କଟକ: ନିରତାର ନିର୍ଦ୍ଦେଶକଙ୍କୁ ହତ୍ୟା ଉଦ୍ୟମ ଘଟଣାରେ ଗିରଫ ହେଲା ମାଷ୍ଟରମାଇଣ୍ଡ । ଅନେକ ଦିନ ଲୁଚକାଳି ଖେଳ ପରେ ସୋମବାର ପୋଲିସ ହାତରେ ଧରାପଡିଛନ୍ତି ମାଷ୍ଟରମାଇଣ୍ଡ ଲକ୍ଷ୍ମୀଧର ମଲ୍ଲିକ ଓ ତାର ଚାରି ସାଥୀ ।
ସୂଚନାଯୋଗ୍ୟ, ଲକ୍ଷ୍ମୀଧର ନିରତାରରେ ଏକ ୱେଟର ଭାବେ କାମ କରୁଥିଲେ । କିନ୍ତୁ ନିର୍ଦ୍ଦେଶକଙ୍କୁ କିଛି ଲୋକଙ୍କୁ ଚାକିରୀ ଦେବା ପାଇଁ ବାରମ୍ବାର ବାଧ୍ୟ କରୁଥିଲେ ଲକ୍ଷ୍ମୀଧର । ନିର୍ଦ୍ଦେଶକ ଏହି କଥାରେ ଅରାଜି ହେବାରୁ ଏପରି ଯୋଜନା ରଚିଥିଲେ ଲକ୍ଷ୍ମୀଧର ।
ଚଳିତ ମାସ 3 ତାରିଖରେ ଘଟିଥିଲା ଏହି ଘଟଣା । ନିର୍ଦ୍ଦେଶକ ଶକ୍ତିପ୍ରସାଦ ଦାସ ଅଫିସରୁ ଘରକୁ ଫେରୁଥିବା ସମୟରେ ପୂର୍ବରୁ ଲୁଚି ରହିଥିବା ଦୁଇ ଜଣ ଯୁବକ ନିର୍ଦ୍ଦେଶକଙ୍କ କାରକୁ ଗୁଳିମାଡ଼ କରିବାକୁ ଚେଷ୍ଟା କରିଥିଲେ । କିନ୍ତୁ ସୌଭାଗ୍ୟବଶତଃ ବନ୍ଧୁକଟି ହାତରୁ ଖସି ଯିବାରୁ ସେଠାରୁ ପଳାଇଥିଲେ 2 ଯୁବକ ।
ବହୁ ତଦନ୍ତ ପରେ ଲକ୍ଷ୍ମୀଧର ମଲ୍ଲିକ ଓ ତାର 4 ସାଥୀ ମିଶି ଏପରି ଉଦ୍ୟମ କରିଥିବାର ଜଣାପଡିଥିଲା । ସୋମବାର ସେମାନଙ୍କୁ ଗିରଫ କରିବା ସହ ସେମାନଙ୍କ ଠାରୁ ନଗଦ 50 ହଜାର ଟଙ୍କା, ଏକ ହୋଣ୍ଡା ବାଇକ ଓ ଏକ ବନ୍ଧୁକ ଜବତ କରିଛି କଟକ ଗ୍ରାମାଞ୍ଚଳ ପୋଲିସ ।
କଟକରୁ ନାରାୟଣ ସାହୁ, ଇଟିଭି ଭାରତ
