ସମ୍ବଲପୁର: ଗରିବ ଓ ଅସହାୟଙ୍କ ପାଇଁ ସରକାରଙ୍କ କାହିଁ କେତେ ଯୋଜନା । ହେଲେ ଏସବୁରୁ ବଞ୍ଚିତ ସମ୍ବଲପୁର ବଡରମା ଗ୍ରାମ ପଞ୍ଚାୟତ ବିଶ୍ବାଲପାଲି ଗ୍ରାମ ଚନ୍ଦ୍ରଡିହି ପଡାର ଯୋଗେଶ ସିଂ । ସରକାର ଗ୍ରାମାଞ୍ଚଳର ବିକାଶ ପାଇଁ ଯୋଜନା ପରେ ଯୋଜନାର ଡିଣ୍ଡିମ ପିଟୁଥିବା ବେଳେ ଖଣ୍ଡେ ପକ୍କା ଘର ଯେମିତି ସାତ ସପନ ପାଲଟିଛି ଯୋଗେଶଙ୍କ ପାଇଁ । କେନ୍ଦ୍ର ସରକାରଙ୍କ ଆବାସ ଯୋଜନା ହେଉ ଅବା ରାଜ୍ୟ ସରକାରଙ୍କ ବିଜୁ ପକ୍କା ଘର, ଏସବୁଥିରୁ ବଞ୍ଚିତ ଯୋଗେଶ ।
ପରିବାର କହିଲେ ସ୍ତ୍ରୀ ଓ ୩ ପିଲା । ଗ୍ରୀଷ୍ମର ଦାଉରୁ ରକ୍ଷା ପାଇବା ପାଇଁ ଏବେ ଘର ନଥିବାରୁ ଜଙ୍ଗଲ ମଧ୍ୟରେ ବଞ୍ଚିବାକୁ ସଂଗ୍ରାମ କରୁଛନ୍ତି ଯୋଗେଶଙ୍କ ପରିବାର । ଜଙ୍ଗଲ ମଧ୍ୟରେ ଗ୍ରୀଷ୍ମର ଦାଉରୁ ରକ୍ଷା ପାଇବା ପାଇଁ ଏକ ଛୋଟ କୁଡିଆ ଘରେ ଦିନ ବିତୁଥିବାବେଳେ ରାତି ହେଲେ ଜୀବଜନ୍ତୁଙ୍କ ଭୟରେ ମଞ୍ଚା ଉପରେ ରାତ୍ରିଯାପନ କରୁଛନ୍ତି ।
କିଛି ଦିନ ପୂର୍ବରୁ ଗାଁରେ ଥିବା ଯୋଗେଶଙ୍କ ମାଟି ଘର ଭାଙ୍ଗି ଯାଇଥିଲା। ଏହା ପରେ ସରକାରୀ ଯୋଜନାରେ ଘରଟିଏ ପାଇବା ପାଇଁ ସେ ବ୍ଲକ ଅଫିସକୁ ଯାଇଥିଲେ । କିନ୍ତୁ କୌଣସି ସୁଫଳନମିଳିବାରୁ ଜଙ୍ଗଲ ଭିତରେ କଟୁଛି ଯୋଗେଶଙ୍କ ଜୀବନ । ଜଙ୍ଗଲ ମଧ୍ୟରେ ତାଙ୍କ ପତ୍ନୀ କମଳିନୀ ସିଂ, 9 ବର୍ଷର ପୁଅ ରାଜା, 7 ବର୍ଷର ଝିଅ ରାଜଶ୍ରୀ ଓ 8 ମାସ ଶିଶୁ ବଜେଶ୍ୱର ସିଂ ରହୁଛନ୍ତି ।
ଏନେଇ ବଡରମା ପଞ୍ଚାୟତ ନିର୍ବାହୀ ଅଧିକାରୀ ସୂଚନା ଦେଇଛନ୍ତି ଯେ 2 ବର୍ଷ ହେଲା ଆବାସ ଯୋଜନାରେ ଘର ଆସି ନଥିବାରୁ ଯୋଗେଶଙ୍କୁ ଘର ମିଳିନି। ତେବେ ଯୋଗେଶଙ୍କୁ ସରକାରୀ ଯୋଜନାରେ ସାମିଲ କରିବା ନେଇ ଜିଲ୍ଲା ପ୍ରଶାସନକୁ ଅବଗତ କରାଇବେ ବୋଲି କହିଛନ୍ତି ସ୍ଥାନୀୟ ଜିଲ୍ଲା ପରିଷଦ । ଯଥା ଶୀଘ୍ର ଯୋଗେଶଙ୍କୁ ସରକାରୀ ଯୋଜନାରେ ଏକ ଘର ଯୋଗାଇବାକୁ ଦାବି କରିଛନ୍ତି ସ୍ଥାନୀୟ ଗ୍ରାମବାସୀ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
