କଟକ: ପ୍ରେମରେ ବିଫଳ ହୋଇ ଯୁବତୀଙ୍କ ଉନ୍ମତ୍ତ କାଣ୍ଡ । ପ୍ରେମିକ ଉପରକୁ କଲେ ଏସିଡ ମାଡ । ଏଭଳି ଏକ ଅଭାବନୀୟ ଘଟଣା ଘଟିଛି କଟକ ଜଗତପୁର ବଟ ଛକ ନିକଟରେ । ଗତକାଲି(ମଙ୍ଗବାର) ରାତିରେ ଏହି ଘଟଣା ଘଟିଥିବା ବେଳେ ପୋଲିସ ବୁଧବାର ଏହି ମାମଲାରେ ସମ୍ପୃକ୍ତ ଯୁବତୀ ଓ ତାଙ୍କ ମା'ଙ୍କୁ ଗିରଫ କରିଥିବା ଜଣାପଡିଛି ।
ଏସିଡ ମାଡରେ ଗୁରୁତର ହୋଇଥିବା ବ୍ୟକ୍ତି ଜଗତପୁର ଅଞ୍ଚଳର ଅଲେଖ ବାରିକ ବୋଲି ଜଣାପଡିଛି । ତାଙ୍କ ମୁହଁ ପୋଡି ଯାଇଥିବା ବେଳେ ତାଙ୍କୁ ଏସିବିରେ ଭର୍ତ୍ତି କରାଯାଇଛି । ମଙ୍ଗଳବାର ରାତିରେ ସେ ତାଙ୍କର ଜଗତପୁର ବଟ ଛକରେ ଥିବା ସେଲୁନ ବନ୍ଦ କରି ଫେରିବା ସମୟରେ ଯୁବତୀ ଜଣଙ୍କ ତାଙ୍କ ଉପରକୁ ଏସିଡ ମାଡ଼ କରିଥିଲେ । ତେବେ ଯୁବକଙ୍କ କହିବାନୁଯାୟୀ, ସେମାନେ ଉଭୟ ଉଭୟଙ୍କୁ ଦେଢ ବର୍ଷ ହେଲା ଜାଣିଥିଲେ । ହେଲେ ଯୁବକଙ୍କ ବିବାହ ଅନ୍ୟତ୍ର ଠିକ ହୋଇଯାଇଥିଲା । ଏହାପରେ ଯୁବତୀ ଜଣଙ୍କ ତାଙ୍କୁ ବାରମ୍ବାର ଫୋନ କରି ଦେଖା କରିବାକୁ ଡାକୁଥିଲେ । କିନ୍ତୁ ହଠାତ ମଙ୍ଗଳବାର ସେ ତାଙ୍କ ଦୋକାନ ବନ୍ଦ କରି ଫେରିବା ବେଳକୁ ତାଙ୍କ ଉପରକୁ ଏସିଡ ମାଡ କରିଥିଲେ ସମ୍ପୃକ୍ତ ଯୁବତୀ । ଏହି ଘଟଣାରେ ପୋଲିସ ଉକ୍ତ ଯୁବତୀ ସରସ୍ବତୀ ନାୟକ(ପାଏଲ) ଓ ତାଙ୍କ ମାଆ ଚନ୍ଦ୍ରମା ନାୟକକୁ ଗିରଫ କରିଥିବା ଜଣାପଡିଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
