ପୁରୀ: ସ୍ଵର୍ଗଦ୍ବାରରେ ପୁରୀ ଜିଲା ବାହାରୁ କୌଣସି ମୃତ ବ୍ୟକ୍ତିଙ୍କ ଅନ୍ତିମ ସଂସ୍କାର ନେଇ ବୁଧବାର ଠାରୁ ଦିଆଯିବ ନାହିଁ ଅନୁମତି । କୋରୋନା ସଂକ୍ରମଣକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଥିବା କହିଛନ୍ତି ପୁରୀ ଜିଲ୍ଲାପାଳ ବଲବନ୍ତ ସିଂ ।
କୋରୋନା ସଂକ୍ରମଣ ବ୍ୟାପିବା ଆଶଙ୍କା ଥିବାରୁ ବାହାର ଜିଲ୍ଲାର ମୃତଦେହକୁ ଏବେ ପୁରୀ ସ୍ବର୍ଗଦ୍ବାରରେ ଅନ୍ତିମ ସଂସ୍କାର ପାଇ ବାରଣ କରାଯାଇଛି । ଏହି କଟକଣା ଅନିର୍ଦ୍ଦିଷ୍ଟ କାଳ ଜାରି ରହିହ । ନିଷ୍ପତ୍ତି ଅତ୍ୟନ୍ତ କଠୋର ହୋଇଥିଲେ ମଧ୍ୟ ସମସ୍ତଙ୍କ ସୁରକ୍ଷା ପାଇଁ ଏହି କଟକଣା ଲଗାଯାଇଥିବା ଜିଲ୍ଲାପାଳ କହିଛନ୍ତି ।
ପୁରୀ ଜିଲ୍ଲାପାଳ କହିଛନ୍ତି, ଆଗକୁ ପରିସ୍ଥିତି ସୁଧୁରିଲେ ଏହି କଟକଣା କୋହଳ ହେବ । କେବଳ ପୁରୀ ଜିଲ୍ଲାବାସୀ ନିଜ ପ୍ରିୟଜନଙ୍କ ଅନ୍ତିମ ସଂସ୍କାର ସ୍ବର୍ଗଦ୍ବାରରେ କରିବା ପାଇଁ ଅନୁମତି ମିଳିଛି । ମୃତ ବ୍ୟକ୍ତିଙ୍କ ସହିତ ଆସୁଥିବା ପରିବାର ଲୋକଙ୍କ ମଧ୍ୟରେ କୋରୋନା ଭୂତାଣୁ ଥିବାର ଆଶଙ୍କା ରହିଛି । ଯଦି କାହାର ଜଣଙ୍କ ଦେହରେ ଏହି ଭାଇରସ ରହିଥାଏ ତାହାଲେ ସେ ସମସ୍ତ ଲୋକଙ୍କୁ ସଂକ୍ରମିତ କରିବେ । ସେହିପରି ପୁରୀ ଜିଲ୍ଲାବାସୀ ସ୍ଵର୍ଗଦ୍ବାରକୁ ଅନ୍ତିମ ସଂସ୍କାର ପାଇଁ ଆସୁଥିବା ହେତୁ ଜିଲ୍ଲାରେ ସଂକ୍ରମଣର ବ୍ୟାପକ ଆଶଙ୍କା ରହିଛି । ଏଣୁ ଏଭଳି କଠୋର କଟକଣା ଲଗାଯାଇଥିବାବେଳେ ଏଥିରେ ସମସ୍ତେ ସହଯୋଗ କରିବାକୁ ପୁରୀ ଜିଲ୍ଲାପାଳ ନିବେଦନ କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
