ପୁରୀ: ଶ୍ରୀମନ୍ଦିର ସଂସ୍କାର ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଏବେ ଶ୍ରୀମନ୍ଦିର ରତ୍ନ ଭଣ୍ଡାରକୁ ପ୍ରଶାସନ ଖୋଲିବାର ସମ୍ଭାବନା ରହିଛି । ଯାହାକୁ ନେଇ ପୁରୀରେ ଚର୍ଚ୍ଚା ଆରମ୍ଭ ହୋଇଛି । ବୁଦ୍ଧିଜୀବୀଙ୍କ ସହିତ ବିଭିନ୍ନ ସଂଗଠନ ରତ୍ନ ଭଣ୍ଡାର ଖୋଲିବା ନେଇ ଦାବି ଉଠାଇଛନ୍ତି ।
ରତ୍ନ ଭଣ୍ଡାରରେ କେତେ ଅଳଙ୍କାର ଅଛି ତାହା କାହାରିକୁ ଜଣାନଥିବାବେଳେ ଏହି ମାମଲାର ପରବର୍ତ୍ତୀ ଶୁଣାଣି ଅର୍ଥାତ ଜାନୁଆରୀ 8 ତାରିଖରେ ଅଳଙ୍କାର ସହ ସମ୍ପତିର ତାଲିକା ଓ ତାହାର ମୁଲ୍ୟ ଏବଂ ରତ୍ନ ଭଣ୍ଡାରର ସୁରକ୍ଷା ବ୍ୟବସ୍ଥା ସମ୍ପର୍କରେ ଶୁଣାଣି ହେବ ।
ଏଥିରେ ଶ୍ରୀମନ୍ଦିର ପ୍ରଶାସନ ନିଜର ପକ୍ଷ ରଖିବା ସହ ରିପୋର୍ଟ ଦାଖଲ କରିବାକୁ କୋର୍ଟଙ୍କ ନିର୍ଦ୍ଦେଶ ରହିଛି । ଏପଟେ ଶ୍ରୀମନ୍ଦିର ପ୍ରଶାସନ ପକ୍ଷରୁ ପରିଚାଳନା କମିଟିରେ ଆଲୋଚନା ଓ ରାଜ୍ୟ ସରକାରଙ୍କ ନିର୍ଦ୍ଦେଶ ଆସିବା ପରେ ହିଁ ରତ୍ନ ଭଣ୍ଡାର ଉପରେ ଏକ ରପୋର୍ଟ ପ୍ରସ୍ତୁତ କରାଯିବ ବୋଲି ଜଣାପଡିଛି ।
ସୂଚନା ଥାଉକି, ଗତ ବର୍ଷ 2018 ଏପ୍ରିଲ 4ରେ 17 ଜଣିଆ ଟିମ ରତ୍ନ ଭଣ୍ଡାର ଖୋଲିବା ପାଇଁ ପ୍ରୟାସ କରିଥିଲେ । ହେଲେ ସେତେବେଳେ ତାଙ୍କ ପାଖରେ ରତ୍ନ ଭଣ୍ଡାର ଚାବି ନ ଥିଲା । ଯାହାକୁ ନେଇ ଏକ ବିବାଦୀୟ ପରିସ୍ଥିତି ମୁଣ୍ଡ ଟେକିଥିଲା । ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ପାଖରେ ଏହାକୁ ନେଇ କିଛି ସ୍ପଷ୍ଟ ଉତ୍ତର ମଧ୍ୟ ନଥିଲା ।
ଚାବିଟି କେଉଁଠି ଓ କିଭଳି ଅଛି । ସୁରକ୍ଷିତ କି ଅସୁରକ୍ଷିତ । ତାକୁ ନେଇ ଅନେକ ପ୍ରଶ୍ନ ସୃଷ୍ଟି ହେଲା । ଏମିତିକି ରାଜ୍ୟ ସରକାର ଏନେଇ ଜଷ୍ଟିସ ରଘୁବୀର ଦାଶ ତଦନ୍ତ କମିଶନ ବସାଇଥିଲେ । ଇତି ମଧ୍ୟରେ କମିଶନ ତଦନ୍ତ କରି ରିପୋର୍ଟ ଦାଖଲ କରିସାରିଛନ୍ତି । କିନ୍ତୁ ରାଜ୍ୟ ସରକାର ଏହି ରିପୋର୍ଟକୁ ଏପର୍ଯ୍ୟନ୍ତ ସାର୍ବଜନୀନ କରିନାହାନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
