ରାଉରକେଲା: ସୁନ୍ଦରଗଡର ବ୍ରାହ୍ମଣୀତରଙ୍ଗ ଥାନା ଅନ୍ତର୍ଗତ ଆଇଡିସି ଅଞ୍ଚଳରେ ଅଘଟଣ। ସ୍ଥାନୀୟ ଅଞ୍ଚଳରେ ଥିବା ପୂଜା ସ୍ପଞ୍ଜ ଆଇରନ କାରଖାନାରେ ଅଣନିଶ୍ବାସୀ ହୋଇପଡିବାରୁ 2 ଜଣ ଶ୍ରମିକଙ୍କ ମୃତ୍ୟୁ ହୋଇଛି। ମୃତକଦ୍ବୟ ହେଉଛନ୍ତି ଅଜୟ ସମଦ ଏବଂ ପଙ୍କଜ କେର୍କେଟା।
କାରଖାନାର ଫର୍ଣ୍ଣେସ ସଫା କରିବା ବେଳେ ଅଣନିଶ୍ବାସୀ ହୋଇ 2 ଜଣ ସଂଜ୍ଞାହୀନ ହୋଇ ପଡିଯାଇଥିଲେ। ଉଭୟଙ୍କୁ ରାତି ପ୍ରାୟ 9.30ରେ ସରକାରୀ ଡାକ୍ତରଖାନା ଅଣାଯାଇଥିଲା। ମାତ୍ର ଡାକ୍ତର ସେଠାରେ ଉଭୟଙ୍କୁ ମୃତ ଘୋଷଣା କରିଥିଲେ। ଏ ଘଟଣାକୁ ନେଇ କାରଖାନା ପରିସରରେ ଏବଂ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଏଭଳି ଘଟଣା ପରେ ଏହି କାରଖାନାରେ ସୁରକ୍ଷା ବ୍ୟବସ୍ଥା ଢିଲା ଥିବା ଅଭିଯୋଗ ହୋଇଛି। ସେପଟେ ପୋଲିସ ଏ ଘଟଣାର ତଦନ୍ତ କରୁଛି।
ବାରମ୍ବାର ଶ୍ରମିକ ସୁରକ୍ଷା ପ୍ରତି କାରଖାନାରେ ନିୟମକୁ ଅଣଦେଖା କରାଯାଉଥିବାରୁ ଏହି ଅଞ୍ଚଳରେ ବାରମ୍ବାର ଦୁର୍ଘଟଣା ହେଉଛି। ପ୍ରାୟ 5 ବର୍ଷ ତଳେ ଅନୁରୂପ ଭାବେ ଅନ୍ୟ ଏକ ସ୍ପଞ୍ଜ ଆଇରନ କାରଖାନାରେ ଦୁର୍ଘଟଣା ଘଟିବାରୁ 4 ଜଣ ଶ୍ରମିକ ପ୍ରାଣ ହରାଇଥିଲେ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
