କଟକ: ବାତ୍ୟା ‘ଫନି’ର ତାଣ୍ଡବ ପରେ ଉଜୁଡିଯାଇଛି ସିଲଭରସିଟି । ବାଉନ ବଜାର ତେପନ ଗଳି ସହର ଏବେ ଅସ୍ତବ୍ୟସ୍ତ ହୋଇପଡିଛି । ନାହିଁନଥିବା ଅସୁବିଧାର ସାମ୍ନା କରୁଛନ୍ତି ଲୋକେ ।
ଭିଡିଓ ସୌଜନ୍ୟ: ସମ୍ବାଦଦାତା, କଟକ
କେଉଁଟି ଗଛ ପଡି ରାସ୍ତାଜାମ ତ ଆଉ କେଉଁଠି ବିଜୁଳି ତାର ଓ ଖୁଣ୍ଟ ପଡି । ଏହାରି ଭିତରେ ଜିଲ୍ଲା ପ୍ରଶାସନ ଓ ଓଡ୍ରାଫ ଟିମ କଟକର ସ୍ଥିତି ସ୍ବାଭାବିକ କରିବା ପାଇଁ ଦିନରାତି ଏକ କରିଦେଇଛନ୍ତି । ତଥାପି ବି କାମ ସରୁନି । ଏତେ ପରିମାଣରେ କ୍ଷୟକ୍ଷତି ହୋଇଛି ଯେ ବାତ୍ୟାକୁ 4 ଦିନ ପୁରିଥିଲେ ମଧ୍ୟ ସ୍ଥିତି ସ୍ବଭାବିକ ହୋଇପାରିନି ।
ବିଶେଷକରି ସିଡିଏ, କ୍ୟାଣ୍ଟନମେଣ୍ଟ ରୋଡ଼, ଶିଶୁଭବନ ଛକ ଆଦିରେ ବ୍ୟାପକ କ୍ଷୟକ୍ଷତି ଦୃଷ୍ଟିଗୋଚର ହୋଇଛି । ବଡ଼ ବଡ଼ ଗଛ ପଡିଥିବାରୁ ଗମନାଗମନରେ ବାଧା ଉପୁଜୁଛି । ସମସ୍ତ ରାସ୍ତାକୁ ଶୀଘ୍ର ସଫା କରିବା ପାଇଁ ଅଣ୍ଟା ଭିଡିଛି ଓଡ୍ରାଫ ଟିମ । ଖୁବଶୀଘ୍ର ସ୍ଥିତି ସ୍ବଭାବିକ କରିବାକୁ ଉଦ୍ୟମ ଜାରି ରହିଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
