କଟକ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶାସନିକ ଅଧିକାରୀମାନଙ୍କ ଶୁଭେଚ୍ଛା ଘଟଣା । ଅଫିସରମାନଙ୍କ ଏପରି ଶୁଭେଚ୍ଛା ପାଇଁ ବିରୋଧିଙ୍କ ସମାଲୋଚନା ଉପରେ ପ୍ରତିକ୍ରିୟା ରଖିଲେ ପୂର୍ବତନ ବିଧାୟକ ତଥା କଟକ ବିଜେଡି ସଭାପତି ଦେବାଶିଷ ସାମନ୍ତରାୟ । ଭୋଟ ଦେବା ସମସ୍ତଙ୍କର ମୌଳିକ ଅଧିକାର । ପଞ୍ଚାୟତ ନିର୍ବାଚନ ଓ ସମସ୍ତ ପୌର ନିର୍ବାଚନରେ ବିଜେଡି ଭଲ ପ୍ରଦର୍ଶନ କରିଥିଲା । ସେଥିପାଇଁ ସେମାନେ ଅଭିନନ୍ଦନ ଜଣାଇବାକୁ ଯାଇଥିଲେ । ଏଥିରେ ଅସୁବିଧା କେଉଁଠି ରହିଲା ବୋଲି ଦେବାଶିଷ ପ୍ରଶ୍ନ କରିଛନ୍ତି ।
ମୁଖ୍ୟମନ୍ତ୍ରୀ ଲୋକଙ୍କ ପାଇଁ ଆହୁରି ଭଲ କାମ କରିବାକୁ ପ୍ରଶାସନିକ ଅଧିକାରୀଙ୍କୁ ପରାମର୍ଶ ଦେଇଛନ୍ତି । ଏଥିରେ କୌଣସି ରାଜନୀତି ନାହିଁ ବୋଲି ସଫେଇ ଦେଇଛନ୍ତି ଦେବାଶିଷ । ତେବେ ଏଭଳି ଅଭିଯୋଗ ଘଟଣାକୁ ନେଇ ସେ ମଧ୍ୟ ବିରୋଧୀଙ୍କୁ ଟାର୍ଗେଟ କରିଛନ୍ତି । ଉତ୍ତରପ୍ରଦେଶରେ ଏବଂ ମଣିପୁରରେ ସମାନ ଘଟଣା ଘଟିଥିବାର କହି ବିଜେପିକୁ ପାଲଟା ଜବାବ ଦେଇଛନ୍ତି ଦେବାଶିଷ ସମାନ୍ତରାୟ ।
ଉଲ୍ଲେଖଯୋଗ୍ୟ, ପୌର ନିର୍ବାଚନରେ ବିଜେଡ଼ିର ବିପୁଳ ବିଜୟ ହୋଇଛି । ଏହି ବିଜୟ ପାଇଁ କିଛି ପ୍ରଶାସନିକ ଅଧିକାରୀମାନେ ମୁଖ୍ୟମନ୍ତ୍ରୀ ନବୀନଙ୍କୁ ଭେଟି ତାଙ୍କୁ ଶୁଭେଚ୍ଛା ଜଣାଇଥିଲେ । ଏହି ଭେଟଘାଟକୁ ତୀବ୍ର ନିନ୍ଦା କରିଥିଲା ବିଜେପି । ଓଡ଼ିଶାରେ ଏହା ଏକ ଅଭାବନୀୟ ସ୍ଥିତି ସୃଷ୍ଟି କରିଛି । ପ୍ରଶାସନିକ ଇତିହାସରେ କଳଙ୍କର ଦାଗ ସୃଷ୍ଟି ହୋଇଛି ବୋଲି ବିଜେପି ସାମ୍ବାଦିକ ସମ୍ମିଳନୀ କରି କହିଥିଲା ।
କଟକରୁ ନାରାୟଣ ସାହୁ, ଇଟିଭି ଭାରତ
