ରାଉରକେଲା: କୋରୋନା ଯୋଗୁଁ ସମଗ୍ର ରାଜ୍ୟରେ ଲକଡାଉନ ଘୋଷଣା ହୋଇଥିବା ବେଳେ ସୁନ୍ଦରଗଡ ଜିଲ୍ଲା ବଣେଇ ଉପଖଣ୍ଡ କୋଇଡା ଥାନା ଅନ୍ତର୍ଗତ କ୍ରିଆକୁଦ ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଦୁଷ୍କର୍ମ ଉଦ୍ୟମ ଅଭିଯୋଗରେ 3 ଜଣ ଗିରଫ ହୋଇଥିବା ଜଣାପଡିଛି ।
ସୂଚନା ଅନୁଯାୟୀ, କ୍ରିଆକୁଦ ଗ୍ରାମରେ ଜଣେ ଯୁବତୀ ତାଙ୍କ ଦିବ୍ୟାଙ୍ଗ ମାଙ୍କ ସହ ଘରେ ଶୋଇଥିଲେ । ସେହି ସମୟରେ ୩ ଜଣ ଯୁବକ ପାପୁନ ବାରିକ, ବିଜୁ ବାରିକ , ଦୁର୍ଗା ମହାକୁଡ ତାଙ୍କ ଘରକୁ ଆସିଥିଲେ। ସେମାନଙ୍କ ମଧ୍ୟରୁ 2 ଜଣ ଘର ବାହାରେ ଜଗିଥିବା ବେଳେ ଜଣେ ଘର ଭିତରକୁ ଯାଇ ଯୁବତୀ ଜଣଙ୍କ ସହ ଦୁଷ୍କର୍ମ କରିବାକୁ ଚେଷ୍ଟା କରିଥିଲେ ।
ସେହି ସମୟରେ ଯୁବତୀ ଜଣକ ଚିତ୍କାର କରିବାରୁ ଘର ବାହାରେ ଜଗିଥିବା ଦୁଇ ଜଣ ଯୁବକ ଘର ଭିତରକୁ ଯାଇ ଯୁବତୀଙ୍କ ତଣ୍ଟି ଚିପୁଥିବା ସମୟରେ ଗାଁ ଲୋକ ପହଞ୍ଚି ଯୁବତୀଙ୍କୁ ଉଦ୍ଧାର କରିଥିଲେ । ଏଥିସହ ୩ ଜଣ ଯୁବକଙ୍କୁ କାବୁ କରି ପୋଲିସକୁ ଖବର ଦେଇଥିଲେ । କୋଇଡା ପୋଲିସ ଘଟଣା ସ୍ଥଳରେ ପହଞ୍ଚି ୩ ଜଣ ଯୁବକଙ୍କୁ ଗିରଫ କରିବା ସହ ସୋମବାର ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି କୋଇଡ଼ା ଆଇଆଇସି ସୂଚନା ଦେଇଛନ୍ତି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
