ପୁରୀ: ଶାରଦୀୟ ଦୁର୍ଗାପୂଜା ପାଇଁ ପୁରୀ ସହରରେ ଆଧ୍ୟତ୍ମିକ ପରିବେଶ । ଆଜି(ଶୁକ୍ରବାର) ଶ୍ରୀକ୍ଷେତ୍ରରେ ପାଳନ ହେଉଛି ମହାସପ୍ତମୀ ।
ସେହିପରି ପୂଜା ମଣ୍ଡପ ଗୁଡିକରେ ଆଜି(ଶୁକ୍ରବାର) ଷଷ୍ଠୀ ପୂଜା ଅନୁଷ୍ଠିତ ହେଉଛି । ଏଥିପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଉଜ୍ଵଳ ଆଲୋକ ମାଳାରେ ସଜ୍ଜିତ ହୋଇଛି ମଣ୍ଡପ । ମା' ବିମଳାଙ୍କ ପ୍ରତିନିଧି ସ୍ବରୂପା ମା' କାକୁଡି ଖାଇ, ମା' ଜହ୍ନି ଖାଇ , ମା' ବାରବାଟୀ, ମା' ମହାତେଶ୍ବରୀ, ମା' ଜମ କୋଟ, ମା' ଚାମୁଣ୍ଡା, ମା' ଶୂନ୍ୟ ଗୋଶାଣୀ ଆଦି ପ୍ରାୟ 30ରୁ ଅଧିକ ଦେବୀ ପ୍ରତିମା ମଣ୍ଡପରେ ପୂଜା ପାଇବେ ।
ମହା ସପ୍ତମୀ ଅବସରରେ ପାଣି ତୋଳା ଯାଇ ଠାକୁରାଣୀଙ୍କର 3 ଦିନ ବ୍ୟାପି ସ୍ବତନ୍ତ୍ର ପୂଜାବିଧି ଅନୁଷ୍ଠିତ ହେବ । ଏନେଇ ଆଜି(ଶୁକ୍ରବାର) ମହା ସପ୍ତମୀ , ଶନିବାର ମହାଷ୍ଟମୀ, ରବିବାର ମହା ନବମୀ ଅନୁଷ୍ଠିତ ହେବ । ପୁନଃ ମଙ୍ଗଳବାର ପବିତ୍ର ଦଶହରା ପୂଜା ଅନୁଷ୍ଠିତ ହେବ । ଏକାଦଶୀରେ ଗୋଷାଣୀ ବିସର୍ଜନ ହେବ । ଅନ୍ୟପଟେ ଅସନ୍ତାକାଲି ମହାଷ୍ଟମୀ ଅବସରରେ ସନ୍ଧି ପୂଜା, ବଳି, ପନ୍ତି ଭୋଗ, ଶଙ୍ଖୁଡ଼ି ଭୋଗ ଆଦି ଅନୁଷ୍ଠିତ ହେବ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
