ରାଉରକେଲା: ଏକ ହୋଟେଲ ରୁମରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ଏଭଳି ଅଭାବନୀୟ ଘଟଣା ଘଟିଛି ରାଉରକେଲା ପାନପୋଷ ରୋଡ଼ରେ ଥିବା ଏକ ହୋଟେଲର 105 ନମ୍ବର ରୁମରେ । ତେବେ ମୃତ ଯୁବକ ଜଣଙ୍କ କେନ୍ଦ୍ରାପଡାର ରାକେଶ କୁମାର ଦାସ ବୋଲି ଜଣାପଡିଛି । ତେବେ ଯୁବକଙ୍କ ଶବ ଫ୍ୟାନରେ ଝୁଲୁଥିବା ଅବସ୍ଥାରେ । ରଘୁନାଥପଲ୍ଲୀ ପୋଲିସ ଉଦ୍ଧାର କରିଛି। ମଙ୍ଗଳବାର ଯୁବକର ଝୁଲନ୍ତା ଶବ ହୋଟେଲରେ ମିଳିଥିଲା।
ସୂଚନା ଅନୁଯାୟୀ, ରାକେଶ ମେ 12ରେ ଦିଲ୍ଲୀରୁ ଆସି ହୋଟେଲରେ ରହୁଥିଲେ । ତେବେ ମଙ୍ଗଳବାର 11ଟା ପର୍ଯ୍ୟନ୍ତ ସେ ରୁମରୁ ନ ବାହାରିବାରୁ ହୋଟେଲ କର୍ତ୍ତୃପକ୍ଷ ରୁମକୁ କଲ୍ କରିଥିଲେ । କିନ୍ତୁ କୌଣସି ଉତ୍ତର ନମିଳିବାରୁ ହୋଟେଲ କର୍ତ୍ତୃପକ୍ଷ ତାଙ୍କ ରୁମ ଝରକାର ପରଦା ଏଡାଇ ଦେଖିବା ପରେ ତାଙ୍କୁ ଫ୍ୟାନରେ ଝୁଲନ୍ତା ଅବସ୍ଥାରେ ଦେଖି ପୋଲିସକୁ ଖବର ଦେଇଥିଲେ ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ହୋଟେଲ ରୁମକୁ ସିଲ କରିଥିଲେ । ଏହାପରେ ରାକେଶଙ୍କ ଘର ଲୋକଙ୍କୁ ଖବର ଦେଇଥିଲୋ। ତେବେ ବୁଧବାର ତାଙ୍କ ସମ୍ପର୍କୀୟମାନଙ୍କ ଉପସ୍ଥିତିରେ ପୋଲିସ ଶବକୁ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ପଠାଇଥିଲେ।
ଏପଟେ ରାକେଶଙ୍କ ଆତ୍ମହତ୍ୟାକୁ ନେଇ ପରିବାର ଲୋକ ବିଶେଷ କିଛି ସୂଚନା ଦେଇନଥିଲେ । କିନ୍ତୁ ତାଙ୍କ କହିବା ଅନୁଯାୟୀ ରାକେଶ ଦିଲ୍ଲୀରୁ ଆସିବା ପରେ ପ୍ରଥମେ କଟକ ଆସିଥିଲେ । ଏହାପରେ ରାଉରକେଲା ଯିବାପରେ ତାଙ୍କ ଫୋନ ବନ୍ଦ ହୋଇ ଯାଇଥିଲା । ତେବେ ଏହା ହତ୍ୟା କି ଆତ୍ମହତ୍ୟା ତାହା ତଦନ୍ତରୁ ଜଣାପଡିବ ।
ରାଉଲକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
