କଟକ: ନୟାଗଡ ନାବାଳିକା ହତ୍ୟାକାଣ୍ଡ ଘଟଣାରେ ଗୁରୁବାର ମାମଲାର ଶୁଣାଣି ଥିବାବେଳେ ଭାରତୀୟ ବିକାଶ ପରିଷଦ ତରଫରୁ ଜନସ୍ବାର୍ଥ ମାମଲାରେ ଆଜି(ବୁଧବାର) ଆଉ ଏକ ମିସ୍ କେସ୍ ଦାଖଲ କରାଯାଇଛି । ତୁରନ୍ତ ଏହି ମାମଲାକୁ ସିବିଆଇ ଯାଞ୍ଚ ପାଇଁ ନିର୍ଦ୍ଦେଶ ଦେବା ସହ ମୃତ ନାବାଳିକାର ମା'ଙ୍କ ଅଭିଯୋଗ ଅନୁଯାୟୀ ବାବୁଲି ନାୟକଙ୍କ ପଲିଗ୍ରାଫ ପରୀକ୍ଷା କରାଯାଉ ବୋଲି ଆବେଦନ ହୋଇଛି ।
ଜାତୀୟ ଶିଶୁ ସୁରକ୍ଷା କମିଶନ ଅଧିକାର ମଧ୍ୟ କେନ୍ଦ୍ରୀୟ ସଂସ୍ଥା ତଦନ୍ତ ପାଇଁ ସୁପାରିସ କରିଛନ୍ତି । ଗୃହମନ୍ତ୍ରୀ ନଭେମ୍ବର 25 ତାରିଖରେ ବିଧାନସଭାରେ ପ୍ରକାଶ କରିଥିଲେ ଯେ ମେଡିକାଲ ତଥ୍ୟ ପ୍ରକାରେ ଦୁଷ୍କର୍ମ କରାଯାଇଥିବା ଯାଞ୍ଚ ରିପୋର୍ଟରେ ଆସିନାହିଁ । ବର୍ତ୍ତମାନ ଏସଆଇଟି ମୁଖ୍ୟ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଯେ ହତ୍ୟା ପରେ ଦୁଷ୍କର୍ମ କରାଯାଇଛି । ଏହା ଏସଆଇଟି ତଦନ୍ତରେ ପ୍ରଶ୍ନବାଚୀ ସୃଷ୍ଟି କରୁଛି ।
ମୃତ ଶିଶୁର ଅନ୍ୟ ଅଙ୍ଗ ଅଂଶ କୁଆଡେ ଗଲା ବୋଲି ପ୍ରଶ୍ନ ଉଠୁଛି । ଘଟଣାର 5 ମାସ ପରେ କେଉଁ ଆଧାରରେ ଏକ ନାବାଳକକୁ ଏହି ଘଟଣାରେ ଗିରଫ କରାଯାଇଥିବା ଓଡିଶାର ଜନସାଧାରଣଙ୍କୁ ସନ୍ଦେହ କରିବା ସହିତ ମୃତ ନାବାଳିକାର ମା' ମଧ୍ୟ ଏହାକୁ ଗ୍ରହଣ କରି ପାରୁନାହାଁନ୍ତି । ତେଣୁ ଜଣେ ନିରୀହ ନାବାଳକକୁ ବେନିୟମ ଭାବେ ଗିରଫ କରାଯାଇଥିବା ଅଦାଲତଙ୍କୁ ଦର୍ଶାଯାଇଛି ।
ଭାରତୀୟ ବିକାଶ ପରିଷଦ ତରଫରୁ ଉଚ୍ଚନ୍ୟାୟାଳୟଙ୍କଠାରେ ଏକ ମିସ୍ କେସ ରୁଜୁ କରାଯାଇଛି । ଏହାସହ ଡାକ୍ତରୀ ଟିମ ଓ ଏସଆଇଟି ମୁଖ୍ୟଙ୍କ ପଲିଗ୍ରାଫ ପରୀକ୍ଷା ଉଚ୍ଚନ୍ୟାୟାଳୟ ବିଚାରପତିଙ୍କ ଉପସ୍ଥିତିରେ କରାଯିବା ପାଇଁ ଅନୁରୋଧ କରାଯିବା ସହ ଏସଆଇଟିର ଗଠନକୁ ଆଇନ ସମ୍ମତ କି ନୁହେଁ ବୋଲି ପ୍ରଶ୍ନ ଉଠାଯାଇଛି।
କଟକରୁ ନାରାୟଣ ସାହୁ, ଇଟିଭି ଭାରତ
