କଟକ: ଆଗକୁ ଦଶହରା । ପାର୍ବଣରେ ଅପ୍ରୀତିକର ପରିସ୍ଥିତି ଉପରେ ନିୟନ୍ତ୍ରଣ ପାଇଁ କମିଶନରେଟ ପୋଲିସର ପୂର୍ବ ପ୍ରସ୍ତୁତି ଜୋରସୋର ଚାଲିଛି । ରାଜଧାନୀ ପରେ କଟକରେ ପୂଜା ପ୍ରସ୍ତୁତି ବୈଠକ ସରିଛି । ହେଲେ କଟକ ପୂଜା ପ୍ରସ୍ତୁତି ବୈଠକ ପରେ କେଁ ପସିଛି । କମିଶନରେଟ ପୋଲିସର ଉପରେ ଆଙ୍ଗୁଳି ଉଠିଛି । ଏତେ ବଡ ବୈଠକରେ ସମସ୍ତଙ୍କୁ ଡକାଯାଇଥିଲା ହେଲେ ବାରବାଟୀ ବିଧାୟକ ମହମ୍ମଦ ମୋକିମ୍ଙ୍କ ଅନୁପସ୍ଥତି ଭିନ୍ନ ଦିଗକୁ ଇସାରା କରୁଛି । ଜଣେ ଲୋକପ୍ରତିନିଧିଙ୍କୁ ପୂଜା ମିଟିଂକୁ ନିମନ୍ତ୍ରଣ ନକରିବା କମିଶନରେଟ ପୋଲିସର କାର୍ଯ୍ୟଧାରା ଓ ମତିଗତି ଉପରେ ବିରାଟ ପ୍ରଶ୍ନ ଚିହ୍ନ ଛିଡା କରିଛି ।
ଭାଇଚାର ସହର କଟକରେ ଭାଇଚାରା ଭଙ୍ଗ କରୁଛି କି କମିଶନରେଟ ପୋଲିସ ! ରାଜନୈତିକ ଚାପରେ କାମ କରୁଛି କି କମିଶନରେଟ ପୋଲିସ ! ଏଭଳି ଅନେକ ପ୍ରଶ୍ନ ମୁଣ୍ଡ ଟେକିଛି ପୂଜା ପ୍ରସ୍ତୁତି ବୈଠକରେ ବିଧାୟକଙ୍କ ଅନୁପସ୍ଥିତି ପରେ । ଦୁର୍ଗାପୂଜା ପାଇଁ ଗୁରୁବାର କମିଶନରେଟ ପୋଲିସ ପକ୍ଷରୁ ପ୍ରସ୍ତୁତି ବୈଠକ ଡକା ଯାଇଥିଲା । ଏହି ବୈଠକରେ ସହରର ସମସ୍ତ ପୂଜା ମଣ୍ଡପର କର୍ମକାର୍ତ୍ତା, ଶାନ୍ତିକମିଟିର କର୍ମକାର୍ତ୍ତା ,ସମସ୍ତ ରାଜନୈତିକ ଦଳର ପ୍ରତିନିଧିଙ୍କୁ ନିମନ୍ତ୍ରଣ କରାଯାଇଥିଲା ବେଳେ କଟକ ବାରବାଟୀ ବିଧାୟକଙ୍କୁ ନିମନ୍ତ୍ରଣ କରି ନଥିଲା କମିଶନରେଟ ପୋଲିସ ।
ଅନ୍ୟ ଏକ ଘଟଣା କମିଶନରେଟ ପୋଲିସକୁ କାଠଗଡାରେ ଛିଡା କରୁଛି । ଏହି ସମନ୍ବୟ ବୈଠକରେ କଟକ ବାରବାଟୀ ନିର୍ବାଚନ ମଣ୍ଡଳୀର ପରାଜିତ ବିଜେଡି ପାର୍ଥୀ ଦେବାଶିଷ ସାମନ୍ତରାୟଙ୍କୁ ସଭାକୁ ନିମନ୍ତ୍ରଣ କରାଯାଇଥିବା ବେଳେ କେଉଁ ପରିସ୍ଥିତିରେ ଓ କାହିଁକି ବିଜୟୀ ବିଧାୟକଙ୍କୁ ସଭାକୁ ପୋଲିସ ନିମନ୍ତ୍ରଣ କରି ନଥିଲେ ? ଏହା ପଛରେ ଆଉ କିଛି ଉଦ୍ଦେଶ୍ୟ ନାଁ ରାଜନୈତିକ ଚାପରେ ପୋଲିସ ଏପରି କରିଥିଲା ! ବିଧାୟକ କଂଗ୍ରେସ ଦଳର ହୋଇଥିବାରୁ ପୋଲିସ ଶାସକ ଦଳର ଚାପରେ ଏଭଳି କରିଥିଲା କି ? ଏଭଳି ଅନେକ ପ୍ରଶ୍ନ ଚର୍ଚ୍ଚାର ପରିଧିକୁ ଆସିଛି ।
ପୋଲିସ ର ଏଭଳି କାର୍ଯ୍ୟ କୁ ନେଇ ଅନେକ ପୂଜା କମିଟିର କର୍ମକର୍ତ୍ତା ମଧ୍ୟ ନାପସନ୍ଦ କରିବା ସହ ଘଟଣାକୁ ନିନ୍ଦା କରିଛନ୍ତି । ଘଟମା ପରେ କଟକ ବାରବାଟୀ ବିଧାୟକ ଏନେଇ ପ୍ରତିକ୍ରିୟା ରଖିଛନ୍ତି । ବୈଠକ ସମ୍ପର୍କରେ ପୋଲିସ ନିମନ୍ତ୍ରଣ କରି ନଥିବା ସେ କହିଛନ୍ତି । କାହିଁକି ବୈଠକକୁ ନିମନ୍ତ୍ରଣ କରାଯାଇନଥିଲା ,ସେକଥା ପୋଲିସ କମିଶନର ହିଁ ଉତ୍ତର ଦେଇପାରିବେ ବୋଲି ବିଧାୟକ କହିଛନ୍ତି । ଏକଥା କଟକ ବାସୀ ହିଁ ଜବାବ ଦେବେ ବୋଲି ବିଧାୟକ କହିଛନ୍ତି । ଅନ୍ୟପଟେ ପୋଲିସ କମିଶନରଙ୍କୁ ଏନେଇ ପ୍ରଶ୍ନ କରିବାରୁ ସେ ଏ ସମ୍ପର୍କରେ କିଛି ଜାଣି ନ ଥିବା କହି ଚାଲି ଯାଇଥିଲେ ।
ଏବେ ପ୍ରଶ୍ନ ଉଠୁଛି କମିଶନର ଏହି ବୈଠକ ଡାକାଇ ଥିଲେ । ମାତ୍ର ସ୍ଥାନୀୟ ବିଧାୟକଙ୍କୁ ଭୁଲି ଗଲେ କେମିତି? ଜାଣି ଶୁଣି ଶାସକ ଦଳର ଚାପରେ ରାଜନୈତିକ ଉଦ୍ଦେଶ୍ୟ ରଖି କଟକ ବାରବାଟୀ କଂଗ୍ରେସ ବିଧାୟକଙ୍କୁ ବୈଠକକୁ ଡାକି ନଥିବା ଚର୍ଚ୍ଚା ହେଉଛି ।
କଟକରୁ ନାରାୟଣ ସାହୁ, ଇଟିଭି ଭାରତ
