ଭୁବନେଶ୍ବର: ସରକାରୀ ଚାକିରୀରେ ଯୁବବର୍ଗଙ୍କ ପାଇଁ ବୟସ ସୀମା ବୃଦ୍ଧିକୁ ନେଇ ରାଜ୍ୟପାଳଙ୍କ ହସ୍ତକ୍ଷେପ ଲୋଡିଲା ଯୁବ କଂଗ୍ରେସ । ଗୁରୁବାର ଏନେଇ ରାଜ୍ୟପାଳଙ୍କୁ ଦାବିପତ୍ର ଦେଇଛି ଯୁବ କଂଗ୍ରେସ । 21ବର୍ଷର ଶାସନ ଭିତରେ ନିଯୁକ୍ତି ପ୍ରକ୍ରିୟା ତ୍ବରାନ୍ବିତ ହୋଇପାରୁନି । ଯୁବକମାନେ ନ୍ୟାୟ ପାଇପାରୁନାହାଁନ୍ତି ବୋଲି ଅଭିଯୋଗ କରିଛି ଦଳ ।
କଂଗ୍ରେସ ଦାବି ଅନୁସାରେ, ନିଯୁକ୍ତି କ୍ଷେତ୍ରରେ ସାଧାରଣ ବର୍ଗଙ୍କ ପାଇଁ ରାଜ୍ୟରେ 32 ବର୍ଷ ବୟସ ସୀମା ରଖାଯାଇଛି, କିନ୍ତୁ ଏମିତି ବି ଯୁବକମାନେ ଅଛନ୍ତି ଯେଉଁମାନେ ଉଚ୍ଚଶିକ୍ଷା ଲାଭ କରି ସାର୍ଟିଫିକେଟ ପାଇଲାବେଳକୁ 32 କିମ୍ବା 34 ବର୍ଷ ହୋଇଯାଉଛି l ସେପଟେ ରେଗୁଲାର ଭିତ୍ତିରେ ନିଯୁକ୍ତି ସୁଯୋଗ ମଧ୍ୟ ବାହାରୁ ନାହିଁ l ଯେଉଁଥିପାଇଁ ବହୁ ମେଧାବୀ ଛାତ୍ରଛାତ୍ରୀ ସରକାରୀ ଚାକିରୀରୁ ବଞ୍ଚିତ ହେଉଛନ୍ତି l କିନ୍ତୁ ଅନ୍ୟ ରାଜ୍ୟରେ ବୟସ ସୀମା 42ରୁ 45 ବର୍ଷକୁ ବୃଦ୍ଧି କରାଯାଇଛି । କିନ୍ତୁ ବିଡମ୍ବନାର ବିଷୟ ଯେ ଆମ ରାଜ୍ୟରେ ଏହା ହୋଇପାରୁନାହିଁ। ତେଣୁ ଆଜି ଯୁବ କଂଗ୍ରେସ ପକ୍ଷରୁ ମାଷ୍ଟରକ୍ୟାଣ୍ଟିନ ଛକଠାରୁ ରାଜଭବନ ଛକ ପର୍ଯ୍ୟନ୍ତ ଏକ ପଦଯାତ୍ରାରେ ବାହାରି ରାଜ୍ୟପାଳଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି l ତେଣୁ ତୁରନ୍ତ ସରକାରୀ ଚାକିରୀ ପାଇଁ ବୟସ ସୀମାକୁ ବୃଦ୍ଧି କରାଯାଉ ବୋଲି ଯୁବ କଂଗ୍ରେସ ପକ୍ଷରୁ ସ୍ମାରକ ପତ୍ରରେ ଦାବି କରାଯାଇଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
