେତ୍ରୀ କିଆରା ଆଡଭାନୀ ନଜର ଆସିବେ ବୋଲି କୁହାଯାଉଛି ।
ଏହା ମଧ୍ୟ ପଢନ୍ତୁ: ଶାହାରୁଖ ନୁହଁ ରଣଭୀର ସିଂ ହେବେ ଡନ ! ଏହି ଦିନ ରିଲିଜ ହେବ ଫିଲ୍ମ ଟିଜର
ଡନ୍-3ର ଟିଜର ରିଲିଜ୍ ବିଷୟରେ ଫରହାନ୍ କହିଥିଲେ,"ଆମେ କେବଳ ଏକ ଘୋଷଣା କରିଛୁ କାରଣ ମୁଁ ଭାବୁଛି ରଣଭୀରଙ୍କ ପାଇଁ ଏହା ଏକ ଭଲ ମୁହୂର୍ତ୍ତ ଯେ, ସେ ଡନ୍ ଭୂମିକାରେ ନଜର ଆସୁଛନ୍ତି । ଲୋକମାନେ ମଧ୍ୟ ଧୀରେଧୀରେ ବୁଝିବେ କିନ୍ତୁ ଆମେ ଅଭିନେତାଙ୍କ ସହ କଣ କରିବୁ, ତେଣୁ ଏସବୁ ପାଇଁ ଆମକୁ କିଛି ସମୟ ଦରକାର ।" ସୂଚନା ଥାଉ କି, ଫିଲ୍ମର ଘୋଷଣା ପରଠାରୁ ସୋସିଆଲ ମିଡିଆରେ ଫ୍ୟାନ୍ସଙ୍କ ମଧ୍ୟରେ ଭିନ୍ନ କ୍ରେଜ୍ ଦେଖିବାକୁ ମିଳିଥିଲା । ହେଲେ ଫିଲ୍ମରେ ଶାହାରୁଖ ଖାନଙ୍କ ପରିବର୍ତ୍ତେ ରଣଭୀର ସିଂ ନଜର ଆସିବେ ବୋଲି ଜଣା ପଡିଥିଲା । ଯାହାକୁ ନେଇ ଶାହାରୁଖଙ୍କ ଫ୍ୟାନ୍ସ ପ୍ରତିକ୍ରିୟାଶୀଳ ହୋଇ ପଡ଼ିଥିଲେ । ଫ୍ୟାନ୍ସ ଏନେଇ ଅନେକ ମନ୍ତବ୍ୟ ଦେଇଥିଲେ । ପରେ ଫରହାନ ଏକ ପୋଷ୍ଟ କରି କହିଥିଲେ ଯେ, ଏବେ ଡନ୍ର ଧାରାକୁ ଆଗକୁ ନେବାର ସମୟ ଆସିଯାଇଛି 2025ରେ ଡନ୍ର ନୂଆ ଯୁଗ ଆରମ୍ଭ ହେବ । ଏହାର ଅର୍ଥ 2025ରେ ଦର୍ଶକଙ୍କ ପାଇଁ ଡନ୍-3 ରିଲିଜ ହେବ ବୋଲି ଜଣା ପଡ଼ିଛି ।
