କଟକ: ଜିଏସଟି ବିଭାଗ ହାତରେ ଲାଗିଲା ପୁଣି ବଡଧରଣରେ ଜିଏସଟି ଠକେଇ । ରାଜ୍ୟରେ ଆଉ ଏକ ଜିଏସଟି ରାକେଟର ପର୍ଦ୍ଦାଫାସ କରିଛି ଜିଏସଟି ବିଭାଗ । 1,819 କୋଟି ଟଙ୍କାର ଜାଲ ବିଲ୍ ପ୍ରସ୍ତୁତ କରି 323 କୋଟି ଟଙ୍କାର ହୋଇଥିଲା ITC ଠକେଇ । ଯେଉଁଥିପାଇଁ ସରକାରଙ୍କୁ ମୋଟ 58.14 କୋଟି ଟଙ୍କାର କ୍ଷତି ସହିବାକୁ ପଡିଛି । ଘଟଣାରେ ଦୁଇ ମାଷ୍ଟରମାଇଣ୍ଡଙ୍କୁ ଗିରଫ କରିଛି ବିଭାଗ । ଅଭିଯୁକ୍ତମାନେ ହେଲେ ଅମିତ ଅଗ୍ରୱାଲ ଓ ସତେନ୍ଦ୍ର ଯାଦବ ।
ଅମିତ ରାଉରକେଲାର ଚାଟାର୍ଡ ଆକାଉଣ୍ଟାଣ୍ଟ ଏବଂ ସତେନ୍ଦ୍ର ଯାଦବ ଭୁବନେଶ୍ବରର ବାସିନ୍ଦା ଅଟନ୍ତି । ଅମିତଙ୍କୁ ଝାରସୁଗୁଡାରୁ ଗିରଫ କରାଯାଇଥିବାବେଳେ ସତେନ୍ଦ୍ର ରାଜଧାନୀରୁ ବନ୍ଧା ହୋଇଛନ୍ତି । ପଶ୍ଚିମବଙ୍ଗ, ଝାଡଖଣ୍ଡ ଓ ଦିଲ୍ଲୀକୁ ଏହି ଠକେଇର ଚେର ଲମ୍ବିଥିବା ଜଣାପଡିଛି । ଖାଲି ପଡ଼ିଆକୁ 10ଟି ଫାର୍ମର ଠିକଣା ଦର୍ଶାଇ ସେମାନେ ଏହି ଠକେଇ କରିଛନ୍ତି । ଏପର୍ଯ୍ୟନ୍ତ ମୋଟ 23 ଜଣ ବ୍ୟକ୍ତିଙ୍କୁ ଗିରଫ କରିଛି GST ବିଭାଗ । ଏନେଇ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛନ୍ତି ରାଜ୍ୟ ଜିଏସଟି କମିଶନର ସୁଶୀଲ ଲୋହାନି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
