କଟକ: କଟକ ବଡ ମେଡିକାଲରେ ଏକ ପରିଚିତ ଚେହେରା ହେଉଛନ୍ତି ଅଭିଜିତ ଦାସ। ପେଷାରେ ସେ ଜଣେ ଟିଉସନ ଶିକ୍ଷକ। ହେଲେ ନିଶା ତାଙ୍କର ଅସହାୟ ରୋଗୀଙ୍କୁ ସେବା କରିବା। ଯେଉଁଥିପାଇଁ ସେ ବଡ ମେଡିକାଲ ଅଞ୍ଚଳରେ ବେଶ ପରିଚିତ ।
ବୈଷୟିକ ଶିକ୍ଷାର ଇଲେକ୍ଟ୍ରିକାଲ ପାଠ୍ୟକ୍ରମରେ ଡିଗ୍ରୀ ହାସଲ କରିଛନ୍ତି ଅଭିଜିତ୍ । ହେଲେ ନିଶାଖୋର ମାନବ ସେବା କରିବାର ମନବୃତ୍ତି ଆଜି ତାଙ୍କୁ ଅସହାୟ ରୋଗୀଙ୍କ ପାଇଁ ଅନ୍ଧର ଲଉଡି ସଜାଇଛି।
ଦୀର୍ଘ ସାତ ବର୍ଷ ହେବ ଅନବରତ ଭାବେ ସେ ରୋଗୀ ସେବାକୁ ନିଜର ବର୍ତ୍ତୀ ଭାବେ ବାଛିନେଇଛନ୍ତି । ଦିନ ହେଉକି ରାତି, ସମୟ ଅସମୟରେ ମେଡିକାଲକୁ ଆସୁଥିବା ଅନେକ ଅସହାୟ ଓ ଗରିବ ରୋଗୀଙ୍କ ସେବା କରିଆସୁଛନ୍ତି ସେ । ହେଲେ କେବେ ବି ଧକି ଯାଇନାହାଁନ୍ତି । ସମାଜ ସେବାରେ ନିଜକୁ ଉର୍ତ୍ସଗ କରିବାର ଅଭିଳାଷ ହିଁ ତାଙ୍କୁ ଆଜି ଏଇଠି ପହଞ୍ଚାଇଛି ।
କଟକ ବଡ ମେଡିକାଲକୁ ଦୈନିକ ହଜାର ହଜାର ରୋଗୀ ଆସିଥାନ୍ତି । ଆଉ ଏମାନଙ୍କ ମଧ୍ୟରେ ଅଧିକାଂଶ ଅସହାୟ, ନିରାଶ୍ରୟ ଓ ଗରିବ ରୋଗୀ ଥାଆନ୍ତି । ଯେଉଁମାନଙ୍କୁ ସହଯୋଗ ଓ ସହାୟତାର ହାତ ବଢାନ୍ତି ଅଭିଜିତ୍ । ତାଙ୍କର ସୁଖ ଓ ଦୁଃଖର ସାହା ପାଲଟିଯାଆନ୍ତି ସେ।
ରକ୍ତ ଯୋଗାଡ ଠୁ ଆରମ୍ଭ କରି ବିଭିନ୍ନ ପ୍ରକାର ସହାୟତା ଯୋଗାଇ ଦିଅନ୍ତି ଅଭିଜିତ୍ । ଯେଉଁଥିପାଇଁ ଅନେକଙ୍କ ଜୀବନ ମଧ୍ୟ ବଞ୍ଚିଯାଏ । ଆଉ ଏଭଳି କାମ ପାଇଁ ତାଙ୍କୁ ଅନେକ ଥର ସମ୍ମାନିତ ମଧ୍ୟ କରାଯାଇଛି ।
ତେବେ ରୋଗୀଙ୍କ ସେବାକୁ ନିଜର ସର୍ବସ୍ବ ଭାବି ନେଇଥିବା ଅଭିଜିତ୍ଙ୍କ ଏଭଳି ପ୍ରୟାସ, ଯୁବବର୍ଗ ଓ ସମାଜ ପାଇଁ ପ୍ରେରଣା ଦାୟୀ ରହିବ ।
କଟକରୁ ନାରାୟଣ ସାହୁ, ଇଟିଭି ଭାରତ
