ହାଇଦ୍ରାବାଦ: ଗିରଫ ହେଲେ ଲୋକପ୍ରିୟ କନ୍ନଡ ଚଳଚ୍ଚିତ୍ର ଅଭିନେତା ନାଗଭୂଷଣ । ଅଭିନେତାଙ୍କ କାର ଧକ୍କାରେ ମହିଳାଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସ୍ବାମୀ ଗୁରୁତର ହୋଇଥିବା ଜଣାପଡିଛି । ଗତକାଲି(ଶନିବାର) ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଥିବା ବେଳେ ଆଜି ଗିରଫ କରିଛି ପୋଲିସ । ମୃତ ମହିଳାଙ୍କ ନାମ ପ୍ରେମା ଏସ(୪୮) ହୋଇଥିବା ବେଳେ ତାଙ୍କ ସ୍ବାମୀ କ୍ରିଷ୍ଣା ବି(୫୮) ଗୁରୁତର ଭାବେ ଚିକିତ୍ସିତ ହେଉଛନ୍ତି ।
ଦମ୍ପତିଙ୍କୁ ଧକ୍କା ଦେଇଥିଲା ନାଗଭୂଷଣଙ୍କ କାର୍: ପୋଲିସର ସୂଚନା ମୁତାବକ, ଗତକାଲି(ସେପ୍ଟେମ୍ବର ୩୦ ତାରିଖ) ରାତିରେ ବସନ୍ତାପୁରା ମେନ ରୋଡରେ ଅଭିନେତାଙ୍କ ଗାଡି ଦୁର୍ଘଟଣା ହୋଇଥିଲା । ପ୍ରେମା ଏସ ଏବଂ ତାଙ୍କ ସ୍ବାମୀ କ୍ରିଷ୍ଣା ବି ରାସ୍ତାରେ ଯାଉଥିବା ବେଳେ ଅଭିନେତାଙ୍କ ଗାଡି ତାଙ୍କୁ ଧକ୍କା ଦେଇଥିଲା । ଏହାପରେ ଭାରସାମ୍ୟ ହରାଇ କାରଟି ଏତ ବିଦ୍ୟୁଟ ଖୁଣ୍ଟକୁ ଧକ୍କା ଦେଇଥିଲା । କାରଟି ଉତ୍ତରହାଲିରୁ କୋନାନାକୁଣ୍ଟେ ଅଭିମୁଖେ ଯାଉଥିବା ନେଇ ପୋଲିସ ପକ୍ଷରୁ ସୂଚନା ଦିଆଯାଇଛି । କାର ଚାଳକ ଜଣକ ଦ୍ରୁତ ଗତିରେ ଚାଳନା କରୁଥିବା ନେଇ ଅଭିଯୋଗ ହୋଇଛି । ତେବେ କାର ଧକ୍କାରେ ଦମ୍ପତି ଗୁରୁତର ହୋଇଥିଲେ । ସେମାନଙ୍କୁ ନିକଟସ୍ଥ ଏକ ବେସରକାରୀ ହସ୍ପିଟାଲରେ ଭର୍ତ୍ତି କରାଯାଉଥିବା ବେଳେ ରାସ୍ତାରେ ମହିଳାଙ୍କ ମୃତ୍ୟୁ ହୋଇଯାଇଥିଲା । କ୍ରିଷ୍ଣା ବି ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ତାଙ୍କ ସ୍ବାସ୍ଥ୍ୟବସ୍ଥା ମଧ୍ୟ ଗୁରୁତର ରହିଥିବା ନେଇ ପୋଲିସ ପକ୍ଷରୁ କୁହାଯାଇଛି । ତେବେ ନାଗଭୂଷଣଙ୍କୁ ଘଟଣାସ୍ଥଳରେ ଧରିଥିଲେ ପୋଲିସ ଅଧିକାରୀ ।
ଏହା ମଧ୍ୟ ପଢନ୍ତୁ: ହୃଦଘାତରେ ଚାଲିଗଲା କନ୍ନଡ ଅଭିନେତାଙ୍କ ପତ୍ନୀ ସ୍ପନ୍ଦନାଙ୍କ ଜୀବନ
ଅଭିନେତାଙ୍କ ବିରୋଧରେ ଦାୟର ହୋଇଥିଲା ମାମଲା: ଘଟଣାସ୍ଥଳରେ ପୋଲିସ ଦମ୍ପତିଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିବା ବେଳେ ନାଗଭୂଣଷଣଙ୍କୁ ଗିରଫ କରି ତାଙ୍କ ବିରୋଧରେ ମାମଲା ଦାୟର କରିଥିଲା । ଏହାସହ ଅଭିନେତାଙ୍କ କାରକୁ ମଧ୍ୟ ଜବତ କରିଥିଲା ପୋଲିସ । ତେବେ ଏନେଇ ପୋଲିସ ପକ୍ଷରୁ କୁହାଯାଇଛି ଯେ, "କେଉଁ ପରିସ୍ଥିତିରେ ଅଭିନେତାଙ୍କ କାର ଦୁର୍ଘଟଣା ହେଲା ସେନେଇ ଆମେ ତଦନ୍ତ ଆରମ୍ଭ କରିଥିଲୁ । ଉକ୍ତ ସମୟରେ ଅଭିନେତା ଜଣକ ମଦ ପିଇଥିଲେ କି ନାହିଁ ତାହା ଜାଣିବା ପାଇଁ ଆଲକୋମିଟର ଚେଷ୍ଟ କରିଥିଲୁ । କିନ୍ତୁ ନାଗଭୂଣଷ ଡ୍ରିଙ୍କ୍ସ କରିନଥିବା ନେଇ ରିପୋର୍ଟରେ ଆସିଥିଲା।" ତେବେ ଏକ ବାଛୁରିକୁ ବଞ୍ଚାଇବାକୁ ଯାଇ ଦୁଃଖଦ ଭାବେ ଦମ୍ପତିକୁ କାର ଧକ୍କା ହୋଇଥିବା ନେଇ ଅଭିନେତା ଜଣକ କହିଛନ୍ତି ।
ଯଦି ଅଭିନେତାଙ୍କ କଥା କହିବା, କନ୍ନଡ ଫିଲ୍ମ ଜଗତରେ ହାସ୍ୟ ଅଭିନେତା ଭାବେ ପରିଚିତ ନାଗଭୂଷଣ । ଅନେକ ଚଳଚ୍ଚିତ୍ରରେ ସେ ହାସ୍ୟ ଅଭିନେତା ଭାବେ ଅଭିନୟ କରିଛନ୍ତି । ୨୦୧୬ ମସିହାରେ ବଦମାସ ଫିଲ୍ମ କରିଥିଲେ । ଏହାସହ ସେ ଅନେକ କନ୍ନଡ ଏବଂ ତେଲୁଗୁ ଓ୍ବେବସିରିଜ ମଧ୍ୟ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
