କଟକ: ଓଡିଶାକୁ ପୁଣି ଫେରିଛି ଲକଡାଉନ । ଲକଡାଉନକୁ 2 ଦିନ ହେଇଥିବା ବେଳେ ବଜାରରେ ଆରମ୍ଭ ହେଲାଣି କଳାବଜାରୀ । 2ଦିନ ପୂର୍ବରୁ ଆଳୁ ୩ କିଲୋ ପ୍ରତି ୪୦ ରୁ ୪୫ ଟଙ୍କା ଦରରେ ବିକ୍ରି ହେଉଥିବା ବେଳେ ତାହା ଏବେ ବୃଦ୍ଧି ପାଇ 70-90ରେ ପହଞ୍ଚିଛି । ସେହିପରି ପିଆଜ ୩ କିଲୋପ୍ରତି ୬୦ ରୁ ୭୦ ଥିବା ବେଳେ ତାହା ଏବେ ୯୦ ରୁ ୧୦୦ ଟଙ୍କା ଚଢା ଦରରେ ବିକ୍ରୟ ହେଉଛି । ଯାହା ସାଧାରଣ ଖାଉଟିଙ୍କ ହାଣ୍ଡିଶାଳରେ ସିଧା ସଳଖ ମାଡ ହୋଇଛି ।
ଏନେଇ ଖୁଚୁରା ବ୍ୟବସାୟୀ କହିଛନ୍ତି ଗୋଦାମରେ ଦର ବୃଦ୍ଧି ଯୋଗୁଁ ଏପରି ଦର ବୃଦ୍ଧି ଘଟିଛି । ଗୋଦାମରେ ବସ୍ତା ପିଛା ୯ ଶହ ରୁ ୯୨୫ ଟଙ୍କା ଟଙ୍କା ନେଉଛନ୍ତି । ସେପଟେ ଛତ୍ରବଜାର ପରିବା ବ୍ୟବସାୟୀ ସଂଘ କହିଛନ୍ତି ଆଳୁ ବସ୍ତା ପିଛା ୮ ଶହ ଦରରେ ଗୋଦାମରେ ବିକ୍ରୟ ହେଉଛି । ଲକଡାଉନ କାରଣରୁ ପୂର୍ବ ଅପେକ୍ଷା ଆଳୁ ଗାଡି ଆସୁନାହିଁ । ଫଳରେ ଦର ଟିକେ ଅଧିକ ରହୁଛି । ଲକଡାଉନ ହଟିଲେ ଆଳୁ ଦର ନିୟନ୍ତ୍ରଣକୁ ଆସିବ ।
ଖୁଚୁରା ବ୍ୟବସାୟୀ ଓ ଛତ୍ରବଜାର ପରିବା ବ୍ୟବସାୟୀ ସଂଘର ସମ୍ପାଦକଙ୍କ ତଥ୍ୟରେ ତାଳମେଳ ରହୁନଥିବା ବେଳେ ଏବେ ପ୍ରଶ୍ନ ଉଠୁଛି କିଏ କହୁଛି ସତ ? ସେପଟେ ଏହାକୁ ନିୟନ୍ତ୍ରଣ କରିବାକୁ ସରକାରଙ୍କ ନିକଟରେ ଦାବି କରିଛନ୍ତି ସାଧାରଣ ଲୋକେ । ସେପଟେ ବଜାରରେ କଳାବଜାରୀ ଆରମ୍ଭ ହୋଇଥିବା ବେଳେ ନିଦା ଵିଷ୍ଣୁ ସାଜିଛି ଯୋଗାଣ ବିଭାଗ।
କଟକରୁ ନାରାୟଣ ସାହୁ, ଇଟିଭି ଭାରତ
