ରାଉରକେଲା: ପୁଣି ପୋଲିସ ବିରୋଧରେ ତାତିଲେ ଲୋକେ। ନାବାଳିକା ଅପହରଣ ମାମଲାର କାର୍ଯ୍ୟାନୁଷ୍ଠାନ ଦାବି କରି ରାଉରକେଲା ପ୍ଲାଣ୍ଟସାଇଟ ଥାନା ଘେରିଲେ ସ୍ଥାନୀୟବାସୀ। ଆଉ ସ୍ଥାନୀୟଲୋକଙ୍କୁ ସମର୍ଥନ କରି ଥାନା ସମ୍ମୁଖରେ ଧାରଣାରେ ବସିଛନ୍ତି ଅନେକ କଂଗ୍ରେସ କର୍ମୀଙ୍କ ସହ ଖୋଦ ପୂର୍ବ ବିରମିତ୍ରପୁର ବିଧାୟକ ଜର୍ଜ ତିର୍କୀ ।
ପାଖାପାଖି ମାସେ ପୂର୍ବରୁ ପ୍ଲାଣ୍ଟସାଇଟ ଥାନା ଅନ୍ତର୍ଗତ ନାଲା ରୋଡ଼ ଅଞ୍ଚଳରୁ ଜଣେ ନାବାଳିକାକୁ ସେହି ଅଞ୍ଚଳର ଏମଡି ସଲିମ ଅନସାରି ନାମକ ଜଣେ ଟ୍ୟୁସନ ମାଷ୍ଟର ଅପହରଣ କରି ନେଇ ଯାଇଥିବା ପ୍ଲାଣ୍ଟସାଇଟ ଥାନାରେ ଅଭିଯୋଗ କରିଥିଲେ ନାବାଳିକାର ପରିବାର ଲୋକ ।
କିନ୍ତୁ ଘଟଣାକୁ ମାସେରୁ ଉର୍ଦ୍ଧ୍ବ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ପୋଲିସ ତରଫରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ । ଯାହାକୁ ନେଇ ଆଜି ନାବାଳିକାର ପରିବାର ଲୋକ ଏବଂ ସ୍ଥାନୀୟ ଅଞ୍ଚଳର ବସ୍ତି ବାସିନ୍ଦା ପ୍ଲାଣ୍ଟସାଇଟ ଥାନା ଘେରାଉ କରିବା ସହ ଥାନା ସମ୍ମୁଖରେ ଧାରଣାରେ ବସିଥିଲେ। ଏହାସହ ଅପହରଣକାରୀଙ୍କୁ ତୁରନ୍ତ ଗିରଫ କରିବା ସହ ନାବାଳିକାକୁ ଉଦ୍ଧାର କରିବା ପାଇଁ ଦାବି କରିଛନ୍ତି ବସ୍ତି ବାସୀ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
