ରାଉରକେଲା: ସୁନ୍ଦରଗଡ଼ ଜିଲ୍ଲାର ସହରାଞ୍ଚଳ ସହିତ ଗ୍ରାମାଞ୍ଚଳରେ ମଧ୍ୟ କୋରୋନା ଲୋକଙ୍କ ଚିନ୍ତାର କାରଣ ପାଲଟିଛି । କୋରୋନାର ମୁକାବିଲା ପାଇଁ ପ୍ରଶାସନ ପଦକ୍ଷେପ ଗ୍ରହଣ କରିଛି । ନୂଆଗାଁ, ସୋରଡା, ଲୁଆରମ ସହିତ ବିଭିନ୍ନ ସ୍ୱାସ୍ଥ୍ୟକେନ୍ଦ୍ରରେ ଆଇସୋଲେସନ ୱାର୍ଡ ତିଆରି କରିବା କାମ ଯୁଦ୍ଧକାଳୀନ ପରିସ୍ଥିତିରେ ଚାଲିଛି । ଇନଭଟର ଜରିଆରେ 24 ଘଣ୍ଟା ପାଣି ବିଜୁଳିର ବ୍ୟବସ୍ଥା କରାଯାଉଛି ।
ଆଦିବାସୀ ବହୁଳ ସୁନ୍ଦରଗଡ଼ ଜିଲ୍ଲାର ଗାଁ ଗାଁରୁ ହାଜାର ହଜାର ଲୋକ ଦାଦନ କିମ୍ବା ଶ୍ରମିକ ଭାବେ କାମ କରିବା ପାଇଁ ଦିଲ୍ଲୀ, ପଞ୍ଜାବ, ୟୁପି, ରାଜସ୍ଥାନ, ଗୁଡ଼ଗାଓଁ, ବାଙ୍ଗାଲୋର, ମାଡ୍ରାସ, ମୁମ୍ବାଇରେ ରୁହନ୍ତି । କୋରୋନା ପ୍ରଭାବିତ ଅଞ୍ଚଳରୁ ଆସିଥିବା ଲୋକମାନେ ସିଧାସଳଖ ତାଙ୍କ ଦୂର ଦୁରନ୍ତ ଗାଁକୁ ଚାଲି ଯାଇଛନ୍ତି । ଗାଁରେ ଆଶାକର୍ମୀମାନେ ଏଭଳି ଫେରନ୍ତା ଲୋକଙ୍କ ସୂଚୀ ପ୍ରସ୍ତୁତ କରି ଏମାନଙ୍କ ଉପରେ ନଜର ରାଖୁଛନ୍ତି । ଗାଁରେ ଥିବା ଚିକିତ୍ସା କେନ୍ଦ୍ର ଗୁଡିକରେ ମଧ୍ୟ ଏଭଳି ଫେରନ୍ତା ଲୋକଙ୍କ ସୂଚୀ ପ୍ରସ୍ତୁତ କରି ତାଙ୍କ ଉପରେ ନଜର ରଖାଯାଉଛି ।
କୋରୋନା ସମ୍ପର୍କରେ ଗ୍ରାମବାସୀ ଗଣମାଧ୍ୟମ ମାଧ୍ୟମରେ ଜାଣିବା ପରେ ଫେରନ୍ତା ଲୋକଙ୍କ ପାଇଁ ଭୟଭୀତ ହେଉଛନ୍ତି । ସୋମବାରଠାରୁ ଗ୍ରାମାଞ୍ଚଳରେ ଲୋକଡାଉନର ପ୍ରଭାବ ଦେଖିବାକୁ ମିଳିଛି । ନୂଆଗାଁ, ସୋରଡା, ସହିତ ବିଭିନ୍ନ ଅଞ୍ଚଳରେ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲାଯାଇଛି । ଅନ୍ୟ ଦୋକାନ ବଜାରକୁ ସମ୍ପୂର୍ଣ୍ଣ ଭାବେ ବନ୍ଦ କରିଦିଆଯାଇଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
