ରାଉରକେଲା: ଜିଏସଟି ଠକେଇ ମାମଲାରେ ଶୁକ୍ରବାର ସିଜିଏସଟି ଅଧିକାରୀମାନେ ସିଭିଲ ଟାଉନର 2ଟି ସ୍ଥାନରେ ଚଢାଉ କରିଛନ୍ତି । ଏହି ଚଢାଉ ରାଉରକେଲାର ଇ-7ର ମେସର୍ସ ଏସଏସ ପ୍ରୋଫାଇଲ ତଥା ବାଲାଜି ଟ୍ରେଡ୍ସ ନାମକ ଦୁଇ ନକଲି କମ୍ପାନୀରେ କରାଯାଇଛି । କମ୍ପାନୀ ଦ୍ବୟ ପାଖାପାଖି 62 କୋଟି ଟଙ୍କା ଠକେଇ କରିଥିବାର ଅଭିଯୋଗ ପରେ ସିଜିଏସଟି ତରଫରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ସୂଚନା ଅନୁସାରେ, କିଛି ବ୍ୟକ୍ତି ନକଲି କମ୍ପାନୀ ଖୋଲି ଠକାମି କରୁଥିବା ଅଭିଯୋଗ ଆସିଥିଲା । ଯାହାଫଳରେ ସିଜିଏସଟିର ଇଣ୍ଟେଲିଜେନ୍ସ ଅଧିକାରୀ ଜି ସି ବହୁବଳେନ୍ଦ୍ରଙ୍କ ନେତୃତ୍ୱରେ ମାନସ ଚନ୍ଦ୍ର ବାଦଲକୁ ଗିରଫ କରି ଏସିଡିଜେମ କୋର୍ଟରେ ହାଜର କରାଯାଇଥିଲା । ଗିରଫ ମାନସ ଚନ୍ଦ୍ର ବାଦଲଙ୍କ ଜାମିନ ନାମାଞ୍ଜୁର ହେବାରୁ ତାଙ୍କୁ ଜେଲ ପଠାଇ ଦିଆଯାଇଛି ।
ଖବର ଅନୁଯାୟୀ, ଗତ କିଛି ମାସ ହେବ 400 କୋଟି ଟଙ୍କାର ଜିଏସଟି ଠକାମି ମାମଲା ସାମ୍ନାକୁ ଆସିଥିଲା । ଏଥିରେ ସହରର ବହୁତ ସଂଖ୍ୟାରେ ଜଣାଶୁଣା ଲୋକଙ୍କ ସମ୍ପୃକ୍ତି ରହିଛି । କିନ୍ତୁ, ବିଭାଗ ଦ୍ଵାରା ବହୁତ କମ ଲୋକଙ୍କୁ ଗିରଫ କରାଯାଉଥିବାରୁ ଠକାମୀ କରୁଥିବା ଲୋକଙ୍କ ମନରେ ଭୟ ରହୁନଥିବା ଅଭିଯୋଗ ହେଉଛି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
