ବଲାଙ୍ଗୀର: ଦ୍ବିତୀୟ ପର୍ଯ୍ୟାୟ ମତଦାନ ପାଇଁ ସରଗରମ ବଲାଙ୍ଗୀର ରାଜନୀତି । 18ତାରିଖରେ ପାରମ୍ପରିକ ପ୍ରତିଦ୍ବନ୍ଦ୍ବୀ ରାଜ ପରିବାର ଓ ମିଶ୍ର ପରିବାରର ଭାଗ୍ୟ ନିର୍ଦ୍ଧାରଣ କରିବେ ବଲାଙ୍ଗୀରବାସୀ । ନିର୍ବାଚନ ମୈଦାନରେ ବଲାଙ୍ଗୀର ବିକାଶ ଉପରେ ବିଶେଷ ଧ୍ୟାନ ହିଁ ଜିତିବା ପାଇଁ ମୁଖ୍ୟ ଅସ୍ତ୍ର । ଏହାକୁ ଆଖିଆଗରେ ରଖି ବିଜେଡି ନିଜ ସଙ୍କଳ୍ପ ପତ୍ର ପ୍ରକାଶ କରିଛି । ବିଜେଡି ବିଧାୟକ ପ୍ରାର୍ଥୀ ଅର୍କେଶ ସିଂହ ଦେଓ ଏହି ସଙ୍କଳ୍ପ ପତ୍ର ଉନ୍ନୋଚନ କରି ବଲାଙ୍ଗୀରର ସର୍ବାଙ୍ଗୀନ ଉନ୍ନତି ପାଇଁ ସମସ୍ତ ଆବଶ୍ୟକ ଦିଗକୁ ଏହି ପତ୍ରରେ ସ୍ଥାନ ଦିଆଯାଇଥିବା କହିଛନ୍ତି ।
ସଂକଳ୍ପ ପତ୍ରର ଉନ୍ମୋଚନ କରି ନିର୍ବାଚନ ଜିଣିଲେ ବଲାଙ୍ଗୀରର ସର୍ବାଙ୍ଗିନ ଉନ୍ନତି ପାଇଁ ବିଜେଡି ସଂକଳ୍ପ ନେଇଛି । ମୋଟ ୩୮ ମୁଖ୍ୟ ବିକାଶମୂଳକ କାମ କରିବାର ଏହି ସଂକଳ୍ପ ପତ୍ରରେ କରିଛି ଉଲ୍ଲେଖ । ଜିଲ୍ଲାର ଦୀର୍ଘ ଦିନରୁ ଅଟକି ପଡି ରହିଥିବା ସମସ୍ତ ପ୍ରକଳ୍ପକୁ ଶୀଘ୍ର ସମାପ୍ତ କରିବା ସହ ସବୁକୁ କାର୍ଯ୍ୟକ୍ଷମ କରିବା ଭଳି ଏଥିରେ ଅନେକ ପ୍ରତିଶୃତି ରହିଛି । ଏଥିରେ ବଲାଙ୍ଗୀର ଲୋୟର ଶୁକତେଲ କାର୍ଯ୍ୟ ସାରିବା, ବାଇପାସ ଓ ରିଙ୍ଗ ରୋଡ ଶୀଘ୍ର ତିଆରି କରିବା ପ୍ରସଙ୍ଗକୁ ସ୍ଥାନ ଦିଆଯାଇଛି ।
ସେହିଭଳି ବଲାଙ୍ଗୀର ତଥା ପଶ୍ଚିମ ଓଡିଶା ପାଇଁ ବିଧାନସଭାରେ ସ୍ବତନ୍ତ୍ର ସେସନ ରଖିବା, ଟେକ୍ସଟାଇଲ ପାର୍କ, କଳାଗ୍ରାମ ସ୍ଥାପନ କରିବା, ମ୍ୟୁଜିୟମ, ସିଟି ବସ ଯୋଜନା ଆରମ୍ଭ ଭଳି ଜନକଲ୍ୟାଣ ଯୋଜନାକୁ ସଙ୍କଳ୍ପ ପତ୍ରରେ ସ୍ଥାନ ଦିଆଯାଇଛି । ସେହିଭଳି କୃଷି ଭିତ୍ତିକ ଟର୍ମନାଲ ଓ ମାର୍କେଟ ୟାଡ, ଡିଜିଟାଲ ଲାଇବ୍ରେରି ଇତ୍ୟାଦି ସହ ବଲାଙ୍ଗୀରେ ଥିବା ସମସ୍ତ ପର୍ଯ୍ୟଟନ ସ୍ଥଳ ଗୁଡିକର ବିକାଶ ସହ ନୁଆ ପର୍ଯ୍ୟଟନ ସ୍ଥଳ ନିର୍ମାଣ ଯୋଜନା ସବୁକୁ ସାମିଲ କରାଯାଇଛି । ତେବେ ଏହାଦ୍ୱାରା ଜିଲ୍ଲାର ସାମଗ୍ରୀକ ବିକାଶ ସହ ସବୁ ବର୍ଗ ଉପକୃତ ହେବେ ବୋଲି ବିଜେଡି ପ୍ରତିଶୃତି ଦେଇଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ୍, ଇଟିଭି ଭାରତ
