କଟକ: ସନ ହସ୍ପିଟାଲ ନିରାପତ୍ତାକୁ ନେଇ ଉଠିଲା ବଡ଼ ପ୍ରଶ୍ନ । କଟକର ବିଜୁ ପଟ୍ଟନାୟକ ଛକ ନିକଟରେ ଥିବା ସନ ହସ୍ପିଟାଲରେ ସୋମବାର ଘଟିଥିବା ଅଗ୍ନିକାଣ୍ଡ ଘଟଣାର ଖିଅ ଖୋଜିବାକୁ ଆରମ୍ଭ କରିଛି ଅଗ୍ନିଶମ ବିଭାଗର ସ୍ବତନ୍ତ୍ର ଟିମ ।
୩ଜଣିଆ ଟିମ ଆସି ମଙ୍ଗଳବାର ସନ ହସ୍ପିଟାଲରେ ପହଞ୍ଚି ସେଠାକାର ସ୍ଥିତିକୁ ଅନୁଧ୍ୟାନ କରିବା ସହ ଅଗ୍ନିକାଣ୍ଡର କାରଣ ଜାଣିବା ପାଇଁ ତନ୍ନତନ୍ନ କରି ସବୁକିଛି ଯାଞ୍ଚ କରିଛନ୍ତି । ପ୍ରାଥମିକ ତଦନ୍ତରେ ନିଆଁ ଲାଗିବାର କାରଣ ସଟ ସର୍କିଟ ବୋଲି ଜାଣିବାକୁ ପାଇଛି ଟିମ ।
ଡେପୁଟି ଫାୟାର ଅଫିସର ଟି.କେ ବାବୁଙ୍କ ନେତୃତ୍ବରେ ଆସିଥିବା ଏହି ଟିମ ହସ୍ପିଟାଲର ବିଭିନ୍ନ ମହଲାରେ ବୁଲି ସେଠାକାର ସ୍ଥିତି ଅନୁଧ୍ୟାନ କରିଥିଲେ । ବିଶେଷ କରି ସୋମବାର ନିଆଁ ଲାଗିଥିବା ୫ ମହଲାରେ ଅଗ୍ନିକାଣ୍ଡ କଣ କିପରି ଘଟିଲା ତାହାକୁ ତନ୍ନତନ୍ନ କରି ଯାଞ୍ଚ କରିଥିଲା ଏହି ଟିମ । ତେବେ ପ୍ରାଥମିକ ତଦନ୍ତରେ ନିଆଁ ଲାଗିବାର କାରଣ ସଟ ସର୍କିଟ ବୋଲି କହିଛନ୍ତି ଡେପୁଟି ଫାୟାର ଅଫିସର ।
ଏଠାରେ ଯାହା ବ୍ୟବସ୍ଥା ରହିବା କଥା ତାହାର ଏକ ତାଲିକା ହସ୍ପିଟାଲ କର୍ତ୍ତୃପକ୍ଷଙ୍କୁ ଦିଆଯାଇଛି ଆଉ ତାହାକୁ ପାଳନ କରିବା ପାଇଁ ନିର୍ଦ୍ଦେଶ ଦିଆଯାଇଛି । ତେବେ ଅଗ୍ନିଶମ ବିଭାଗ ପକ୍ଷରୁ ଦିଆଯାଉଥିବା ପ୍ରଶିକ୍ଷଣ ଫାଇଦା ନିଶ୍ଚିତ ରୂପେ ମିଳିଛି ବୋଲି କହିଛନ୍ତି ଡେପୁଟି ଫାୟାର ଅଫିସର ଟି.କେ ବାବୁ ।
ଏବେ ହସ୍ପିଟାଲଗୁଡିକରେ ଘଟୁଥିବା ଅଗ୍ନିକାଣ୍ଡରେ କାଜୁଆଲଟି ନାହିଁ । ଆଉ ଏହା କେବଳ ଉଦ୍ଧାରକାର୍ଯ୍ୟ ପାଇଁ ଅଗ୍ନିଶମ ବିଭାଗ ଦେଇଥିବା ପ୍ରଶିକ୍ଷଣର ପ୍ରଭାବ ବୋଲି ସେ କହିଛନ୍ତି । ତେବେ ଏହି ତଦନ୍ତ ବାବଦରେ ଟିମ ଉଚ୍ଚ ଅଧିକାରୀ ଏକ ରିପୋର୍ଟ ପ୍ରଦାନ କରିବ ବୋଲି ସେ କହିଛନ୍ତି ।
କଟକରୁ ନାରାୟଣ ସାହୁ ଓ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
