ପୁରୀ: ଜିଲ୍ଲାରେ ବ୍ରାଉନସୁଗାର ମାଫିଆ ଗିରଫ । ଶ୍ରୀକ୍ଷେତ୍ରକୁ ନିଶା ମୁକ୍ତ କରିବା ପାଇଁ ପୁରୀ ପୋଲିସ ଏବଂ STF ମିଳିତ ଅଭିଯାନ ଜାରି ରଖି ଥିବାବେଳେ ଏକ ବଡ଼ ନିଶା ମାଫିଆ ଗ୍ୟାଙ୍ଗକୁ ଧରିଛି ପୋଲିସ । ଶଙ୍କରେଶ୍ୱର ଠାରୁ ମାତାମଠ ରାସ୍ତାରେ ବ୍ରାଉନସୁଗାର ନେଇ ଆସୁଥିବା ୫ଜଣ ବେପାରୀଙ୍କୁ ଗିରଫ କରିଛି ।
ସେମାନଙ୍କ ଠାରୁ ୧୪୦ ଗ୍ରାମ ବ୍ରାଉନସୁଗାର ଜବତ କରାଯାଇଛି । ଏହାର ଆନୁମାନିକ ମୂଲ୍ୟ ୧୪ ଲକ୍ଷରୁ ଉର୍ଦ୍ଧ୍ବ ହେବ । ଏଥିସହ ସେମାନଙ୍କଠାରୁ ୫୦,୧୦୦ ଟଙ୍କା, ଗୋଟିଏ କାର ଓ ବାଇକ ସମେତ 5 ଟି ମୋବାଇଲ ଜବତ କରାଯାଇଛି । ତେବେ ଗଡ଼ିଶାଗୋଦା ଥାନା ଅନ୍ତର୍ଗତ ସୁନାଖଳାର ଅନୁ ଓରଫ ଅନିରୁଦ୍ଧ ଜୟସିଂ ମୁଖ୍ୟ ବେପାରୀ ବୋଲି ଜଣାପଡିଛି ।ସେ ନିକଟରେ ଝାରପଡା ଜେଲରୁ ଜାମିନରେ ଆସିଥିଲା ।
ତା ନାଁରେ ହତ୍ୟା ମାମଲା ବି ରହିଛି । ଅନିରୁଦ୍ଧ ଜୟସିଂ ସହ ପୁରୀ ଗୁଡିଆ ସାହିର ରବି ନାୟକ, ଚୁଡଙ୍ଗ ସାହିର ବୁଦ୍ଧିଆ ସ୍ୱାଇଁ, ବ୍ରହ୍ମଗିରି ରାୟବିଧାରର ଜୟ ପ୍ରକାଶ ଦାସ ଓ ବିଜିପୁରର ଦୀପୁ ରଞ୍ଜନ ପ୍ରଧାନକୁ ଗିରଫ କରାଯାଇଛି । ଏମାନଙ୍କ ସହ ଆଉ କେଉଁମାନେ ସମ୍ପୃକ୍ତ ଅଛନ୍ତି, ଏମାନେ ବ୍ରାଉନସୁଗାର କେଉଁଠାରୁ ଆଣି କାହାକୁ ଯୋଗାଉଥିଲେ ସେ ସବୁର ତଦନ୍ତ କରୁଛି ବାସେଳୀ ସାହି ଥାନା ପୋଲିସ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
