ରାଉରକେଲା: କାମ କରିବାକୁ କହିବା ପଡିଲା ମହଙ୍ଗା । ଯାହାର ଫଳ ସ୍ବରୂପ ଜୀବନ ହାରିବାକୁ ପଡିଛି ଜଣେ ଆସିଷ୍ଟାଣ୍ଟ ମ୍ୟାନେଜରଙ୍କୁ । ଏଭଳି ଘଟଣା ଦେଖିବାକୁ ମିଳିଛି ରାଉରକେଲା ଇସ୍ପାତ କାରଖାନା ପରିସରରେ ଥିବା ଫେରୋ ସ୍କ୍ରାପ୍ ନିଗମ ଲିମିଟେଡ୍ରେ । ଏଠାରେ କାମ କରୁଥିବା ଜଣେ ଶ୍ରମିକର ଲୁହାଛଡ ଆକ୍ରମଣରେ ଆସିଷ୍ଟାଣ୍ଟ ମ୍ୟାନେଜର ଜି.ଗଣେଶ କୁମାରଙ୍କ ମୃତ୍ୟୁ ଘଟିଛି।
ରବିବାର କାମ ଚାଲିଥିବା ସମୟରେ ଠିକା ଶ୍ରମିକ ଅନିଲ ଲୋହାରଙ୍କୁ ଗଣେଶ ଠିକ୍ରେ କାମ କରିବାକୁ କହିଥିଲେ ଗଣେଶ । ଯାହାକୁ ନେଇ ଦୁଇ ଜଣଙ୍କ ମଧ୍ୟରେ ବଚସା ହୋଇଥିଲା । ଏଥିରେ ରାଗିଯାଇ ଅନିଲ ଏକ ଲୁହାଛଡରେ ଗଣେଶଙ୍କ ପଛମୁଣ୍ଡକୁ ମାରିଥିଲା । ଘଟଣାସ୍ଥଳରେ ସେ ରକ୍ତବାନ୍ତି କରିବା ସହ ଟଳି ପଡିଥିଲେ।
ଖବର ପାଇ ପୋଲିସ ସେଠାରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ଆଇଜିଏଚ(ଇସ୍ପାତ ଜେନେରାଲ ହସ୍ପିଟାଲ)କୁ ପଠାଇଛି। ମୃତ ଗଣେଶଙ୍କ ଘର ଆନ୍ଧ୍ରପ୍ରଦେଶର ବିଶାଖାପଟ୍ଟନମରେ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
