କଟକ: ଗୋଟିଏ ପଟେ ନୂଆ ମଟର ଯାନ ଆଇନକୁ ନେଇ ସାରା ଦେଶରେ ଏକ ପ୍ରକାର କୋକୁଆ ଭୟ ସୃଷ୍ଟି ହୋଇଛି । ସରକାରଙ୍କ ଦାବି ହେଲା ନୂତନ ଆଇନ ଦ୍ବାରା ଦୁର୍ଘଟଣା କମିବ । ଲୋକେ ସୁରକ୍ଷିତ ଯିବା ଆସିବା କରିପାରିବେ । ହେଲେ ଏହି ସମୟରେ କଟକ ରେଭେନ୍ସା ବିଶ୍ବ ବିଦ୍ୟାଳୟ ସମ୍ମୁଖରେ ଏକ ସଡକ ଦୁର୍ଘଟଣାରେ ଜଣେ କଲେଜ ଛାତ୍ରୀଙ୍କ ମୃତ୍ୟୁ ଘଟିଛି ।
ଦୁର୍ଘଟଣାରେ ପ୍ରାଣ ହରାଇଥିବା ଛାତ୍ରୀ ଜଣଙ୍କ ହେଉଛନ୍ତି ରେଭେନ୍ସା ଅର୍ଥନୀତି ବିଭାଗର ଛାତ୍ରୀ ଅନ୍ନପୂର୍ଣ୍ଣା ଚୌଧୁରୀ । ଏହି ଘଟଣାକୁ କେନ୍ଦ୍ରକରି ୟୁନିଭରସିଟି ଗେଟ ସାମ୍ନାରେ ବିକ୍ଷୋଭ କରିଛନ୍ତି ଛାତ୍ରଛାତ୍ରୀ । ଏହାସହ ତୁରନ୍ତ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ।
ପୋଲିସର ଖାମଖିଆଲି ଟ୍ରାଫିକ ପରିଚାଳନାକୁ ଦାୟୀ କରିଛନ୍ତି ଛାତ୍ରଛାତ୍ରୀ । କେଉଁ ପରିସ୍ଥିତିରେ ଦିନ ବେଳେ ବେଆଇନ ଭାବେ ସହର ଭିତରକୁ ପୁଣି ରେଭେନ୍ସା ସମ୍ମୁଖକୁ ଏକ ଟ୍ରକ ଆସିଲା ବୋଲି ପ୍ରଶ୍ନ ଉଠାଇଛନ୍ତି । ଯଦି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରିବେ ବୋଲି କହିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
