ରାଉରକେଲା: ସରିଛି ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ପ୍ରାର୍ଥିପତ୍ର ଦାଖଲର ଶେଷ ସମୟ । ସୋମବାର ଏଥିପାଇଁ ଶେଷ ଦିନ ଥିବାବେଳେ ନାମାଙ୍କନ ଦାଖଲ କରିଥିଲେ ଅନେକ ହେଭିୱେଟ ନେତା । ଆଜି ହେଉଛି 2ୟ ପର୍ଯ୍ୟାୟ ନିର୍ବାଚନ ପାଇଁ ନାମାଙ୍କନର ଶେଷ ଦିନ । ଏହି ଅବସରରେ ସୁନ୍ଦରଗଡ ଜିଲ୍ଲାରେ ଦେଖିବାକୁ ମିଳିଛି ଏକ ନିଆରା ଦୃଶ୍ୟ ।
ସୁନ୍ଦରଗଡ ଲୋକସଭା ଆସନରେ ଏଥର ମୁଖ୍ୟତଃ ଜୁଏଲ-ସୁନୀତା ଲଢେଇ ହେବ ବୋଲି ଚର୍ଚ୍ଚା ହେଉଛି । ଏଠାରୁ ବିଜେପି ପୁଣିଥରେ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କୁ ପ୍ରାର୍ଥୀ କରିଛି । ଗତଥର ଏଠାରୁ ଜୁଏଲ ବିଜୟୀ ହୋଇଥିଲେ । ସେପଟେ ବିଜେଡି ଏଥର ଦଳର ମହିଳା ସଂରକ୍ଷଣ ନିୟମ ଅନୁସାରେ ଏଠାରୁ ସୁନୀତା ବିଶ୍ବାଳଙ୍କୁ ପ୍ରାର୍ଥୀ କରିଛି । ସୁନୀତା ହେଉଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା ହେମାନନ୍ଦ ବିଶ୍ବାଳଙ୍କ ଝିଅ ।
ଏହି ଆସନ ପାଇଁ ଉଭୟ ଆଜି ପ୍ରାର୍ଥିପତ୍ର ଦାଖଲ କରିବାକୁ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚିଛନ୍ତି । ତେବେ ଶେଷ ଖବର ଅନୁସାରେ ଉଭୟ ଅଫିସ ବାହାରେ ଅପେକ୍ଷା କରି ରହିଛନ୍ତି । ଆଉ କିଛି ସମୟ ପରେ ଉଭୟ ଭିତରେ ପ୍ରବେଶ କରି ନିଜ ନାମାଙ୍କନ ଭରିବେ । ଏହି ସମୟରେ ସେଠାରେ ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା । ଉଭୟ ପ୍ରାର୍ଥୀ ଅଫିସ ବାହାରେ ପାଖାପାଖି ବସି ରହିଥିଲେ ।
ନିଜ ପ୍ରାର୍ଥିପତ୍ର ଦାଖଲ ପାଇଁ ଆବଶ୍ୟକୀୟ କାଗଜପତ୍ର ଧରି ଉଭୟ ବାହାରେ ଚେୟାରରେ ବସିଛନ୍ତି । ଉଭୟଙ୍କ ହାବଭାବ ଦେଖି ଲାଗୁଥିଲା ଯେପରି ଉଭୟ ଖୁସି ମିଜାଜରେ ଅଛନ୍ତି । ଆଗାମୀ ଦିନରେ ପରସ୍ପର ବିରୋଧରେ ପ୍ରଚାର କରିବାକୁ ଥିବା ଏହି ଦୁଇ ନେତା ପାଖାପାଖି ବସି ହସଖୁସି କରୁଥିବାର ଦେଖିବାକୁ ମିଳିଥିଲା । ସୁନୀତା ତାଙ୍କ ସହ ଥିବା ଜଣେ ବିଜେଡି କର୍ମୀଙ୍କୁ ଦଳୀୟ ବାନା ପିନ୍ଧାଉଥିବାବେଳେ ଜୁଏଲ ଏହା ଦେଖି ସାମାନ୍ୟ ହସି ଦେଇଥିଲେ । ଏବେ ଦେଖିବାକୁ ବାକି ରହିଲା କିଏ ଆଗ ଭିତରକୁ ପ୍ରବେଶ କରି ପ୍ରାର୍ଥିପତ୍ର ଦାଖଲ କରୁଛି ।
ତେବେ ନାମାଙ୍କନ ଦାଖଲ କରିବା ସମୟରେ ଶାସକ-ବିରୋଧୀ କୋଳାକୋଳି କିଛି ନୂଆ କଥା ନୁହେଁ । ଗତକାଲି ମଧ୍ୟ ଏପରି କିଛି ଦୃଶ୍ୟ ଦେଖିବାକୁ ମିଳିଥିଲା । ପ୍ରାର୍ଥିପତ୍ର ଦାଖଲ ପାଇଁ ଯିବା ପୂର୍ବରୁ ବରଗଡ ଲୋକସଭା ଲାଗି ବିଜେପି ପ୍ରାର୍ଥୀ ସୁରେଶ ପୂଜାରୀ ଓ ବିଜେଡିର ପ୍ରାର୍ଥୀ ପ୍ରସନ୍ନ ଆଚାର୍ଯ୍ୟଙ୍କ କୋଳାକୋଳି ଦୃଶ୍ୟ ଥିଲା ନିଆରା । ସେହିପରି ରାଉରକେଲାରେ ପ୍ରାର୍ଥିପତ୍ର ଦାଖଲ ପାଇଁ ଯିବାବେଳେ ଅଧିକ ଖରା ଯୋଗୁଁ ଅସୁସ୍ଥ ଅନୁଭବ କରିଥିବା ବିଜେଡି ପ୍ରାର୍ଥୀ ଶାରଦା ନାୟକଙ୍କୁ ପାଣି ପିଆଇ କୋଳାଗ୍ରତ କରିଥିଲେ ବିଜେପି ପ୍ରାର୍ଥୀ ନିହାର ରାୟ ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
