ପୁରୀ: ରଙ୍ଗୀନ ଆଲୁଅରେ ଚାଲିଥିଲା ସେଦିନ ନୃତ୍ୟଗୀତ । ସାଂସ୍କୃତିକ କାର୍ଯ୍ୟକ୍ରମରେ ମସଗୁଲ ଥିଲେ ସମସ୍ତେ । ହେଲେ ହଠାତ ମଞ୍ଚରେ ଫୁଟିଲା ଗୁଳି । ଗୋଟିଏ କି ଦୁଇଟା ନୁହେଁ ପାଖାପାଖି 6 ରାଉଣ୍ଡ ଫୁଟିଥିଲା ଗୁଳି । ନାଚଗୀତରେ ହଠାତ ଗୁଳି ଶବ୍ଦ ଶୁଣି ସ୍ତବ୍ଧ ହୋଇଯାଇଥିଲେ ଉପସ୍ଥିତ ଲୋକେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାପରେ ସାରା ରାଜ୍ୟରେ ପ୍ରତିକ୍ରିୟା ପ୍ରକାଶ ପାଇଥିଲା ।
ଏହି ଘଟଣାକୁ ଅତି ଗମ୍ଭୀରତାର ସହ ନେଇଥିଲେ ପୁରୀ ଏସପି ଡ. ଉମାଶଙ୍କର ଦାଶ । ଭିଡିଓ ଭାଇରାଲ ହେବା ପରେ ଏସପି କହିଥିଲେ ଘଟଣାର ଅନୁସନ୍ଧାନ କରାଯାଉଛି । ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ । ଆଉ ଆଜି ପୁରୀ ପୋଲିସ ଏହି ଘଟଣାରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଘଟଣାରେ ସଂପୃକ୍ତ ଥିବା ଅଭିଯୋଗରେ ଆଜି 4ଜଣଙ୍କୁ ଗିରଫ କରିଛି ପୋଲିସ ।
ଗିରଫ ଅଭିଯୁକ୍ତ ମାନେ ହେଲେ ବ୍ୟବସାୟୀ ନରୁଆ ସାହୁ, ତାଙ୍କ ଅଙ୍ଗରକ୍ଷୀ ବରୁଣ କୁମାର, ଦେବେନ୍ଦ୍ର କୁମାର ଓ ବବଲୁ କୁମାର । ଏମାନଙ୍କ ନାମରେ ଆର୍ମ ଆକ୍ଟ ସହ ବିଭିନ୍ନ ଦଫା ଲଗାଇ ପୋଲିସ କୋର୍ଟ ଚାଲାଣ କରିଛି । ଏହାସହ 5ଟି ମୋବାଇଲ ସହ ଦୁଇଟି ଗୁଳି ଓ ବନ୍ଧୁକ ମଧ୍ୟ ଜବତ କରିଛି ପୋଲିସ ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
