ଭୁବନେଶ୍ବର: ବିଶ୍ବ ତମାଖୁ ବର୍ଜନ ଦିବସରେ ରାଜ୍ୟକୁ ତମାଖୁ ମୁକ୍ତ କରିବା ପାଇଁ ରାଜ୍ୟର ବିଭିନ୍ନ ବିଭାଗ ପକ୍ଷରୁ ନିଷ୍ପତ୍ତି । କିପରି ଓଡିଶା ତମାଖୁମୁକ୍ତ ରାଜ୍ୟ ଭାବେ ପରିଗଣିତ ହେବ, ସେନେଇ ଆଲୋଚନା କରାଯାଇଛି । ରିପୋର୍ଟ ଅନୁଯାୟୀ ତମାଖୁ ବ୍ୟବହାର ବର୍ତ୍ତମାନ ବିଶ୍ୱ ସ୍ୱାସ୍ଥ୍ୟ ପାଇଁ ଏକ ବଡ଼ ବିପଦ ଭାବେ ଉଭା ହୋଇଛି ।
ତମାଖୁ ସେବନ କାରଣରୁ ବର୍ଷକୁ 7 ନିୟୁତରୁ ଅଧିକ ଲୋକଙ୍କ ଜୀବନ ଯାଉଛି । ବିପଦଜନକ କଥା ହେଉଛି କି ଆମ ରାଜ୍ୟର ନାବାଳିକା ଏବଂ ନାବାଳିକାମାନେ ଏପରି ଏକ କୁଅଭ୍ୟାସ ଜାଲରେ ପଡୁଛନ୍ତି । ଓଡିଶା ଗ୍ଲୋବାଲ୍ ୟୁଥ୍ ତମାଖୁ ସର୍ଭେ 2019 ରିପୋର୍ଟରୁ ଜଣାପଡିଛି ଯେ, ଓଡିଶାର ପ୍ରାୟ 7% ନାବାଳକ ଏବଂ 5.5% ନାବାଳିକା ବିଭିନ୍ନ ପ୍ରକାରର ତମାଖୁ ବ୍ୟବହାରକୁ ନିୟମିତ ଅଭ୍ୟାସରେ ପରିଣତ କରି ସାରିଛନ୍ତି । ଯାହାକି ଭବିଷ୍ୟତ ପାଇଁ ବିପଦ ଅଟେ । ଯେଉଁ ନାବାଳକ ନାବାଳିକାମାନେ ତମାଖୁ ସେବନ କରୁଛନ୍ତି ସେମାନଙ୍କ ହାରାହାରି ବୟସ ୧୧ ବର୍ଷ ମଧ୍ୟରେ ରହୁଛି ।
ଅନ୍ୟପଟେ ଜନସ୍ୱାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର କହିଛନ୍ତି ଯେ, 'ଟବାକୋରେ 60 ରୁ 70 ପ୍ରକାରର କେମିକାଲ ରହିଛି, ଯାହା କ୍ୟାନ୍ସର କରାଇଥାଏ । ରାଜ୍ୟରେ ମୁଖ କର୍କଟ ରୋଗୀ ସଂଖ୍ୟା ଅଧିକ । ଏହାର ବ୍ୟବହାର କମେଇବାକୁ ହେଲେ ସଂଗଠିତ ଭାବରେ ପ୍ରୟାସ ଆବଶ୍ୟକ । ସମସ୍ତ ସ୍କୁଲ ଓ କଲେଜରେ ଟବାକୋ ଫ୍ରି କରିବାକୁ ପ୍ରୟାସ ଚାଲିଛି । ପିଲାଙ୍କୁ ସଚେତନ କରାଯାଉଛି ।' ଏହାକୁ ରୋକିବାକୁ ରାଜ୍ୟର ସ୍ବତନ୍ତ୍ର ଟିମ ଗଠନ କରାଯାଇଛି ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ।
ତେବେ ୧୯୮୭ ମସିହାରୁ ବିଶ୍ବ ତମାଖୁ ବର୍ଜନ ଦିବସ ପାଳନ ହୋଇଆସୁଛି । ୨୦୧୩ ରେ ରାଜ୍ୟ ସରକାର ତମାଖୁ ଓ ନିକୋଟିନକୁ ବ୍ୟାନ କରିଛନ୍ତି । ତଥ୍ୟ ଅନୁସାରେ ଅନେକ ବେଆଇନ ଆଡ୍ଡା ଉପରେ ଚଢ଼ଉ କରି ଖୋର୍ଦ୍ଧା ସବୁଠୁ ଅଧିକ ଟଙ୍କାର ଫାଇନ ଆଦାୟ କରିଛି । ଗଞ୍ଜାମରେ ସର୍ବାଧିକ ଏନଫୋର୍ସମେଣ୍ଟ ଟିମ୍ ନିୟୋଜିତ କରି ରେଡ୍ କରୁଛି । କାର୍ଯ୍ୟାନୁଷ୍ଠାନ ଦିଗରେ ପୋଲିସ ସହାୟତା ପ୍ରଦାନ କରୁଥିବାରୁ ଡିଜି ପୋଲିସଙ୍କୁ ଅତିରିକ୍ତ ଶାସନ ସଚିବ ସମ୍ବର୍ଦ୍ଧନା କରିଥିଲେ । ଏହାଛଡା କାର୍ଯ୍ୟକ୍ରମରେ ମିଶନ ଶକ୍ତି, ଫୁଡ୍ ସେଫ୍ଟି ବିଭାଗ, ଅବକାରୀ, ଗଣ ଶିକ୍ଷା ବିଭାଗକୁ ମଧ୍ୟ ଉଲ୍ଲେଖନୀୟ କାର୍ଯ୍ୟ ପାଇଁ ପୁରସ୍କୃତ କରାଯାଇଥିଲା ।
ଇଟିଭି ଭାରତ, ଭୁବନେଶ୍ବର
