କଟକ: ସରିଲା ଧର୍ମ ମାସ କାର୍ତ୍ତିକ । ଆଉ ଆଜି ହେଉଛି ଛାଡ଼ଖାଇ । ତେବେ କଟକ ଯୋବ୍ରା ଆନିକଟ ମାଛ ବଜାରରେ ସକାଳୁ ସକାଳୁ ମାଛ ଦୋକନରେ ବାଲିଯାତ୍ରା ପରି ଭିଡ ଦେଖିବାକୁ ମିଳିଛି । ସାମାନ୍ୟ ଦର ବୃଦ୍ଧି ସତ୍ତ୍ବେ ବି ମାଛ କିଣିବାକୁ ଲୋକଙ୍କ ମଧ୍ୟରେ ପ୍ରବଳ ଉତ୍ସାହ ରହିଛି ।
କାର୍ତ୍ତିକ ମାସ ସାରା ଲୋକେ ଆମିଁଷ ଛାଡିଥିବା ବେଳେ ଆଜିର ଦିନକୁ ଅନେକ ବ୍ୟକ୍ତି ଚାହିଁ ରହିଥାନ୍ତି । ଏ ହେଉଛି ଯୋବ୍ରା ଆନିକଟ ମାଛ ବଜାର । ଯେଉଁଠି ଦେଶୀ ରୋହୀ 300ଟଙ୍କା, ପାମ୍ପ୍ଲେଟ 800, ଚିଙ୍ଗୁଡି 600 ଓ ଅନ୍ୟ ମାଛ 250 ଟଙ୍କାରେ ବିକ୍ରି ହେଉଛି । ଆଉ ଏହି ରେଟକୁ ଖାଉଟିଙ୍କ ଖାତିର ନାହିଁ । କାରଣ ଦର ଯେତେ ହେଲେ ବି ଆଜି ଆମିଁଷ ଖାଇବା ସୁନିଶ୍ଚିତ, ନହେଲେ ଛାଡଖାଇର ମୂଲ୍ୟ ରହିବ ନାହିଁ ବୋଲି କିଛି ଖାଉଟି ନିଜ ପ୍ରତିକ୍ରିୟାରେ କହିଛନ୍ତି । ମାଂସ ଅଣ୍ଡା ଉପରେ ଲୋକଙ୍କ ଚାହିଦା ରହିଥିବା ସତ୍ତ୍ବେ ବି ମାଛ ମାର୍କେଟରେ ଲୋକଙ୍କ ଭିଡ ରହିଥିବା ନେଇ ବ୍ୟବସାୟୀମାନେ ଖୁସି ବ୍ୟକ୍ତ କରିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
